Home Politica Intento fracasa di oposicion pa bin cu mocion di desconfianza contra Minister...

Intento fracasa di oposicion pa bin cu mocion di desconfianza contra Minister Dowers

244
0
SHARE
- Advertisement -

ORANJESTAD(AAN): Diamars mainta Parlamento a trata den un reunion publico riba peticion di partidonan di oposicion, un reunion cu Minister di Husticia Arthur Dowers caminda na final di cuenta, e di tantisimo reunion riba criminalidad, no a produci algo nobo, algo cu por sirbi den e lucha contra criminalidad.

A keda demostra un biaha mas den forma bon cla, cu oposicion ta yama e tipo di reunionnan publico aki, pa haci propaganda politico ya cu apesar di a hiba palabra pa asina hopi tempo, ningun momento un solo miembro di oposicion por a presenta na Minister di Husticia, un sugerencia of un plan concreto cual lo por a yuda den e esencia di e topico cu a worde trata.

E tipo di reunionnan aki a bin ta caracterisa oposicion den ultimo añanan, caminda pa falta di argumento valido, of un vision concreto di kico ta nan propio pensamento, ta uza e tempo aki pa haci politica barata sin duna un aporte adecuado y efectivo na henter e lucha contra criminalidad.

Minister Arthur Dowers a mustra tambe cu e no ta cay den e wega politico di oposicion, cu ya caba a yama asina hopi reunion riba criminalidad y ta haci mesun preguntanan sin cu esakinan tin un influencia directo riba e lucha cu tin cu ser hiba.

Manera a worde anticipa e tres partidonan di oposicion a presenta un mocion di desconfianza un biaha mas contra di Minister Dowers ya cu den pasado ya caba nan a haci esaki sin resultado sigur mirando e reconocimento cu e Minister tin den Reino Hulandes pa su maneho.

E weganan politico cu ta ser hunga pa oposicion cu e tipo di reunionnan aki ta muestra cu ainda partidonan di oposicion no por haya un solo topico cu cual nan por combati e popularidad di Gobierno di AVP, ya cu argumentonan cu durante gobernacion di MEP e situacion tabata diferente, Minister a mustra ayera mainta cu for di tempo cu MEP a worde baha pa pueblo na 2009, Gobierno di AVP a inverti un suma di 60 miyon adicional den husticia pa atende cu necesidadnan cu tin.

Minister Dowers despues di e prome buelta a contesta preguntanan haci pero e mandatario a mustra cu tin di e preguntanan aki ta mesun cosnan cu parlamentarionan di oposicion a haci den pasado durante otro reunionnan cu a tuma luga.

Algun miembro di oposicion hasta no tabata den sala di reunion na momento cu Minister Dowers a cuminsa duna contesta riba nan pregunta loke a pone cu nan a dicidi di reclama esaki caminda e mandatario a mustra cu simplemente nan no a mustra interes pa nan propio preguntanan.

Henter e desaroyo relaciona cu Minister Paul Croes tambe a worde treci dilanti pa varios miembro di oposicion y aki Minister di Husticia corectamente a mustra cu e no ta atende cu cartera di otro minister mientras cu tin un proceso andando caminda e no tin nocion di loke ta pasando den e proceso aki.

Na final di dia e mocion di desconfianza a worde bari for di mesa pa fraccion di AVP ya cu realmente tabata un mocion carga di propaganda politico di politiconan di oposicion cu ya no sa na unda nan trata di gana confianza di pueblo.

 

 

- Advertisement -

DUNA COMENTARIO

Please enter your comment!
Please enter your name here