Home Turismo Minister Arthur Dowers: Ta bay tuma paso contra esnan cu no ta...

Minister Arthur Dowers: Ta bay tuma paso contra esnan cu no ta cumpli cu reglamentacion pa duna servicio den beach

92
0
SHARE
- Advertisement -

ORANJESTAD (AAN) – Minister di Husticia mr. Arthur Dowers a declara den entrevista cu Matutino DIARIO, cu e siman cu a pasa e tabata tin reunion cu Camara di Comercio y Industria, ATIA y AHATA, y e representantenan di hotel a duna di conoce durante e encuentro aki, cu nan ta haya indeseable e comportacion di cierto hendenan riba beach.

E dignatario a menciona cu despues di basta tempo un “beach policy” a wordo introduci, cual e tin entendi cu ta basta complica den su implementacion, y tin hopi disputa legal andando, na e momentonan aki, sinembargo e discusionnan aki a wordo soluciona y no ta stroba orden publico.

Segun e minister pa motibo cu tin otro combersacionnan bao di personanan cu pa motibo cu nan a reglamenta y cu mester uza un area mas chikito, nan ta uza teritorio di otro hende y hasta ta genera discusion riba beach.

Minister Dowers a duna di conoce cu nan a palabra cu dentro di dos siman ta bay un carta pa esnan cu ta haci uso di beachnan den cual ta splica nan kico ta loke nan mester cumpli cune, aunke tin hende cu si a cumpli cu e stipulacionnan.

Tur hende concerni mester cumpli cu loke a keda palabra y tambe, banda di esey, nan mester tene nan mes na e reglanan cu a wordo stipula.

Esnan cu no kier haci esaki mester bandona e beach y nan lo wordo informa door di e Departamento di Infrastructura, y si nan no cumpli cu esaki orden lo bin pa nan wordo desaloha for di e teritorio ey.

E dignatario ta asumi cu tur persona cu ta participando di e funcionamento aki ta hende di bon boluntad, cu nan tur kier pa esaki cana di manera ordena pa duna un bon servicio na beach, y cu e hendenan tambe por move liber riba beach pasobra esaki ta keda un tereno publico di pais Aruba.

E mandatario a duna di conoce cu e intencion ta pa e bin hunto atrobe cu e instancianan menciona, den dos siman y tambe cu Minister di Infrastructura y Minister di Turismo, pa evalua e efectonan di e pasonan cu a wordo tuma, y wak ken ta esnan cu ta cumpli of no ta cumpli cu e stipulacionnan cu a wordo haci pa Minister di Infrastructura. Despues lo bay over pa tuma pasonan adicional, segun minister Dowers a subraya.

Minister Dowers a splica cu tin di e personanan aki cu no a ni paga pa nan vergunning. Aworaki nan ta bay haya un chens pa haci esaki, y pa nan atene na e teritorio cu nan a haya pa haci uso di dje y si nan ta cumpli cu e otro rekisitonan.

Si nan no ta cumpli cu e vergunning nan lo wordo desaloha door di polis si nan lo no hacie boluntariamente. E minister a reitera cu gobierno no por tolera e situacion aki mas pasobra e ta bay contra orden publico pero tambe e ta un riesgo pa seguridad pero ademas ta duna un mal imagen pa Aruba. Ya nan tabata tin un periodo di seis luna pa cumpli cu e aspectonan basiso y aworaki a haya dos siman mas, e mandatario a reitera. Ora nan cumpli cu e aspectonan basico gobierno lo bay wak e demas aspecto. Gobierno ta bay facilita tambe e trabao di control y tur instancia concerni ta entusiasma cu e colaboracion nobo cu tin aworaki, cu lo duna como resultado cu lo haci nos bista mas ordena y tambe mas placentero pa nos bishitantenan y nos hendenan local.

- Advertisement -

DUNA COMENTARIO

Please enter your comment!
Please enter your name here