Home Politica Minister di infrastructura mester ta sincero y bisa cu no tin mil...

Minister di infrastructura mester ta sincero y bisa cu no tin mil tereno cla pa otorga

260
0
SHARE
- Advertisement -

ORANJESTAD (AAN)—Den conferencia di prensa di Partido POR e Plataforma Forza Nobo, Parlamentario drs. Marisol Lopez-Tromp a agrega mas na e tema di stimula nos economia, cu su coleganan di Partido sr. Otmar Oduber y mr. Andin Bikker a toca prome.

Drs. Lopez-Tromp a señala cu berdad ta asina cu pa stimula nos economia no por ta asina cu tin verkavelingsplan ni bouwverguningnan pega na Departamento di Gobierno.

“Pero tambe ta asina cu e procedimentonan mester ta bon in place pa percura pa ciudadanonan cu ta cana rond cu peticionnan den nan man, cual ta nan derecho y yega na un propio hogar, cu tin un procedimento transparente y cla pa sigura cu nan por yega un dia na nan propio cas”, drs. Marisol Lopez-Tromp a señala.

E motibo pa cual el a bisa esaki ta cu den prensa nan por a tuma nota cu Minister di Infrastructura a anuncia cu e lo tin, aparentemente, mil tereno cla pa bay otorga.

“Den e halturanan aki, aworaki na fin di casi ocho aña di gobernacion, diripiente a bin cu un maneho nobo. Despues di ocho aña, e maneho nobo aki, aparentemente ta encera cu e ta pidiendo banconan yude, pa acelera pa saca cierto carta pa yuda asina cu ciudadanonan cu tin peticion den man por bay Departamento di Infrastructura y Planificacion, y asina ey por yega na un tereno pa traha nan cas”, drs. Lopez-Tromp a señala.

E dama a agrega cu e dignatario ta pidiendo e banconan, segun su propio publicacionnan, no solamente pa acelera e proceso pero tambe pa no controla ni investiga e ciudadanonan aki nan situacion financiero mucho.

“No bay check si nan tin e fortaleza financiero pero pa coopera cune pa tin un proceso mucho mas lihe pa otorga e mil terenonan aki”, drs. Lopez-Tromp a subraya.

Pa aclarea e informacion aki, Lopez-Tromp a señala cu claro cu POR kier pa tur ciudadano yega na nan hogar y nan cas, pero e minister mester ta sincero si y bisa cu e no tin e mil terenonan aki cla pa otorga y tambe, cu den e caso aki, pidiendo e banconan coopera pa acelera e proceso, e meta lo mester ta netamente pa tin un bon control pa percura y garantiza na e ciudadano aki, cu tin su peticion den man pa yega na su cas un dia, cu e por tin e fortaleza financiero pa e por haya un hipoteca y por haci su fianzanan pa por construi e cas aki tambe.

“Momento cu e minister ta bisa no investiga mucho, no investiga, ban pura cu esaki pasobra mi ta casi na yega na fin di mi periodo, bo no por ta serio nunca. Kico ta e consecuencia? Cu bo ta haya ciudadanonan mañan, cu un papel den man, cu na e momento ey sea e no ta haya un fianza, y e ta para cu un tereno cu e por haya como consecuencia cu e construccion tan desea pa yega na un cas, no ta tuma lugar”, Parlamentario drs. Lopez-Tromp a subraya.

Consecuentemente ta bay haya cu terenonan bashi cu ta bira dump pa autonan bieu, pa bota sushi ilegal, y por ta hasta cu ciudadanonan cu den nan desesperacion ta bay over hasta bende terenonan cu nan tin cu nan a haya di gobierno, locual ta trece speculacion cu no ta loke gobierno ta desea.

“Mi ta trece e puntonan aki pasobra si enberdad e minister kier stimula e economia, mester ta sincero y trece un procedimento transparente y hopi cla den su departamentonan. Un proceso cu ta skirbi y cu nos tur por controla y sa kico e ta, y cu no ta asina cu e depende ki color di partido bo tin, of ken bo ta, cu bo ta haya un firma ‘accord conform advies’. Ta importante tambe pa bisa cu naturalmente no ta tur famia tin e fortaleza financiero pa yega na un cas, pero como gobernante bo tin e deber di traha cas social pa nos hendenan. Ta pesey bo tin un F.C.C.A”, drs. Marisol Lopez-Tromp a señala.

E meta di e fundacion aki ta percura pa semper nos hendenan yega na nan propio vivienda y muy en particular esnan vulnerable, pa duna nan un man pa yega na un cas social.

- Advertisement -

DUNA COMENTARIO

Please enter your comment!
Please enter your name here