Home Comentario Coro di 50, Ensemble special, Solistanan fantastico, lo yena Misa

Coro di 50, Ensemble special, Solistanan fantastico, lo yena Misa

73
0
SHARE
- Advertisement -

Ya ta diaranzon y ami tabata cana rond cu e creencia cu ayera tabata dialuna. Ta bon cu mi no ta birando bieu. Ta mi edad so ta un “tiki” halto. Mi a bin tende di coleganan “hopi hoben” con bruha nan tambe a keda e dianan aki despues di e weekend largo. Nan tambe a lanta mainta bao di pensamento di  “ki dia awe ta?” Esaki ta pasa cu nan tambe y tabata un “consuelo” pa mi cu no ta ami so.

E siman aki mi a tene diasabra, dia 22, na bista. Pakico ? Pasobra e dia aki den misa E Birgen di  Fatima na Dakota pa 7 or anochi lo tin un misa special y sigur lo no tin lugar pa tur hende cu lo atende e misa aki cu lo ta sumamente bunita.

Lagami cuminza reda poco – locual mi no ta gusta haci, segun nan ta kere.  Lo tin un coro di 4 voz y cu ta consisti di mas o menos 50 hende si mi cifra ta corecto. Esaki caba ta un indicacion di e harmonizacion maraviyoso cu por spera.  Lo tin 2 organista y un ensemble di instrumentonan di blaas.

Nan lo canta e asina yama “Misa Brückner” , Binti aña Sr. Roy Sneek a presenta e “misa” aki cu coro grandi den diferente misa di nos isla y Diasabra awor e lo dirigi un coro hopi mas grandi. Na 1977 el a canta den coro durante grabacion di e misa aki cu un orkesta hopi grandi di instrumentonan di cuerde y awe ainda e tin e LP cu a wordo graba.

Diasabra e anochi lo ta di un misa latin den cual lo tin presentacion di varios solista,  cu ta canta Agnus Dei, Benedictus y otronan.

Pero e anochi aki no ta djis un anochi tampoco, pasobra e ta un homenage ademas na e organista Sra. Norma Martijn Stevens  pa su dedicacion di decenas di aña como organista di “Misa di Dakota”, manera sa wordo bisa.

E fecha aki ta cay ademas cu fecha di nacemento di Maestro Roy Sneek cu lo dirigi e ensemble, coro y solistanan.

E preparacion pa e anochi aki no ta cos di awor. For di 8 di januari e grupo completo ta den preparacion pa e misa aki y tur diadomingo por a mira grupo di hende na Centro di Bario Dakota pa ensayonan cu tabata tuma lugar, mientras cu na cas mes Roy tabata ocupa su mes durante siman cu e diferente aspectonan musical y musiconan cu tabata tin mester di cierto guia pa nan repertorio.

Un equipo hopi grandi a traha pa e anochi aki por termina den un exito sumamente grandi y kizas cu hasta peticion pa e wordo ripiti den e diferente misanan rond di nos isla, manera a sosode 20 aña pasa.

Por puntrami con bin Roy a yega asina leu den musica y pa esey tin cu bisa cu esnan cu conoce su curiculo sa di esey y lo kita sombre cada vez cu Roy pasa band’i nan.

Lagami wak un rato bo di e sombre. (“Roy coregi mi si mi ta robez of a faya un caminda!”)

Roy tambe ta un di e chabalitonan cu a cuminza nan carera artistico y musical cu Trupialen y cu despues a bira “un pal’i homber profesional”, manera nos sa bisa cariñosamente pa tur. Roy a drenta Trupialen cu 6 aña di edad y bao direccion di frere Alexius el a siña tambe  con pa canta misa Gregoriano/latin y 3 aña despues, cu 9 aña di edad, e tabata nombra caba como “most outstanding Junior” pa su dedicacion y disciplina .

El a bira e mucha di cada 3 aña pasobra 3 aña despues na edad di 12 aña Roy a cuminza canta den misa, principalmente latin. El a bira teenager y e 3 aña a bira 2 aña, pasobra 2 aña despues  cu el a cuminza canta den misa, cu 14 aña di edad el a cuminza dirigi coro di 2 voz den misa y tabata canta tambe Gregoriano.

Roy a caba scol y dicidi di sigui studia pa onderwijzer y a drenta Kweekschool na Aruba. Mi ta corda ainda con Kweekschool a cuminza algun aña prome cu Roy a drenta, na unda awe tin “Cueva di Mascaruba” cu ta varios di nos musiconan a sinta den bankinan aki.

Durante su periodo na kweekschool  Roy a dirigi e coro mixto di mas o menos 40 miembro cu entre otro misanan, y composicionnan di Beethoven, Mozart, Hayden y Haagh pa menciona algun. Roy a bay Hulanda despues.

Na Arnhem di mas o menos 1974 pa 1978  e tabata dirigi e coro hubenil di St. Janskerk. Ta despues cu e dirigente di Arnhem-Zuid a haya ataca di curazon, un apelacion a wordo haci mes ora riba Roy cu tabata maestro na Maria Regina school na Arnhem-Zuid. El a wordo pidi pa dirigi e coro mixto. E “misa di mey anochi” tambe a bira un exito grandi y termina cu ovasion riba pia.

E tempo ey e tabata tambe miembro di coro mixto di St. Martinuskerk na Arnhem na mes momento cu e tabata dirigente di e coro hubenil na St. Janskerk y e tabata 2e bariton solist; y tabata ademas miembro di coro masculino Gregoriano. Na 1977 el a canta pa e grabacion di misa di Anton Brückner. E aña siguiente na april 1978 Parokia St. jan de Dooper a otorga na Roy Sneek  e certificado conoci como Oorkonde “Ad Majorem Dei Gloriam’ pa su servicionan musical como dirigente y guitarista.

Aki mi no a menciona loke a pasa den e añanan siguiente na Aruba y kico Roy a cumpli cune, pero esey ta keda pa “lagami bisa: mañan”. Su carera ta hopi largo y bunita y no solamente como musico, cantante, dirigente di coro. Tin un variedad di tereno cu Roy tabata y ta activo aden, cu hopi hende no sa y tur kico el a logra. Diasabra e lo ta un “un hoben Veterano di 70” y dirigiendo otro misa importante.

                         Juby Naar

- Advertisement -

DUNA COMENTARIO

Please enter your comment!
Please enter your name here