Home General Asesino mes a mustra unda el a dera tripulante di crusero na...

Asesino mes a mustra unda el a dera tripulante di crusero na Bonaire

24085
0
SHARE
— Prensa Mexicano cu hopi atencion riba e caso aki.
- Advertisement -

ORANJESTAD (AAN): E barco crusero Navigator of the Seas di Royal Caribbean International, a sali for di Miami mey-mey di April pa un viahe di 9 dia den Southern Caribbean.

E barco tabatey dia 19 di April for di 6:00 am te cu 5:00 pm den Waf di Oranjestad na Aruba.  Despues e barco a sali y bay rumbo pa Kralendijk, Bonaire.

— Adriana Morales.

Abordo di e barco tabatin e dama Adriana Morales de Florencio.  Un miembro di tripulacion di Navigator of the Seas, y originalmente procedente di Puebla, Mexico.  E ta trahando cu su di dos contract cu RCI Royal Caribbean International.

Manera ta costumber, den nan oranan liber, e miembronan di tripulacion por baha y bay tera ora cu e barco ta mara den Waf.  Y nan tin di percura pa regresa na tempo, pa e barco sigui su rumbo.

Adriana a baha di e barco banda di 12:00 pm, cu un blusa preto sin manga, jeans short, y zapato preto.  E dama ta delega y naci na 1993.

Ni e barco, ni e shipping agent na e isla no a haya contacto mas cu Adriana Morales. Como cu e no a raporta mas bek na e Barco, esaki a bandona Bonaire y a bati alarma na autoridad.  E barco Navigator of the Seas a sali rumbo bek pa Miami, unda el a prepara pa un viahe transatlantico pa Southampton, Inglatera.

INVESTIGACION RIBA SECURITY VIDEO

Desde e Diahuebs ey, 20 di April 2017, autoridad di Bonaire a cuminza cu un investigacion, y esaki a inclui entrevista diferente persona, haya potret di e dama perdi, y a bay revisa varios video di Security Cameras cu tin instala na Kralendijk.

Aki ta unda cu por a mira e dama bahando di Navigator of the Seas, y poco despues a mire den compania di un homber local.  Esaki ta unda cu autoridad di e isla a enfoca riba dje.

– E homber y Adriana riba video.

Ora cu porfin a logra identifica e homber riba e video, autoridad a actua y a detene e persona di inicial R.E.G.S., inicialmente debi cu e tin arma den poder.  Asina a cuminza interoga e sospechoso, y a hasta haci algun razzia na varios cas riba Diasabra, e.o. na Kaya Hulanda, un cas na Kaya Inglatera, y control na un Snackbar na Kaya Dr. G. Hernandez..  Pero no a haya e dama desapareci.

PRESION ENORME RIBA SOSPECHOSO

Finalmente bao di presion enorme, ta e sospechoso mes lo a basha abao, y a hiba autoridad na un area den cunucu canto di lama cerca di Playa Grandi, den area di Dam Grandi.  Esaki ta como 15 kilometer Noord-Noordwest di Kralendijk.  Mester a coba y a bin haya cu e restonan mortal di un persona.  Autoridad tin di identifica e persona ainda, pero fuentenan a splica cu nan ta 99% sigur cu ta trata aki di Adriana Morales, principalmente na e hecho cu e tin e tattoo riba su curpa.

Awor autoridad a cuminza cu investigacion forensico riba e restonan mortal, cu ta keda eynan pa investigacion forense.  Y ya caba autoridad di Bonaire a pone famia na Mexico na altura.

CONTACTO CU FAMIANAN VIA ARUBA

Mientras tanto for di Mexico, gobernantenan di ciudad di Puebla, hunto cu cancilleria Mexicano, a drenta den contacto cu e Consul Honorario na Aruba (cu ta esun mas cerca di Bonaire), y tambe cu Consulado di Venezuela na Kralendijk pa duna un man pa suministra informacion.

Nan a duna un man na e mayornan di Adriana Morales de Florencio, kende ta un alumno di Benemerita Universidad Autonoma de Puebla (BUAP), pa nan por haya paspoort.  Tambe a logra duna nan pasashi, pa nan por viaha di Mexico pa Panama City, y despues rumbo pa Bonaire pa ta na e isla.

Royal Caribbean International tambe ta den contacto cu e mayornan di Adriana Morales, y a ofrece tur nan sosten den e momentonan dificil aki.

Na Bonaire, ta Korps Politie Caribisch Nederland (KPCN) y Ministerio Publico di islanan BES ta encarga cu e investigacion. E interogacion riba e sospechoso lo sigui, pa asina determina pa ki motibo el a dicidi riba su mes pa caba cu bida di un dama inocente di 24 aña di edad.

Esaki a bira e di 6 caso di morto violento cu autoridad di e isla di Flamingo a bin ta atende den e prome 4 luna di 2017

 

- Advertisement -

DUNA COMENTARIO

Please enter your comment!
Please enter your name here