ORANJESTAD (AAN): Diabierna Santo atardi, algo prome cu 5or, un persona canando na e beach di Mangel Halto, patras di e minimarket Namyong, a scucha gritonan ta bin for di e mangrovenan. E gritonan a capta su atencion y un par di minuut despues, el a observa un mucha muher special (cu discapacidad intelectual) a sali for di e mangrovenan y su tras un homber color scur riba bicicleta.
E persona a keda observa e mucha muher cu a cana bay den direccion di e minimarket unda a topa cu un meneer di edad. E mucha muher tabata na yoramento.
E persona cu a tende y observa loke a pasa riba beach, a acerca e meneer y puntr’e si tur cos tabata bon cu e mucha muher pasobra e ta kere algo lo a pasa cun’e den e mangrovenan. E homber a reacciona y puntra, “aha, bisa mi kico a pasa, mi ta bay p’e” y a saca un pistol for di su carson.
Mesora e testigo a yama polis y un rato despues varios polis di K-9 Unit den auto particular y otronan cu patruya a presenta na e sitio pa haci e investigacion. Abase di e datonan suministra tanto di e testigo como di e victima a cuminza mesora un buskeda den e area pa e homber color scur style rasta riba bicicleta.
A mira cu un patruya a topa cu e homber den un caya den e cercania, pero a lag’e bay ya cu e momento ey no tabata tin suficiente informacion.
Por a mira cu e damita no tabata tin herida pero e tabata na yoramento. E meneer si tabata tin un herida na su frenta locual tambe a hala atencion. E meneer a bay cas cun’e den e cercania y eynan polis a yega pa tuma declaracion di e sucedido.
Parce cu algun hende eybanda a duna informacion na Polis tambe cu ta trata di e homber Raymond of Monty. E ta un adicto of choller den e area. Polis a sigui cu e buskeda. A bay na su cas pero e no tabata tey.
Awor tur cos ta mustra cu ta trata di un caso di maltrato a tuma lugar. Polis a keda busca y topa cu Raymond atrobe, kende a wordo observa tabata canto di lama eynan mes na Mangel Halto cu otro hombernan. Polis a bay riba dje mesora. No a haya arma riba dje, aunke testigo a indica na DIARIO cu e no a mira e tal “Monty” canando cu arma.
Polis cu a bay tambe na cas di e victima na Mangel Halto a topa cun’e y e tabata yora. El a splica cu Raymond a busk’e pa papia cun’e. Parce nan tin of tabata tin un relacion di pareha cu otro.
E mucha muher special a bisa cu e no kier papia eynan y pa bay otro caminda. Parce Raymond no a gusta masha y a dal’e e pareha den cabez. Esey a pone cu e problema a escala dilanti di mas hende, segun un otro version.
Parce cu e damita no tabata kier a entrega keho. Polis mirando e situacion y e maltrato leve no a mira necesidad pa detencion. E dama no tabata mustra herida. Situacion a calma pero e reaccion di Polis tabata basta pisa mirando e melding.
Kico a pasa den e mangrovenan?
Locual ta straño den e caso aki tabata e gritamento den e mangrovenan. Eynan no tabata tin ningun hende cu lo por a mira kico precis a sosode. Esey solamente e mucha muher special lo por a bisa polis.
Mas cu claro, ora un persona ta testigo di un caso asina ta su deber pa yama polis mesora y sigur ora cu tin arma di candela un persona a saca dilanti di dje.
