ORANJESTAD (AAN): Segun Jacky van Putten di partido POR, awe nos tin un San Nicolas cu a wordo forma y maneha door di e dos diferente gobierno desde 1986. Nos infrastructura y economia a wordo determina door di maneho integral di partidonan geel y berde.
Awe e ta loke e ta danki na e diferente signatura di gobiernonan. Si awe bo sali cu bo famia y dal un rond na Aruba bo lo ripara con nos isla a desaroya na Noord , Paradera , Piedra Plat y Santa Cruz a conoce un mehoracion remacabel den infrastuctura y economia. Representantenan den gobierno cu ta di e areanan ey a percura cu nan districtonan a haya e debido atencion y adelanto na unda e bario completo a probecha.
San Nicolas na su turno tambe a haya e atencion di nos representantenan y e ta loke e ta awo. E Plataforma politico E Forsa Nobo tambe ta reconoce e importancia di San Nicolas y su desaroyo. Un districto cu diversidad di cultura , imigrantenan di tur isla di Caribe cu a bin duna nos un ayudo economico y a concentra den e area industrial. Un sociedad unico na unda e forsa semper tabata den e raisisnan comun y cultura colorido.
E plataforma pa e motibo aki ta pone masha halto riba nan programacion di maneho e continuidad den e desaroyo den e area aki y a concentra riba atrae candidatonan cu tin un curason y amor pa mira un desaroyo positivo y continuo na San Nicolas.
Candidatonan cu a crece y core den e cayanan di San Nicolas y sa e importancia di nan bario cu ta Curtis Fraser, Alan Howell. Rose-Ann Didder y mi persona Jacky Ponson van Putten a tuma e reto pa representa nos pueblo en general y specificamente pa percura cu e atencion debido lo wordo duna na San Nicolas.
Nos lo para pa un desaroyo duradero cu lo beneficia tur habitante di San Nicolas. E cultural heritage city mester continua. Deporte mester bira un prioridad atrobe, educacion y cultura/ musica mester bira esencial.
Mester atrae comercio cu incentivonan atractivo pa asina por tin un shift den e centro di financia di Aruba. POR tin e capacidad y mas cu tur e boluntad pa asina mira un miho Aruba y un San Nicolas progresivo.
