ORANJESTAD (AAN) – Parlamentario sra. Clarisca Velasquez kier a expresa den entrevista cu Matutino DIARIO, cu e gobierno na mando a haci un trabao inmenso na bienestar di nos comunidad.
El a señala cu e waf di contenedor na Playa a hiba mas cu 30 aña papiando cu e ta bay muda, y Prome Minister Mike Eman II a finaliza e proyecto aki y a muda nos waf di contenedornan pa Barcadera, y a traha un bunita “container haven” cu awe nos tur por ta orguyoso di dje.
“Nos tin un Green Corridor cu tambe a papia di dje 30 aña y ningun gobierno tabata tin e curashi pa haci esaki posible. Mike Eman II a logra esaki y nos ta den su culminacion, 14 di Augustus ta e fecha cu mester entrega algun trabao y December ta e final di e trabao di Green Corridor”, segun Parlamentario Clarisca Velasquez.
E ta mira cu e schedule ta riba e fecha pa e wordo entrega, segun e Parlamentario.
Otro proyecto cu tin 30 aña ta wordo papia riba dje ta renovacion y ampliacion di Hospital.
“Awe nos ta trahando un hospital di cinco strea cu nos kier pa nos comunidad. Algun luna pasa nos a haci bishita na Hospital y nos a wak cu e proyecto aki ta biniendo cla, cu algun retraso chikito encuanto e ‘intensive care junior’ pero nos ta spera cu nos por keda cla cune pronto pa nos tin un hospital bunita tambe cu nos comunidad merece” e dama parlamentario a subraya.
E culminacion di tur e proyectonan cu tur gobierno a papia di dje sin haci politiqueria cu esaki. Tur e logronan aki ta di Gabinete Mike Eman, segun e Parlamentario. Pa ultimo el a menciona e proyecto Watty Vos Boulevard, como otro logro di cual nan ta hopi orguyoso di dje.
