Home Hudicial Baba Ras interoga na Hulanda no kier bisa nada encuanto asesinato Lalo...

Baba Ras interoga na Hulanda no kier bisa nada encuanto asesinato Lalo na Hooiberg

2412
0
SHARE
- Advertisement -

ORANJESTAD (AAN): Diaranzon merdia 2:00 pm, Corte di Husticia a sigui cu e caso di asesinato di Lisandro (Lalo) Webb. Na December 2016, Hues a duna un sentencia intermedio caminda Hues a ordena Fiscal pa interoga Baba Ras na Hulanda pa mira si ta berdad cu e lo a manda mata e victima. Tambe Hues a ordena Fiscal pa laga haci un investigacion cu con a determina cu e cel cu e sospechoso tabatin den su poder tabata serca di e lugar unda a haya e victima asesina na Hooiberg.

Un grupo di miembro di Recherche di Aruba a viaha bay Hulanda pa interoga Baba Ras pero sin resultado. Baba Ras a haci uso di su derecho di silencio y no a bisa nada.

VIGILANCIA SEVERO

Ayera merdia por a ripara cu Corte di Husticia tabata bon vigila pa Polis tanto pafor como paden. Den sala di Corte tabatin familiarnan di e fayecido y tambe por a mira e team di Recherche cu a investiga e caso.

Acusacion: E acusacion cu Fiscal a haci aña pasa December 2016 contra e sospechoso E.H.(24) ta cu riba 19 Maart 2015, el a mata Lisandro Webb. Fiscal a bisa cu E.H. a tira e victima den cabez. Fiscal ta considera esaki complice di asesinato. Fiscal ta kere cu E.H. lo tabata hunto cu otronan.

Demanda di daño: Mama di e difunto a duna Hues documentonan di entiero pa E.H. paga e gastonan di entiero. Mas o menos 12 mil florin.

FISCAL A EXIGI 22 AÑA DI PRISON

Na December 2016, Fiscal a bisa cu for di tur investigacion, e ta conclui cu E.H. ta gaña. Fiscal a mustra cu e investigacion riba DNA ta mustra cu a haya DNA di E.H. na curpa di e victima. Fiscal a mustra cu E.H. no kier bisa nada con su DNA por a bay riba curpa di e victima.

Keda keto por ta malo: Ta un hecho cu E.H. por haci uso di derecho di silencio. Fiscal a mustra cu a base di sentencianan, mester mustra un sospechoso riba e consecuencianan di keda keto. Den caso asina por conclui ora tin indicacionnan fuerte, cu e silencio ta den contra di e sospechoso o sea por us’e den su culpabilidad.

Tin indicacion: Fiscal a mustra cu tin tur indicacion cu E.H. ta culpable. Tin un cantidad di tap cu ta mustra cu tabata usa e cellular di N., e ruman homber di E.H., cu a tira riba hende na October 2014. Tambe cu tabatin combersacionnan cu Baba Ras cu a keda condena 20 aña pa mata Brete. Tabatin combersacion tambe entre E.H. y su ruman N. riba bendemento di e cadena den exterior y cu e placa lo mester wordo parti den tres. Papia di prijs entre 5 y 6 mil florin. E momento ey E.H. a bisa su ruman N. cu tin auto a para cu algo no ta bon y nan a stop di papia. Tabatin un mensahe pa E.H. cu ora e wordo deteni e mester bisa cu ta su ruman N. y no e. Tin diferente combersacion entre Baba Ras y E.H., caminda Ras lo a bisa cu tin un otro. Fiscal a mustra cu e ora E.H. a bisa cu e lo ta pa e mesun prijs 5. Ta sospecha cu aki probablemente E.H. ta pidi 5 mil florin of 5 mil dollar.

Fiscal a bisa cu Baba Ras y Lalo Webb tabatin problema cu otro y nan tabata tira riba otro. Tabatin diferente caso cu por confirma esaki. Na opinion di Fiscal, E.H. riba orden di Baba Ras sera den KIA, a tira mata Lalo. Kere cu den e caso aki, tabatin planeamento pa basta tempo pa mata Lalo.

Exigi castigo: Fiscal a mustra cu e ta tene cuenta cu na 2014, E.H. a wordo condena pa arma di candela. E no ta considera E.H. cu ta promer biaha cu e ta cay den man di husticia. El a exigi 22 aña di prison pa E.H. Manera DIARIO a publica, Hues a tuma un sentencia intermedio pa interoga Baba Ras y ayera a sigui.

