Home Remitido Pensando pa subi lista?

Pensando pa subi lista?

22
0
SHARE
- Advertisement -

Remitido:

Tur ora cu e resultado di un eleccion bira conoci tin candidatonan y sigur tambe algun di nan “friends and families” cu no ta keda contento y por bisa te hasta cu nan ta rabia cu nan partido político.  E PAKICO ta sinta den e hecho cu sa pasa cu candidatonan cu MENOS VOTO, pero MAS HALTO riba lista , si ta keda eligi como Parlamentario mientras cu otro candidatonan cu MAS VOTO , pero MAS ABAO riba lista no ta bira Parlamentario.

Un splicacion detaya , PROME CU ELECCION , pa candidatonan y nan “friends and families” sa con “HOOFDSTEMBUREAU” , segun ley , ta calcula/indica cua candidato riba lista ta bira Parlamentario, TA NA SU LUGA pa no bin rabiamento despues cu partido ora resultado di eleccion bira conoci.

Hoofdstembureau den prome instante ,segun ley, ta determina a base di e total cantidad di voto di cada partido/lista, cuanto asiento (di e 21 nan) cada partido/lista ta haya den Parlamento. Despues di e fase aki hoofdstembureau ta bai pa e di dos fase caminda ta calcula/indica cua candidato di cada lista ta keda eligi como Parlamentario.

Si nos tuma como ehempel e cifranan di eleccion 2013 , por constata cu den prome fase hoofdstembureau a determina cu AVP a logra 13 asiento , MEP a logra 7 asiento y PDR  a logra 1 asiento den Parlamento.

Despues pa indica cua candidato di un lista ta bira Parlamentario ,  hoofdstembureau ta aplica ley y ta dividi ,di e lista di AVP, e total cantidad di voto cu ta  33.103 (=  “stemcijfer”)  pa  13 ( =  cantidad di asiento) cu ta duna 2546 ( =  “lijstkiesdeler” di AVP) , tambe pa e lista di MEP ta haci mescos y ta dividi 17653 (=  “stemcijfer”)  pa 7 (=  cantidad di asiento) cu ta duna 2521 ( =  “lijstkiesdeler” di MEP) y tambe pa e lista di PDR ta haci mescos y ta dividi 4518 ( =  “stemcijfer”) pa 1 (= cantidad di asiento) cu ta duna 4518 ( = “lijstkiesdeler” di PDR ).

Hoofdstembureau mester di e “lijstkiesdeler” di cada lista pasobra e candidatonan di cada lista cu logra e cantidad di voto igual na e “lijstkiesdeler” di nan lista ta keda eligi ,ya den prome instante, como Parlamentario .

PERO un PERO, HOPI GRANDI, ta e articulo 94 inciso 2 cu ta bisa cu mester pasa votonan , di  un candidato (A) pa un otro candidato (B) ora e candidato (A) haya mas voto cu e “lijstkiesdeler” di e lista y candidato (B) haya menos voto cu e “lijstkiesdeler” di e lista. No solamente e secuencia (number) riba lista pero tambe e pasamento di voto aki , di un candidato pa un otro candidato di e mesun lista , ta loke ta ocasiona e disgusto/rabia entre e candidatonan y entre nan “friends and families”, pasobra asina algun candidato (privilegia cu puesto halto riba lista) ta bira Parlamentario cu votonan di otro candidato.

Pa determina cuanto voto un candidato a haya , ley ta stipula den articulo 94 inciso 2  cu prome cos cu mester haci cu cada lista, ta pasa e cantidad di voto cu un candidato (A) a haya mas  cu e “lijstkiesdeler”, pa un otro candidato (B) cu a haya un cantidad di voto menos cu e “lijstkiesdeler” .

