ORANJESTAD (AAN) – Dialuna awor, dia 1 di Mei mundo ta celebra e Dia Internacional di Trahador, cu ta representa e Movemento Obrero Mundial.
Ta trata aki di un fecha den cual na mayoria di pais ta wordo realize diferente reivindicacion social y laboral na fabor di e clasnan trahador, fundamentalmente fomenta door di movimentonan sindical, socialista, comunista y hasta anarkista.
For di momento cu e celebracion aki a wordo institui den e mayoria di e paisnan el a bira un dia liber cu pago, segun acuerdo di e Congreso Obrero Socialista di e Segunda Internacional, celebra na Paris, Francia, na 1889.
Te ainda e ta representa un lucha reivindicativo y di homenahe na e martirnan di Chicago. E sindicalistanan cu a wordo ehecuta na Merca door di a participa den movementonan di lucha pa logra ocho ora laboral y cu tabata tin origen den el welga inicia dia 1 di Mei di aña 1886 y su punto culminante tres dia mas laat, dia 4 di Mei, durante e asina yama “revuelta di Haymarket”. For di e momento ey el a bira un movecion reivindicativo di e derechonan di e trahador den sentido general, cual ta wordo celebra nah enter mundo, den algun pais cu mas actividad y entusiasmo cu den otronan.
No obstante tur e lucha cu ta wordo conmemora dialuna, den hopi pais tin hopi inhusticia laboral ta wordo cometi te awendia. E ocho oranan di trabao no ta wordo respeta den diferente sector laboral: sea e trahadornan ta oblige di traha diez of diesdos ora largo, of sea nan ta corta nan oranan laboral na mitad di dia of seis ora pa spaar gasto door di paga menos salario.
Awendia nos ta tende hopi di “esclavitud moderno” y tin motibonan pa esaki. Na Aruba mes, diferente di nos lidernan sindical ta trece dilanti e aspecto aki diferente biaha. Esaki entre otro formanan cu e leynan laboral no ta wordo respeta pa cierto dunadornan di trabao.
DIARIO ta desea un dia di hopi reflexion na tur trahador na Aruba, pero tambe di reconocimento husto, pasobra ta nan tur ta e motor cu ta move nos pais pa bay dilanti, y un di nan sin duda algun ta e sector di turismo, nada mas y nada menos cu nos pilar economico primordial.