Baba Ras no a papia: Ayera merdia Hues a laga Fiscal y abogado duna nan punto di bista riba e investigacionnan haci. For di loke Fiscal a splica, por conclui cu un grupo di Recherche di Aruba a bay Hulanda y hunto cu agentenan di Hulanda a bay interoga Baba Ras. Baba Ras a bisa cu nan sa su situacion y cu e ta haci uso di su derecho di silencio.

Fiscal ta haya cu no por obliga Baba Ras di duna declaracion pasobra e no ta un sospechoso den e caso di asesinato di Webb. Pesey e miembronan di Recherche no a confront’e cu e investigacionnan haci den e caso Webb.

Culpabel: Fiscal a bisa cu aña pasa e caso a keda trata y cu a exigi 22 aña di prison. El a bisa cu Hues a duna sentencia intermedio pa interoga Baba Ras na Hulanda. Tambe mester a traha raport for di unda a conclui cu cellular cu a usa tabata banda di e victima. Fiscal a bisa cu tin indicacion cu e sospechoso tabata cu su cellular den cercania di e victima. Fiscal a conclui cu E.H. ta complice di asesinato y a mantene su exigencia di 22 aña di prison y cu E.H. mester paga demanda di daño.

ABOGADO

Abogado a remarca cu door cu E.H. a haci uso di su derecho di silencio Fiscal ta conclui cu e ta culpable. Abogado ta haya cu no tin suficiente prueba y ta haya cu E.H. ta inocente.

Interoga Baba Ras: Na opinion di abogado, e interogacion di Baba Ras no ta completo pasobra no a confront’e cu loke a papia den caso. Segun e abogado, Fiscal ta pretende cu E.H. a wordo paga pa mata Lalo Webb. El a cuestion e interogacion di Baba Ras caminda el a haci uso di derecho di silencio. E ta haya cu no a haci confrontacion debido. Fiscal ta pretende cu Ras no ta sera pa e caso aki y como tal no por wordo obliga pa duna contesta. E abogado a mustra cu Ras a wordo bisa cu e ta wordo scucha como sospechoso den e caso. E ta haya cu Fiscal por a haci uso di presion pa haya informacion di Ras. E hecho cu no a confronta Ras cu e contenido di loke a trata den Corte, ta haci cu no a haci un interogacion debido.

Investigacion no corecto: E abogado ta haya cu e investigacion pa cu e yamada di cellular di E.H. no ta corecto. E ta haya cu for di e investigacion haci, no tabatin contacto cu e zend master di Hooiberg manera Fiscal ta pretende. E cellular no tabata na e lugar unda a mata e victima.

E abogado a mustra cu a scucha yamada riba 19 Maart 2015 y a conclui cu ta Baba Ras lo a papia cu E.H. Na opinion di e abogado, Baba Ras tabata sera den KIA. A reconoce e stem como esun di E.H. Door di esey a detene E.H. Segun e abogado, E.H. ta ruman di N.H. y nan stem ta mesun cos. Ta asina cu NH. ta fugitivo. E abogado ta haya cu door cu Fiscal no a haya mas informacion riba yamadanan, no por tira esey riba E.H.

DNA: E abogado a bisa Hues cu por tabatin contaminacion di DNA di E.H. cu a wordo manda NFI na Hulanda. Haya cu mester laga e resultado di DNA afor pasobra a haya un print so di E.H. riba man di e victima. Den e auto a haya diferente DNA. E conclusion di DNA no ta mustra difinitivo cu ta E.H. ta e culapabel. El a señala cu den e auto a haya 3 otro DNA. No por conclui cu e DNA ta di E.H. Mester ta cuidadoso cu resultado di DNA. E.H. ta para riba cu e no a mata Lalo.

E abogado a remarca cu e otro personanan cu ta sospecha, entre otro Baba Ras, no a wordo persigui. Ainda Fiscal no a dicidi kico e ta bay haci. E abogado a bisa Hues cu e ta haya cu mester declara E.H. liber. E demanda di daño, e ta haya cu esun culpable lo mester paga y no E.H.

Hues a sera tratamento di e caso y a bisa cu 10 Mei 2017 pa 8.30 di mainta lo tin sentencia.

- Advertisement -

DUNA COMENTARIO

Please enter your comment!
Please enter your name here