ORANJESTAD (AAN): Meverly Romano, vocero di Departamento di Impuesto a haci un recordatorio na tur esnan cu ainda no a yena y entrega nan declaracion di Inkomstenbelasting 2015.
El a enfatiza cu ta mas cu mitad di cliente, mas di 19 mil cu no a entrega na declaracion. Pesey un peticion ta bay na esnan cu ainda no a yen’e pa no laga esaki pa ultimo ora. E deadline ta dia 1 di Juni 2017.
Segun Romano, e aña aki, nan no a tene nan campaña di ayudo na november cu a pasa. Pero tur fin di luna tabata tin e campaña di ayudo. Tabata tin’e na Januari, Februari y na Maart. Siman pasa tabata tin ayudo na YMCA.
El a agrega cu e atendencia na e campaña aki di duna asistencia no tabata suficientemente halto. “Pa nos, si bo mitra cu tin 19 mil y pico hende cu falta pa entrega nan declaracion y brindando e ayudo, tog e atendencia no ta halto, e ta duna nos un indicacion cu kizas e clientenan no ta worry mucho cu nan declaracion”.
Ta algo sumamente importante pa corda riba dje, pa yen’e y pa entreg’e. E momento cu bo entrega e declaracion, y vooral pa esnan cu ta spera di haya un restitucion bek ta importante pa sa cu Departamento di Impuesto ta procesa e declaracionnan segun e secuencia di fecha di entrega, a remarca.
Esaki ta nifica cu e clientenan cu entrega nan declaracion mas prome, esaki ta wordo procesa mas prome y mas lihe e por haya su placa bek, Romano a indica.
Dia 1 di Juni 2017 ta e fecha final, despues di e prolongacion di 6 luna cu Departamento di Impuesto a duna. No ta bay duna mas prolongacion. E fecha ta keda 1 di Juni 2017 y despues di esey no tin mas tempo pa por entrega e declaracion.
Pesey Departamento di Impuesto kier pidi tur e clientenan, conseheronan fiscal y oficinanan di accounting/administracion pa nan tene cuenta cu e deadline.
Finalmente Meverly Romano a expresa cu wardando te na ultimo, e rij tambe lo bira largo mescos cu e tempo di espera. Mas lihe e cliente actua, mas lihe e ta keda cla tambe.
