Home Hudicial Cinco aña di prison pa homber cu a hinca otro cu cuchiu...

Cinco aña di prison pa homber cu a hinca otro cu cuchiu varios biaha den garganta

155
0
SHARE
Corte di Husticia na Oranjestad.
- Advertisement -

 

ORANJESTAD (AAN): E sospechoso di inicial M.M. di 31 aña di edad, cu su mannan ta zwaai y hopi emociona ta para riba cu ningun momento so el a hinca e homber A. den e cas bandona den Koningstraat riba 9 Augustus 2016.

El a bisa cu e conoce e cas pasobra e tambe ta adicto na droga pero e dia ey mainta e no tabata eynan ora cu A. a worde hinca. Fiscal no ta kere declaracion di M.M. y a exigi 5 aña di prison.

  HINCA DEN NEK:

E sospechoso M.M. a presenta den Corte cu mannan y pianan geboei. Despues miembro di CEA a kita e boeinan di man. Fiscal a bisa cu e acusacion contra M.M. ta cu el a purba mata A. door di hinke varios biaha cu cuchiu na nek. Subsidiario maltrato cu arma. Hues a mustra cu tin diferente potretnan y no sa kico nan ta. Fiscal a splica cu ta potretnan saca na e cas y e arma no a worde haya. Hues a bisa cu anterior caso posponi pa scucha testigonan y awor ta bay trata e caso.

SOSPECHOSO TA DESMENTI:

Hues a puntra M.M. si ta berdad el a hinca A. na su nek. M.M. a desmenti. Hues a puntr’e si e conoce A. El a bisa Hues cu e conoce e homber for di caya. M.M. a bisa Hues cu e dia ey, e mainta, e no tabata eynan.

Testigonan choller: Hues a mustra cu tin testigonan. M.M. a bisa cu e personanan ey ta chollernan cu no sa di nada. Nan a djis declara pa asina nan haya nan libertad. El a bisa cu nan a worde confronta cu un potret di M.M. y tur a bisa cu si.

Cana arma: Hues a puntra M.M. si e ta cana arma. M.M. a bisa cu e ta cana cu cuchiu y e ta peligroso. El a bisa cu si bo bin fresco e ta hinca pero e dia ey e no a hinca e homber A.

M.M. a bisa Hues cu e homber A. tabata drumi y el a bisa cu el a spierta y a worde hinca. M.M. a remarca cu si di berdad A. a lanta of e ta kere cu e tabata lanta. Hues a confronta M.M. cu e testigonan kendenan ta bisa cu M.M. tabatin un cuchiu.

Bira agresivo: M.M. tabata zwaai man y a bisa Hues cu e no a hinca e homber y Hues haci ki carajo cu e kier. Hues a puntr’e pakico nan a declara contra dje. El a bisa cu e no sa. Hues a puntr’e si e ta droga, el a bisa cu e ta un adicto. Hues a remarca si e ta un adicto con e ta corda. M.M. a bisa cu e no a haci nada. Si el a haci’e e lo mester tabatin sanger riba su curpa y esey no tabata e caso. El a bisa Hues haci ki co… bo kier!

Hues a yam’e dilanti pa mira fotonan. Hues a mustr’e e cas y puntr’e si e ta drumi eynan. M.M. a bisa cu e sa bay eynan pero no drumi. El a keda para riba cu e dia ey e no tabata eynan.

Adicto na droga: Hues a puntr’e ki tipo di droga e ta usa. El a bisa tur tipo di droga. El a bisa cu e ta traha bouncer den bar. El a bisa Hues cu e tin cas pero no ta bisa unda e ta bida pasobra Polis ta yega kibra porta drenta y no ta bati porta manera hende drechi.

El a bisa cu for di 16 aña e ta traha y por haci tur tipo di trabao. El a splica Hues cu e ta adicto pero no ta usa droga hopi mas manera tempo e tabata mas jong. El a bisa Hues cu droga no ta atrae mucho mas. El a bisa cu el a bay rehabilita na Santo Domingo.

