ORANJESTAD (AAN): E ‘trend’ cu ta alarmante den e di dos parti di e decada aki, ta suficiente pa preocupa lidernan sindical local.
Hopi tempo caba DIARIO ta haya reclamo di varios trahador, cu nan ta sinti cu tur caminda companianan ta viola ley laboral. Pero ningun hende ta lanta para pa defende nan. Ni Ministro, tampoco Departamento di Labor.
Sindicato FTA no ta sorprendi cu e observacion aki. Nan ta splica cu Aruba tin hopi ley cu ta worde viola, y e ta bay man den man cu abuso sin fin di e clase trahador riba e isla. Companianan den tur sector ta tuma un actitud anti-sindical tambe.
Segun President di Sindicato FTA, Hubert Dirksz, nan ta mira e actitud aki tur caminda, hasta na FCCA, cu pa colmo ta un fundacion.
Tin lugar unda e negociacion pa CAO ta hopi fuerte, y bo ta mira cu nan ta tuma un postura anti-Sindicato.
Segun Hubert Dirksz, lo mas sorprendente ta cu e ta pasa na Aruba na man di doñonan di trabao Arubiano! “Di hendenan local, comerciantenan cu bo ta spera miho, cu supuestamente ta hendenan prominente cu lo kier Aruba bon, pero nan tin un posicion anti sindical totalmente y ta increibel,” Dirksz a bisa.
Loke ta pasando na Aruba ta insolito, pero segun Dirksz, e ta convenci cu si na Aruba tur e instancianan oficial ta haci nan trabao, si acaso e Departamento di Gobierno ta haci nan trabao (pa inspecciona kico ta pasa na pia di trabao na prome luga), nan lo a evita hopi problema y multa mester cay.
Dirksz a splica cu ora personal di Warda nos Costa ta yega na un empresa enbusca di trahador ilegal… ya prome cu e yega, ya e trahadornan sa caba y tur ta bay sconde y esey no ta bon.
E president di FTA ta spera cu seriedad por cuminza prevalece. Aparentemente di paden mes ta stroba cu inspeccion no ta tuma lugar. Y pesey ilegalidad ta sigui haya un rumbo cu no ta deseable. No por permiti ilegalidad sigui na e forma cu e ta bay.
Pa Dirksz, awor cu ta yegando cerca di Dia di Obrero, e ta kere cu Pueblo mester reflexiona y e trahado mester reconoce e importancia di sindicato. E forsa di e sindicato ta e forsa di e trahado conciente. Sigur cu un trahado conciente cu ta lanta para, e por pone tambe Gobierno y dunado di trabao respeta.
