Home General Dos aña di prison pa homber R. kende a viola mucha muher...

Dos aña di prison pa homber R. kende a viola mucha muher di 13 aña

1605
0
SHARE
Corte di Husticia na Oranjestad.
- Advertisement -

ORANJESTAD (AAN): Fiscal a haya e homber R. culpable di a viola e mucha di 13 aña. Tambe e ta haya cu R. a pone potretnan sunu di e mucha riba facebook y cu el a menaza e mucha. Fiscal a exigi 42 luna di prison di cual 6 luna ta condicional cu un tempo di prueba di 5 aña.

Hues den su sentencia a bisa cu e no ta haya proba cu R. a viola e mucha pero si a haci actonan inmoral y tene relacion sexual. Esaki a haci cu Hues a baha e castigo di 3 aña pa 2 aña di prison cu un tempo di prueba di 3 aña.

EXIGENCIA DI FISCAL

Algun siman pasa, tratamente di e caso aki a tuma lugar caminda Fiscal a baha pisa riba R.

Fiscal a bisa cu e por a compronde cu R. ta admiti di a manda potretnan sunu di e mucha y a menaza riba mailnan. Fiscal a mustra cu R. ta desmenti di tabatin relacion sexual cu e mucha muher di 13 aña.

A viola e mucha: Fiscal ta haya cu tin suficiente prueba cu R. a viola e mucha. El a mustra cu e mucha a declara cu e tabata na cas di R. nan so. Fiscal ta haya cu tin hopi otro detayenan caminda R. mes ta bisa den mail cu el a kibra señorita di e mucha y e mucha mes ta bisa esey tambe. Awor R. ta para riba cu e no a viola e mucha. Fiscal a mustra cu na Hues Comisario R. a bisa cu el a haci’e.

No tabatin relacion mas biaha: Fiscal ta haya legalmente proba e violacion pero Fiscal ta haya cu no tin prueba cu mas biaha lo tabatin relacion sexual cu e mucha. Pesey el a pidi declara liber pa e acusacion cu lo a tene relacion sexual mas biaha cu e mucha.

Potretnan sunu riba facebook: Fiscal a bisa Hues cu e ta haya legalmente proba cu e sospechoso R. a manda potretnan di mucha sunu riba facebook.

Menaza y tacha imagen: Tambe Fiscal ta haya cu R. a menaza e mucha. El a mustra cu tin menaza via whatsapp cu si e mucha no sali cune, e lo publica potretnan di dje sunu. Fiscal ta haya cu R. a tacha e imagen di e mucha.

Mucha kier a mata curpa: Fiscal a bisa cu aki ta un homber grandi ta abusa di un mucha y ta menaza e amigo di e mucha. E sospechoso ta publica potretnan sunu di e mucha. E mucha kier a mata su curpa door di tur esaki pero danki Dios esey no a sosode. E mucha no ta bayendo school y ta bou tratamento.

Fiscal a mustra cu unavez cu e potretnan ta riba internet, ta dificil pa kita nan. E ta haya esaki ta hopi horibel pa e mucha. E no ta kere cu R. a pensa kico e tabata haci.

No completo responsabel: Fiscal a mustra e raport di psycologo ta papia cu R. no ta completo responsabel pa su actonan. Esey ta trece cun’e cu mester reduci e castgo cu normalmente lo a exigi. Psycologo tambe ta conseha pa R. haya tratamento.

Castigo: Fiscal a bisa Hues cu el a reuni cu otro Fiscalnan pa mira kico lo ta e castigo adecuado pa R. El a exigi 42 luna (3 aña y 6 luna) di prison di cual, 6 luna ta condicional cu un tempo di prueba di 5 aña.

Daño per huicio: Pa loke ta e demanda di daño, Fiscal a mustra cu e mama no por menciona un suma y esey ta comprondibel. Sinembargo Fiscal ta kere cu lo por aproba 25 mil florin y e resto lo por haci un caso civil. El a bisa Hues cu Ministerio Publico lo bay percura pa cobra e placa aki.

SENTENCIA

No a viola e mucha: Hues, despues di a studia e caso pa algun siman, a dicta sentencia. Hues a bisa cu e no ta haya legalmente proba cu e sospechoso R. a viola y pesey ta declar’e liber di e acusacion ey.

Actonan inmoral y relacion sexual: Hues ta haya cu e declaracion di e victima, declaracion di sospechoso na Hues Comisario y mensahenan riba whatsapp, ta mustra cu R. a haci actonan inmoral y a tene relacion sexual cu e mucha entre Juni y 22 October 2014. Hues a bisa cu e no ta haya cu ta viola, pasobra R. no a usa violencia.

Manda potretnan sunu y menaza: Pa loke ta menaza y tacha bon nomber, di e amigo di e mucha, Hues no ta haya esaki proba y mester declara R. liber.

Hues si ta haya proba cu a haci actonan inmoral cu un mucha. A manda potretnan di e mucha sunu riba facebook. Ademas a menaza e mucha y tacha su bon nomber.

Tacha integridad di mucha: Pa cu e castigo Hues a bisa cu e ta tene cuenta cu R. a abusa sexual di un mucha muher di 13 aña. Hues ta haya cu R. a tacha integridad di e mucha. Hues a bisa cu tipo di hechonan asina por afecta e mucha den su bida.

Tuma sospechoso na malo: Hues ta haya cu e sospechoso R. tabata pensa riba su deseo y gusto y no tabata pensa riba e consecuencianan pa e mucha. Na opinion di Hues, R. a manda potretnan sunu di e mucha riba medio social y esaki ta afecta e mucha pa hopi tempo.

Hues a bisa cu e ta tuma R. na malo pa esaki. Tambe el a mustra cu R. a manda menaza por escrito y daña nomber di e mucha.

Castigo: Hues a bisa cu tambe e ta tene cuenta cu ta promer biaha cu R. ta cay sera pa un caso asina. Tambe Hues a tene cuenta cu R. no a duna claridad den caso y no ta mira su culpa. Tambe Hues a mustra cu Psycologo ta mustra cu e sospechoso no ta completamente responsabel pa su actonan.

Hues a condena R. na 30 luna di prison di cual 6 luna ta condicional cu un tempo di prueba di 3 aña y bou guia di Reclasering. Esey ta nifica cu R. mester sinta 2 aña di prison mientras cu e 6 luna ta keda pendiente si e bolbe haci algo malo.

 

- Advertisement -

DUNA COMENTARIO

Please enter your comment!
Please enter your name here