Home Economia Fitch a duna Aruba rating di BBB- y pues ta keda stabil

Fitch a duna Aruba rating di BBB- y pues ta keda stabil

149
0
SHARE
- Advertisement -

ORANJESTAD (AAN): Diamars ultimo e agencia internacional di ‘ratings’, esta Fitch a publica e ‘rating’ di pais Aruba. Minister di finanza, Angel Bermudez ta hopi satisfecho cu e rating aki di ‘BBB-‘, pues esaki ta nifica cu a logra mantene e rating y cu Aruba su desaroyo keto bay ta uno stabil.

Algun siman atras e expertonan di Fitch tabata di bishita na Aruba pa asina tuma nota di tur e actividadnan economico y reuni cu tur e instancianan concerni pa haci un evaluacion un biaha mas. Segun e mandatario di finanza, a pone enfasis riba e actividadnan economico di ATA y tambe di e refineria

“Tanten cu e actividadnan aki ta andando nos lo keda riba e rating aki. Asina cu nos turismo haya mas refuerso y e refineria worde reactiva y duna e frutonan cu nos tur ta premira pa cu e inversionnan aki, sigur lo duna un empuhe cu nos rating cu e lo sigui subi”, Minister Bermudez a bisa.

E mandatario ta sigui splica cu na momento cu drenta mercado internacional financiero pa busca refinanciamento pa nos debenan cu ta worde cancela tur aña, cu e frutonan aki nos por keda mantene un tasa di interes rasonabel cu primanan di siguridad y riesgo mas abou posibel.

Den e rapport, Fitch a tuma nota cu e aña aki ta uno di eleccion, sin embargo no a mira mucho obstaculo pa cu esaki. Si a keda constata cu e ultimo dos añanan tabatin un crecemento minimo economicamente. Segun Minister Bermudez esaki tambe a keda afecta pa motibo di e maneho di austeridad di e ultimo añanan pa domina y maneha e gastonan pa asina logra un reduccion di e deficit riba nos presupuestonan.

Pa e motibo aki mes, e mandatario ta indica cu e ta sumamente importante cu nos pilar economico di turismo mester sigui opera optimalmente. Na mes momento, ta esencial cu e actividadnan di Citgo tambe por keda realisa, pues e instalacionnan lo funciona como un ‘upgrader’ segun Minister Bermudez.

Esaki ta haci cu no solamente lo crea mas empleo adicional pero tambe cu Aruba lo haya mas entrada directo y indirecto pa caha di Gobierno. “Di e forma aki nos ta logra tambe mantene e maneho aki di domina e gastonan y cu consecuentemente nos por domina e deficit den añanan benidero. Asina cu esaki transforma den un surplus, nos por cuminsa cana riba e trayecto pa cuminsa mengua y reduci e debe nacional tambe”, e mandatario a splica.

 

- Advertisement -

DUNA COMENTARIO

Please enter your comment!
Please enter your name here