ORANJESTAD (AAN): Manera DIARIO a publica, Diabierna mainta e dos sospechosonan di e lamentable asalto arma caminda a mata un dama Chines a presenta den Corte. Ta trata aki di e Chines P.F. y e Boneiriano J.E. Tratamento di e caso no a sigui pasobra ayera tabata un reunion pa Hues y abogadonan haya sa con leu ta cu e investigacionnan. Fiscal a bisa cu ainda falta algun investigacion.
Den sala di Corte por a mi e casa di e dama Chines hunto cu su yiu homber y algun familiar. Tambe por a mira familiarnan di e sospechoso P.F., cu ta famia tambe di e victima cu a mata.
ASALTO ARMA FATAL
E acusacion cu Fiscal a presenta na Januari 2017 contra P.F. y J.E. ta cu hunto riba 13 September 2016, a tira mata e dama Chines durante un asalto arma na Wayaca. Fiscal a mustra cu a tira e dama Chines den cabez, mientras cu a herida e casa tambe. Nan a bay cu un suma di placa, un cadena, telefonnan y un auto.
Ademas Fiscal a acusa nan di a purba mata e casa y e yiu homber. A tira den direccion di nan curpa. Esun cu a tira tabata J.E.
Fiscal a bisa cu ademas P.F. ta wordo acusa di ta complice di a suministra informacion y a planea e asalto arma.
FALTA INVESTIGACION
Ayera mainta Fiscal a splica Hues y e abogadonan, cu e procesverbaal oficial ta cla pero ainda mester laga spychiater evalua e sospechoso Boneiriano J.E. Tambe tin algun investigacion cu mester haci entre otro riba e rutanan cu sospechosonan a core y tambe check e yamadanan riba cellular cu nan a haci. Tambe ainda mester traha riba e declaracion di e sospechoso Chines P.F. a base di interogacion cu a haci ultimo. Fiscal a bisa cu tur esakinan lo bin acerca di e procesverbaal oficial.
Fiscal a bisa cu te cu Juni tin casonan geschedule. El a bisa 23 Juni lo ta ideal. Hues a reacciona cu e dia ey, e no tin turno pa tratamento di casonan penal y cu e mes tin cu atende e caso.
ABOGADONAN KIER INVESTIGACION
Hues a puntra e abogadonan si a base di loke Fiscal a bisa, nan ta desea algun invesigacion. Mr. Lejuez a pidi pa laga psycologo evalua su cliente, e sospechoso Chines P.F. Segun e abogado, su cliente ta dispuesto coopera cu esaki. Despues lo mira si lo mester laga psychiater tambe evalua. Tambe e abogado a pidi pa un traductor Chines.
Mr. Carlo a bisa Hues cu mr. Illes ta asisti’e den e caso aki, caminda nan ta representa e Boneiriano J.E. El a bisa cu promer cu a pospone e caso na Januari 2017, el a pidi pa evalua e direccion di tironan. E kier pa esaki tuma lugar ainda. Segun e abogado, tin potretnan saca pero no ta mucha cla con e impactonan di balanan ta.
E abogado tambe a bisa cu tin interogacionnan audio y e ta desea di haya esnan di su cliente. Motibo pa esaki ta pasobra el a confronta su cliente cu cierto di su declaracion y e cliente ta bisa cu e no a declara asina.
Fiscal a bisa cu no tin problema pa psycologo evalua P.F. Pa loke ta e peticion di direccion di bala, Fiscal a splica cu door cu e glas di e porta a kibra, no por determina direccion di tiro. E sospechoso mes a bisa cu el a kibra e glas cu loop di e revolver.
Abogado ta pidi pa traha un procesverbaal cu ta splica pakico no por determina e direccion di tiro. E ta haya cu mester tin potretnan bon di impacto di bala. Fiscal a splica cu tin un buraco den e glas door di cual despues a tira y ta dificil pa tin un imagen di impacto di e bala. El a keda di check cual potretnan mas di impacto di bala tin y lo manda pa e abogado.
Hues a bisa cu dia 30 di Juni 2017 e tin tur y e ta pospone e caso pa dia 30 Juni pa 9’or di mainta.