Hues a bisa cu e tin carchi di castigo. M.M. a reacciona cu esey ta cosnan cu a pasa caba y no bin cu nan awor.

EXIGENCIA FISCAL:

Fiscal a bisa cu A. a bisa cu e tabata drumi den un cas den Koningstraat y diripiente el a lanta door cu el a worde hinca den nek. El a bisa cu el a mira M.M. cu un cuchiu grandi den man. M.M. a grita A. cu e tin su cellular y lo mata A. si no dun’e su cellular back.

Ora A. a bisa cu e no sa di cellular, M.M. a bay. E tabatin 4 hinca. Fiscal a papia di declaracion di miembro di Ambulance pero ni Hues ni abogado no a haya esaki. Fiscal a duna copia pa nan evalua. Fiscal a bisa cu un otro choller a bisa cu el a spierta y mira M.M. y A. para y cu A. tabatin paña na garganta y tabata sangra.

El a duna descripcion di M.M. Un otro muher cu tabata den e cas a bisa cu el a mira M.M. yega riba bicicleta y a bay den un camber pa pone su piedranan pa huma. El a bisa cu el a tende grito y scucha A. bisa “nevermind”. Despues el a mira M.M. cu un cuchiu grandi den man.

Fiscal a mustra cu M.M. a bisa Polis, cu e dia ey e tabata den un otro cas y a menciona tres testigo. Un testigo a bisa cu M.M. tabata cun’e den un cas di choller. Un otro testigo a bisa cu e no conoce M.M. y no sa nada di e hincamento. E otro testigo cu M.M. a menciona no ta existi mes.

Na opinion di Fiscal, a base di declaracion di A. y otro testigonan y e declaracion falso di M.M., e ta haya M.M. culpable di intento di mata. Fiscal a bisa cu ta un milager cu A. ainda ta bibo.

Ta un caso hopi serio. E tin un carchi di castigo cu varios castigo di maltrato. Ultimo castigo ta 4 aña y 6 luna pa atraco cu violencia. Fiscal a bisa cu e ta haya masha laf cu M.M. a ataca A. den su soño. El a exigi 5 aña di prison, kitando e tempo cu M.M. ta sera den KIA.

ABOGADO:

Mr. Andrews a bisa Hues cu M.M. ta para riba cu e no a hinca A. Abogado mr. Andrews no ta haya legalmente proba cu M.M. a hinca. El a mustra cu e choller A. mes a bisa cu el a mira M.M. despues di a worde hinca pero no a mira M.M. hink’e. Tur e otro testigonan ta bisa cu nan a scucha grito y despues a mira M.M. Ningun a mira M.M. a hinca sino cu a mir’e cu un cuchiu grandi.

Mustra cu tin declaracion di dos choller cu M.M. tabata cerca nan y despues a bay. Tin testigo a bisa cu a scucha grito y a mira M.M. pero sin cu cuchiu. M.M. ta haya cu inhustamente e ta worde acusa pasobra ningun hende a mir’e a hinca.

E abogado a mustra cu segun e raport di personal di Ambulance, e patient a worde atende door di un pelea. Esaki ta splica bon cla cu tabatin un pelea y no manera ta pretende cu ta M.M. a hinca.

E abogado ta haya cu no mester kere declaracion di A. E raport di Ambulance ta confirma esaki tambe. Na opinion di abogado, no ta straño cu e chollernan a reconoce e potret di M.M. pasobra nan tur ta usa droga hunto. Ningun a mira cu M.M. a hinca.

El a mustra cu despues di atencion medico, A. a bay cas y no por papia di heridanan serio manera Fiscal ta pretende. E heridanan tabata 1 cm hundo y ta papia cu M.M. tabata cana cu cuchiu di 20 cm.? Esey ta mustra cu tin mucho duda cu ta M.M. a hinca. E ta haya cu mester declara M.M. liber.

Hues a sera tratamento di e caso y a bisa cu 26 April 2017 lo tin sentencia.

 

- Advertisement -

DUNA COMENTARIO

Please enter your comment!
Please enter your name here