Home Comentario E Roy Sneek cu hopi hende no conoce “su fons”

E Roy Sneek cu hopi hende no conoce “su fons”

209
0
SHARE
- Advertisement -

“Mi nunca tabata sa……..”.  “Mi nunca a kere cu …….”  Asina mi por sigui cita expresionnan cu mi a ricibi ayera tocante e relato ayera di e Misa Latin diasabra awor y e musico Bartholomeus  Sotero (Roy) Sneek.

Un di nan tabata:  “mi nunca tabatin ley cu Sneek y semper a pensa: ken e ta kere cu e ta?” Awor a bira cu ta ami mester a puntra mi mes: “ken mi ta pa a huzga Roy?”

E expresionnan a demostra un biaha mas con nos ta huzga hende y despues ta keda sorprendi ora e berdad bin dilanti y cu tur cos ta completamente distinto di kico nan a pensa. Cuanto biaha den mi bida mi no a huzga hende robez ?

Pa mi scapa cara mi lo tin cu bisa cu “no ta hopi biaha. Ta solamente un biaha pa dia” (kizas). Mi no a menciona casi nada di e curiculo di Sr. Roy Sneek.  Nos tur conoce awe como e president di hurado pa e diferente festivalnan di canto of di cancion, pero ta for di tempo el a bolbe Aruba for di Hulanda na finalnan di decada 70 el a wordo pidi caba pa a miembro di hurado. E tempo aya por a haya cu festival di polis, festival di mariachi, festival di cancion mexicano, festival di dande y despues Himno y Bandera, Calypso y Roadmarch, Tumba, ultimo 2 aña cu tumberito, tambe pa Voz I Landia y tur esey den cultura di musica cu ta completamente otro di e latin y gregoriano. Tareanan cu e ta cumpli “pro-deo” demostrando cu e conoce su trabao y tin respet di organizacionnan y individuonan organizador y ademas e ta corecto y no tin favoritismo nunca. Ta net esaki no ta cay bon cera hopi musico y artista pa no keda sin menciona “fanaticonan”. E ta mantene su mes na “criterio pa hurado” y no ta desvia di esaki. (ta pesey e ta fastioso ? cerca hopi ?)

Laga e asunto aki un banda y ban bula mas tecnico. Mas tecnico pa motibo cu Roy in mas di 25 aña ta stem piano. Esaki el a cuminza cune desde cu na principio di decada 90 el a gradua como tecnico di piano na New York. Ago mas di 20 aña pasa el a traha e documentario “Roy Sneek Documentario di un piano-tecnico)” cu ta riba You tube y ainda e ta stem piano. E ta duna tambe les di ukulele (cuarta), locual el a haci tambe na Tele Aruba.  Na Costa Rica na Cinco-Esquinas y na Venezuela cerca Pablo Canela na Barquisimeto el a pasa den un pasantia tocante trahamento y reparacion di guitara y cuarto.

E “otro’ Roy a produci tambe CD cu cancionnan propio cu 35 kleuterleidsters, coro di mucha cu tabata kleuternan di 3 e 5 aña di edad. El a dirigi su lesnan di guitar cu e ta duna riba e cultura antiyano y arubano , ademas e tin diploma di guitarista clasico. Pa por a aregla pa musiconan cu ta toca instrumento di blaas, el a hasta tuma les di blokfluit. El a acompaña den hopi agrupacion musical den Cas di Cultura y presenta tambe como solista.

E ta conoci como gran musico, maestro admira, cu ta exigi hopi disciplina y cu ta completamente contra manipulacion, fraude  corupcion y tur esaki hunto cu otro cualidadnan social cu e tin, a haci cu el a wordo condecora tambe como Ridder in de Orde van Oranje.

Cual ta e cualidadnan social? Fuera di dunamento di les na kleuter, basis, MAVO, HAVO na colegio unda les di musica tabata su zjilea, el a duna les na scol Montessori na Arnhem y e ciudad chikito Tytyl cerca di Eindhoven. Na e ultimo aki ta unda el a topa cu Sr. Hermans cu tabata director di Emma School.

Hopi di decada 60 y 70 por corda ainda riba Meneer Pepels cu su pipa cu tabata gymleraar di Kweekschool y despues Colegio Arubano y cera dje Roy a atleta y participa den caredanan local y interland. Na Hulanda e tabata hunga ping pong pa Giro Team na Arnhem 1ste divisie y ta hungador ferviente di ajedrez. Ademas di “check” hungadornan den schaak,  pa 20 aña e no por a laga su Old Par, locual hopi no sa di dje.

No ta cu e tabata un alcohlista y bebedor di Old Par!!  No…!

Pa 20 aña e tabata president di e equipo di Domino Old Par y ta e unico hungador cu tin 24 campeonato riba su nomber y ademas e unico cu tres titulo di campeon internacional hunga na Corsou, Bonaire, St. Maarten, Panama, Sto. Domingo , Puerto Rico , y Merca.

Roy semper tabata un bon lider y cu hopi talento organizador y esey ta haci cu tin biaha esnan cu no ta mantene nan mes na regla, no ta keda contento cune ora e pone nan na nan lugar.

Awe ainda e ta un ciclista, si mi kier yam’e asina. E ta gusta core bicicleta y haci su ehercicionan fisico. Su terapia ta “Baile” locual e ta haci regularmente y no mag lubida cu e tabata welp di grupo di Padvinder Baden Powel. Esaki a pone tambe cu el a ocupa su mes hopi aña cu actividadnan di campamento cu SKA (Stichting Kindervakantiewerk  Aruba y durante vacasion largo (grootvakantie) ta hopi mucha tabata bao su encargo y semper el a percura pa esnan di famianan di menos recurso prome.

E ta bira un “SeventyAger”  diasabra cu e ta dirigi tambe e Misa latin/gregoriano den Misa la birgen di Fatima na Dakota pa 7 or anochi y manera mi a menciona 3 dia pasa “esaki lo bira un misa hopi bunita” cu coro grandi y cu un ensemble musical di calidad y cu solistanan  grandi.

Un hende a bisami cu Roy lo a expresa: “Bo sa, nunca un hende a skirbi asina positivo di mi!” Wel pa Roy su informacion; “ainda mi no a skirbi e berdad mes. Ta florea mi a florea poco”, pero si tur cos bay segun plan, aki 30 aña e lo tin: “Continuacion di April   ………”

                         Juby Naar

- Advertisement -

DUNA COMENTARIO

Please enter your comment!
Please enter your name here