Ora , por ehempel , candidato number uno di un lista haya 8222 voto y e “lijstkiesdeler” di e lista ta 2546, e cantidad di voto cu ta pasa pa e siguiente candidato(nan)  ta  8222 kita 2546 , ta keda 5676 voto cu lo wordo pasa pa otro candidato(nan) riba lista cu no a logra e “lijstkiesdeler”.  Di e manera aki ta calcula di tur candidato cu a haya mas voto cu e  “lijstkiesdeler”, cuanto voto ta pasa , SIGUIENDO E SECUENCIA RIBA LISTA , pa e otro candidatonan cu no a logra e cantidad di voto  igual na e “lijstkiesdeler”.

Ora caba di pasa tur e votonan di un candidato pa otro candidato , tur candidato cu keda cu e cantidad di voto igual na e “lijstkiesdeler”di e lista di nan partido ta keda considera di ta eligi como Parlamentario.

Di e lista di 2013 cu a tuma como ehempel ta tres candidato so a haya mas voto cu e “lijstkiesdeler” di nan lista. Hunto e tres candidatonan aki esta number 1 , number 2 y number 4 a haya 8424 voto mas cu ta necesario pa nan mes keda eligi como  Parlamentario.  E 8424  votonan aki a wordo pasa , segun articulo 94  inciso 2  y  siguiendo e secuencia di e lista, pa e candidatonan number 3 , number 5, number 6, number 7, number 8, number 9 y number 10  como cu e candidatonan aki mes no a haya suficiente votonan personal pa yega  e cantidad di e “lijstkiesdeler” cu ta necesario pa  bira Parlamentario.  Asina ta yena 10 (3 + 7) di e 13 asientonan cu e lista a saca pa Parlamento. Ta keda falta 3 candidato pa yena e 3 asientonan cu falta.  Pa yena e 3 asientonan cu falta ta aplica e siguiente articulo cu ta articulo 95 inciso 1 y inciso 2 .

Articulo 95 inciso 1 ta indica cu un candidato cu haya mas cu mitar di e cantidad di votonan di e “lijstkiesdeler” di su lista ta keda eligi como Parlamentario. E unico candidato di e lista , en cuestion, cu a logra esey ta e candidato number 29 di e lista. E caso aki ta conoci cu e palabranan : keda eligi cu “voorkeurstemmen”(votonan preferencial).  Pa scoge e  2 candidatonan cu finalmente ta keda falta ainda pa yena  e ultimo 2 asientonan , ta aplica articulo 95 inciso 2, cu ta indica cu di e candidatonan cu no a keda eligi ainda ta scoge e candidatonan cu ta bin na beurt segun secuencia di e lista. Loke den e caso aki ta e candidatonan number 11 y number 12 di e lista en cuestion.

Recapitulando por yega na e conclusion cu den e caso aki ta 3 candidato so a keda eligi cu nan mesun votonan personal , 7 candidato a keda eligi , pa motibo di nan secuencia riba lista, cu ayudo di votonan di otro candidato , 1 candidato a keda eligi cu votonan preferencial y 2 candidato a keda eligi exclusivamente a base di nan secuencia riba lista.

Cada persona cu lesa e articulo aki por forma su mesun opinion y saca su mesun conclusion ora di husga si e actual forma di reparti asiento pa Parlamento di Aruba ta husto y responsabel.

Den mi opinión, e dos elementonan CANCEROSO cu definitivamente mester keda trata y elimina ta : 1.  e pasamento di voto di un candidato pa otro candidato ;      2. e dunamento di privilegio na secuencia riba lista en bes di na e cantidad di votonan personal , pa determina cua candidato ta bira Parlamentario.

Tur candidato cu tin pensa di subi lista pa eleccion 2017 mester realisa di antemano bon con e reglamentonan pa yega na apunta Parlamentario pa Aruba ta hinka den otro y si bo ke cambio trece bo preocupacion padilanti den partido hunto cu bo otro colega candidatonan. Nunca ta lat pa haci cambionan pa un eleccion husto na 2017.

 

rsarends@hotmail.com

 

- Advertisement -

DUNA COMENTARIO

Please enter your comment!
Please enter your name here