E parti emocional di e hoben tambe ta hunga un rol si e por cay cera bek of no.
“E no ta un aspecto pisa, pero tog nos tin cu wake. Hopi biaha nos ta ripara cu tin hobennan cu un temperamento alza cu no ta tolera hopi cos y nan ta explota masha lihe mes, door di bringa y bira abusivo verbalmente.
“Pasobra si nan tin cosnan paden cu nan no a siña deal cune, e ta sali den un forma di actonan violento manera bringamento riba caya y na scol. Por wak cu e hoben no sa con pa deal cune emocionalmente”, sra. Pemberton a señala.
Den e grupo aki ta bin haya cu mayoria di e hobennan ta na un nivel intelectual un tiki abao. “Nan no ta hobennan down of algo asina, pero nan ta un tiki mas abao intelectualmente anto esey ta pone cu nan ta razona otro, y nan ta pensa y comporta na otro manera cu e otro hobennan. Esey ta haci nan mas vulnerable tambe pa nan wordo influencia pa haci cosnan negativo. Y bo tin cu constata cu esey ta e caso tambe, como parti di bo investigacion, pa asina bo por wak con pa yuda un hoben asina” sra. Pemberton a relata. El a agrega cu si e hoben ta di un nivel intelectual abao, full e proceso e no ta bay compronde tampoco. “E sa cu el a haci algo cu el a cay cera, pero hopi biaha nan no ta link e parti con pa nan cambia nan comportacion of con e proceso hudicial ta hinca den otro. Nan no ta compronde y esey ta haci cu ora nan sali nan ta haci mesun cos pasobra nan no a capta e proceso: pakico a cay cera, kico ta e consecuencia pasobra nan no ta pensa riba consecuencia a largo plazo. Nan no ta compronde cu si nan ta comporta malo y cay cera, e tin consecuencianan no unicamente pa nan mes, pa nan famia y nan futuro. Nan ta pensa pa awe, pa biba pa awe”, sra. Pemberton a subraya. Esaki nan tin cu analiza pa yuda e hoben na e mihor forma.
Mirando tur e informacion y factornan aki, Reclassering por saca un conclusion cuanto ta e chens pa e hoben cay cera of no, pero tambe ta wak e ayudo cu e hoben tin mester.
“Hopi biaha nos ta wak cu no ta un factor so, sino um combinacion di e diferente factornan cu ta haci cu e hoben ta instabil, y no tur biaha, vooral si tin hopi factor combina e ta haci hopi dificil pa duna e hoben e ayudo ambulante pa cual e ta bin cerca nos. Nos por haci tiki cune pa motibo cu e ta bay bek den su ambiente y e factornan no por wordo elimina hunto. Pero si bo sake di su ambiente, traha riba dje riba e parti emocional, su habilidadnan, alehe di amigonan y circulo social negativo cu e tin, drecha e relacion cu su mayornan, e ora ey bo ta stabilize. Pero e ta dificil si e ta na cas”, sra. Pemberton a splica.
UN HOBEN ISOLA: E peligro di mal influencia
Sra. Pemberton a pone como ehemplo un hoben no tabata tin hopi amigo, e tabata wordo poni un banda na scol, e tabata wordo tenta, ningun mucha kier a hunga cune, ora si scoge na scol nunca e tabata wordo scogi, pero na momento cu el a cay cera el a haya hopi amigo, hopi tabata yame, el a bira popular. “Esey pe tabata “wow!” El a cuminza haya amigo. Esaki tambe ta influencia un hoben pa tuma decisionnan incorecto, y el a sigui haya problema cu husticia pasobra asina e tabata haya hopi atencion, el a haya un valor, pasobra amigonan negativo a bin na dje” sra. Pemberton a duna di conoce.
Fundacion Reclassering ta haciendo un analisis di e circulo di amistadnan cu e hoben ta anda cune.
