Home Hudicial Denuncia cu celnan na Warda di Polis Shaba ta inhumano

Denuncia cu celnan na Warda di Polis Shaba ta inhumano

331
1
SHARE
- Advertisement -

ORANJESTAD (AAN): Tabata increibel pa scucha un Arubiano describi e experencia hopi malo cu el a pasa aden durante 10 dia sera den un cel na warda di Polis Shaba. “Toilet geplok, sanguranan ta ataca bo sin clemencia, drumi ariba vloer pa por haya un poco aire, curpa a cria rash”.

Esaki tabata algun di e expresionnan di e persona, kende ta sumamente disgusta pa loke el a mira con e otro presonan den cel ta pasa aden. Un preso ta conciente cu el a haci malo y mester haya castigo. Pero e ta un ser humano mescos cu nos tur y mester haya e trato cu e merece y no worde trata den forma inhumano.

   TA HINCA DOS PRESO DEN CEL DI UN PERSONA

E persona, kende DIARIO ta mantene anonimo, a duna di conoce cu el a defende su mes contra un persona cu a atak’e y el a bay sera pa 10 dia den un cel na Shaba y despues el a worde laga liber. E 10 dianan aki tabata un experencia nunca bisto pa e persona. El a mustra cu tur e celnan ta yen y cu e agentenan di Polis ta abusa di e situacion y ta forza cierto preso pa laga un otro preso keda den e cel, siendo e cel ta pa un persona so.

“Nan a purba cu mi pero ami a nenga”. “Mi abogado a bisa mi cu esey ta inhumano y no acepta ningun otro den cel”.

Baña banda di otro: Door di e abuso di dos den un cel chikito, e persona a mira con un preso ta baña y e otro persona ta para net banda di dje. Un situacion sumamente inhumano.

TOILET GEPLOK

E situacion mas inhygienico tabata e hecho cu e toilet tabata geplok. Ta increibel cu bo mester keda den e holor desagradabel aki.

APENAS TA HAYA AWA PA BEBE

E persona a bisa cu e situacion ta hopi alarmante den e celnan. Ta asina cu tin un empleado di CEA ta trata di 7’or di mainta pa 3’or di atardi. Despues di 3’or di atardi, te su siguiente dia 7’or di mainta, tur esnan sera den e celnan ta den man di e agentenan di Polis, kendenan ora nan ta haya ta bon, ta pasa banda di e celnan y wak con ta cu e presonan. Nan ta keda 2 pa 3 ora sin pasa banda di e celnan y tur e oranan ey, bo mester sufri den tur e calor sin haya awa pa bebe.

A sosode cu e miembro di CEA a bira malo y no a haya reemplasante. Tabata un castigo increibel pasobra ta ora e agentenan kier nan ta bin y ora bo reclama cu bo kier haya un rato aire liber, nan ta bisa cu e presonan ta den man di Ministerio Publico y cu nan no tin tempo. Bo ta keda sera den cel sin haya un rato aire liber.

Ta haci asina calor cu tur e presonan den e celnan no ta drumi riba e pida cama di cement. Nan ta coy e colchon y nan ta bente abao banda di e tralinan di cel pa asina por haya un poco aire.

SANGURANAN TA INSOPORTABEL

Patras di e warda, na e seccion di e celnan, tin un cantidad di auto confisca para cu ta forma un criadero di sangura. Masha hopi sangura ta ataca e presonan den cel. E persona a splica cu door di e calor insoportabel el a hasta haya rash formal na su curpa.

E persona a bisa cu un biaha hendenan a bin pa spuit sangura pero e agentenan a nenga pasobra tin mucho preso sera.

PRESO SERA 35 DIA DEN CEL

E persona a señala cu tin un persona cera 35 dia den un cel na warda di Polis cual ta contra tur regla. Normal, despues di 10 dia e persona mester bay KIA. Ta increibel cu ta laga hende sufri di e forma aki.

SOLUCION PRACTICO

E persona a bisa, kico ta costa Gobierno di djis laga instala algun fan pafor di e celnan cu ta manda biento den e celnan. Laga un otro empleado di CEA core turno pa asina e presonan por haya e atencion cu nan merece. Por laga haci e tereno cu tur e autonan limpi pa alivia e situacion di sanguranan.

Cuminda: DIARIO a puntra e persona con ta para cu e cuminda. A puntra si ta berdad cu ta haya yogurt. E persona a remarca cu NUNCA nan a haya yogurt. El a splica cu mainta bo ta haya un pan seco cu beleg y un copi coffie frieu. Sea e coffie ta bin pata pata di sucu of sin sucu.

E cuminda di merdia ta bon pero atardi atrobe bo ta haya un pan seco cu beleg y thee. E thee ta frieu y sea bo ta hay’e pata pata di sucu of sin sucu.

El a sigui splica cu mainta ta entre 6’or y 8.30 bo ta haya desayuno. Atardi ta entre 5’or y 7’or di anochi. Despues di esey nada mas te su siguiente dia. Si bo tin suerte, por ta e agentenan ta trece un poco awa bo bebe pa calma e calor insoportabel y tur e sanguranan cu ta pica bo.

Increibel e situacion inhumano cu e presonan ta pasa aden. Ta di spera cu Gobierno lo sa di tuma e medidanan menciona pa yega na un solucion practico.

1 COMMENT

  1. Ora bo haci malo si bo no tabatin piedad contra e victima! Awo bo kier bin yora manera mucha chikito. Bira homber y wanta e consecuencianan! Pa mi parti nan bin cu un Alcatraz na Aruba, boso mester haya pan cu awa so pa e resto di boso castigo.

DUNA COMENTARIO

Please enter your comment!
Please enter your name here