ORANJESTAD (AAN): Manera tur ciudadano na Aruba Parlamentario mr. Juan Ady Thijsen a tuma nota pa medio di prensa di un caso na unda un Ministro di nos pais formando parti di e gabinete guia pa Prome Ministro Mike Eman ta worde sospecha di delitonan grave door di Ministerio Publico di Aruba.
Te na e momentonan aki Prome Ministro ni e Ministro envolvi no a bin Parlamento pa responsabilisa nan mes.
Esaki segun Parlamentario mr. Juan Ady Thijsen a splica DIARIO, ta otro muestra mas cu Gabinete di AVP no tin ningun respet pa nos Parlamento.
Tambe Parlamentario mr. Juan Ady Thijsen a tuma nota cu gobierno a escohe of mas bien inventa un caminda cu nos sistema democratico y constitucional no conoce. Gobierno ta permiti e Ministro involvi pa keda na cas non activo durante e proceso di investigacion cu pago y a pasa su carteranan pa e Ministro di Finanzas kende ya tin man yen cu problemanan serio di finanzas publico.
Ministro Paul Croes ta worde acusa door di Ministerio Publico pa e.o. negoshi cu permiso, labamento di plaka, crimen organiza, soborno cualnan segun Parlamentario mr. Juan Ady Thijsen ta acusacionan sumamente serio. E seriedad di e asunto por ser mira tambe den e cantidad di instancianan involvi tanto di Aruba mes como di Reino, manera FIOD, RST. Parlamentario mr. Juan Ady Thijsen ta kere cu mester laga e procedura legal cana su caminda pero e Ministro awor sospechoso no por keda mas den funcion.
Segun Parlamentario mr. Juan Ady Thijsen aunque Ministro ta non actief e ta keda responsable pa tur actonan di su cartera. Lo tabata na su lugar pa Ministro Paul Croes tuma su retiro especialmente si ya caba irrespecto e investigacion di Ministerio Publico a keda constata cu e Ministro tabata tin un trahador ilegal trahando na su cas. Articulo 2:155 di Wetboek van strafrecht lid 1 ta bisa cu Paul Croes ya caba ta strafbaar:
- Hij die een ander, die zich wederrechtelijk toegang tot of verblijf in Aruba heeft verschaft, krachtens overeenkomst of aanstelling arbeid doet verrichten, terwijl hij weet of ernstige reden heeft om te vermoeden dat die toegang of dat verblijf wederrechtelijk is, wordt gestraft met gevangenisstraf van ten hoogste een jaar of geldboete van de derde categorie.
Mirando cu Mike Eman, Prome Ministro y lider di AVP a faya di exigi di Paul Croes su retiro segun Parlamentario mr. Juan Ady Thijsen awor palabra ta na Parlamento pa acepta un mocion di desconfianza den Ministro Paul Croes y encamina e retira di Ministro Paul Croes. Den cuadra di esaki Fraccion di MEP a pidi un reunion publico pero te ainda esaki no a ser concedi.
Si en caso Parlamento no encamina e retiro di Ministro Paul Croes e ora segun Parlamentario mr. Juan Ady Thijsen ta Hulanda den cuadra di su waarborgfunctie pa bon gobernacion lo mester atende e asunto. Parlamentario mr. Juan Ady Thijsen ta spera cu no yega asina lew y cu nos parlamento y politiconan mustra madurez y atende e asunto den nos mes cas. Aruba merece mihor gobernacion y respet pa su reglanan constitucional.
