Home General Conflicto grandi den Parke Arikok ta menaza di hasta bira den un...

Conflicto grandi den Parke Arikok ta menaza di hasta bira den un accion laboral

256
0
SHARE
- Advertisement -

Hefe nobo cu mal impresion…

ORANJESTAD (AAN): Tin un disgusto enorme ta reina e momentonan aki entre trahadornan di Parke Nacional Arikok, y posiblemente Sindicatonan tambe lo bay cay aden, y Gobierno un biaha mas lo tin di bay atende un funcionario cu ta haci cosnan cu ta laga tur hende babuca, y tambe crea discordia, envez cu e mehora e lazo di colegialidad.

Despues cu siman a caba di pasa masha bunita mes, unda por a mira Prinses Beatrix a disfruta di Parke Nacional Arikok, y e ceremonia pa agrega Spaans Lagoen tambe como anexo, awor DIARIO a haya sa cu e trahadornan ya no por mas.

Nan a hasta cuminza boga pa tanto Sindicato SEPPA y tambe Sindicato TOPA bin intermedia y atende e asunto aki.

Den forma di exclusividad, DIARIO a haya sa cu recien Parke Nacional Arikok a bin cu un hefe nobo pa maneha e personal.  Pero ya caba e hoben aki a cuminza saca su huñanan, y ta daña tur hende nan smaak di traha.

Nan ta yame “Chabelita’, y su forma di traha no ta esun di mas corecto.  Por ehemplo, ora e yega trabao e no ta ni duna un saludo di ‘bon dia’, nada.  El a ordena e trahadornan den oficina pa sali di nan oficina, pasobra e lo bay haci cambio y ningun hende tin algo di bise.

Trahadornan di Parke Nacional Arikok a bin descubri, cu e persona aki sin ningun consulta of aviso, a instala un Video-Camera den e asina yama “Ranger Room”, y tin sospecho cu e tin un microfono tambe.  No mag di protesta, pasobra e ta bisa cu e ta manda!  E ta indicando cu ni directiva tin algo di bise.

DIARIO a compronde di e trahadornan, cu na prome instante nan a kere cu directiva ta mandando un hefe pa asina yuda e trahadornan pa tin mihor produccion y colegialidad.  Pero ta net lo contrario ta pasando.  Casi tur trahador tin e impresion cu e hefe femenino nobo ta completamente contra nan.

A bin compronde, cu e hefe nobo aki ta den proceso di busca 5 Manager nobo.  Trahadornan cu tin Parke Nacional Arikok na pecho, tin e temor cu e 5 managernan aki lo bay “usurpa” tur e placa cu nan a yuda produci pa e Parke.

Ya caba tin 3 manager nobo na Parke Nacional Arikok, y trahadornan a keda nada impresiona.  Tin uno cu ta un anciano di Hulanda di riba 70 aña di edad, y nan tin sospecho cu e no tin ni permiso di trabao riba e isla.  Pesey nan ta pidi Sindicato bin duna auxilio.

Tambe tin un manager nobo cu ta supose di duna educacion y haci investigacion, pero pa nan sorpresa, e no sa mes kico ta un mata di Kibrahacha, e no sa unda Boca Prins ta situa, nada!  Asina ta busca managers pa  yuda Parke Nacional Arikok?

E situacion aki ta menaza di sali for di man, y trahadornan ta dispuesto pa pone trabao abao, pa asina e menaza pa e bon ambiente y colegialidad na trabao no wordo destrui.

Nan a traha hopi aña pa a build-up Parke Nacional Arikok den e orguyo cu e ta awe, y no ta husto pa un persona ta yega apenas par di luna y ya caba ta cla pa destrui tur loke Aruba a lucha hopi tempo pa a crea pa ta un joya pa futuro generacion.

 

- Advertisement -

DUNA COMENTARIO

Please enter your comment!
Please enter your name here