Home Hudicial Polis cu a tira homber den lomba a aparece dilanti Hues

Polis cu a tira homber den lomba a aparece dilanti Hues

2092
0
SHARE
— Polisnan investigando na e lugar di tiramento na Savaneta.
- Advertisement -
ORANJESTAD (AAN): Diahuebs mainta tabatin interesante discusion den sala di Corte riba e accion di e agente di Polis, S., kende na 2015 a tira un homber den lomba durante persecusion na pia. Apesar cu tin denuncia haci cu e homber P. lo a menaza di lo tira un homber mata, apesar cu dos agente di Polis a grita durante e persecusion, “para sino ta tira”, toch Fiscal ta haya cu e agente di Polis mester a actua diferente. Fiscal, teniendo tur cos den consideracion a exigi castigo di trabou pa comunidad condicional. Abogado di e agente di Polis ta haya cu e agente a actua corecto segun reglamento di Polis y no mester haya castigo.
HOPI RECHERCHE DEN CORTE
Diahuebs mainta por a mira varios miembro di Recherche hopi conoci, sinta den tribuna di Corte. Nan a bay duna sosten na nan colega S., kende actualmente ta trahando como miembro di Recherche. Nan tabata scucha cu hopi atencion tur e discusion y por a mira claramente na nan cara cu nan no ta comparti e punto di bista di Fiscal. Den combersacion cu un di e miembronan di Recherche, el a bisa cu Fiscal no ta tene cuenta cu situacion a cambia hopi na Aruba.
ACUSA INTENTO DI MATA
Fiscal a bisa cu e acusacion contra e homber S. ta cu riba un Diamars, 25 Augustus 2015, el a tira e homber P. den lomba. Fiscal ta considera esaki un intento di mata y subsidiario, un intento di maltrato severo.
TIRA HOMBER DEN LOMBA
Hues a mustra cu segun e procesverbaal di Landsrecherche, e agente di Polis S. hunto cu dos colega femenino a bay Hotel Roy’s na Savaneta pa un caso di maltrato y amenaza. E sospechoso P. lo a maltrata su partner. A resulta cu P. tambe lo a menaza un otro persona di lo tir’e mata. Ora kier a detene P. el a core bay caminda a cuminsa un persecusion na pia pero no a logra gar’e. Un rato despues P. a yama na Hotel Roy’s bisa cu e ta bolbe y lo tira. Ora el a presenta na Hotel Roy’s, Polis a bolbe presenta y el a bolbe core bay. E agente S. y su superior, un agente dama, a core tras di P.
DIARIO e dia ey, a calcula cu nan a core un distancia di 1.3 kilometer.
E agente dama a grita promer, para sino ta tira. Despues S. tambe a grita y door cu P. no a stop, el a tira P., riba un distancia di mas o menos 20 meter leu, den su lomba.
Actua manera tin un arma: Hues a puntra S., pakico el a actua asina. S. a splica cu nan a wordo bisca pa un caso di maltrato y menaza. Un colega, su superior, a bis’e cu mester detene P. El a bisa P. tabata sinta den auto y el a mira P. a hinca algo den su carson. El a bisa P. cu e ta deteni y e ora ey P. a sali core bay. El a bisa Hues, cu un persona homber a bisa cu P. lo a menaza cu lo tir’e mata.
Tiro di aviso of no? Hues a puntra pakico no a tira un tiro di aviso. E agente S. a bisa Hues cu segun reglamento, no mester tira aviso si ya caba a duna aviso verbal.
Hues a puntra si e hefenan a bis’e cu no a actua bon. El a bisa cu e mester a bay psycologo so. Su hefenan no a bis’e nada.
Hues a bisa pakico a tira riba lomba. E agente a splica cu door cu e distancia di mas o menos 20 meter, e chens ta hopi chikito cu si el a tira riba e pia cu lo alcansa e pia. Pesey a tira riba lomba cu ta un parti mas grandi di e curpa.
Hues a mustra cu tin un reglamento cu ta splica ki ora Polis por usa violencia. Hues a bisa cu segun e reglamento, e meta di uso di violencia di Polis mester ta pa e gara e persona sospechoso, si no tin otro forma. E agente a bisa cu e ta haya cu el a actua segun regla.
Fiscal ta cuestiona agente: Fiscal a haci un serie di pregunta na e agente di Polis encuanto di tira. Entre otro Fiscal a puntra si e agente tabata haya practica di tiro regularmente. E agente a splica cu despues di nan curso di Polis, no tin un schedule fiho pa tira. Fiscal a bisa cu ta promer biaha e ta scucha S. bisa cu P. a menaza hende di lo tir’e mata. E agente a bisa Fiscal cu Landsrecherche no a puntr’e con e menaza tabata.
   Hues a bisa Fiscal cu segun declaracion di dos testigo, P. lo a menaza di lo tira mata. Hasta via telefoon, e lo a expresa esaki.
Agente sa tira: Abogado mr. Lejuez a puntra S., si e tin experencia cu arma. S. a splica cu e tin diploma di tiro cu el a logra tempo cu e tabata militar. E tin experencia cu diferente tipo di arma.
E abogado a puntra si P. a para despues di a wordo tira. Segun S., P. a sigui core riba un distancia y despues a para y S. mes a yama ambulance y a trankilisa P.
EXIGENCIA FISCAL
Fiscal a splica cu Ministerio Publico ta traha hunto cu Polis pa gara esnan cu ta haci malo. Ta fastioso awor cu mester persigui un agente di Polis. Na opinion di Fiscal, no tin duda cu e agente S. a bay cu dos colega dama na un caso di maltrato y menaza. S. a mira P. a coy algo for di auto y hink’e den su carson.
Intento di mata: S. a haya instruccion di detene P. y P. a core bay y a tira P. Fiscal a bisa cu e lo a tira un tiro di advertencia. Fiscal a bisa cu no a haya declaracion medico di situacion di P. E ta haya cu S. a tuma risico cu por a tira mata P. Fiscal ta kere cu por prueba intento di mata y cu esaki tabata intencional.
No mester a tira: Fiscal a sigui bisa cu e pregunta ta si e agente S. por a usa arma of no. Landsrecherche ta menciona un reglamento di uso di arma reglamentario. Na opinion di Fiscal, e por imagina cu door cu S., su colega, superior den rango, a bisa para of ta tira, el a kere cu e por tira. Fiscal a bisa Hues cu ta facil pa sinta tras di lessenaar evalua si S. a cumpli cu e reglanan, pero S. tabata den accion pa yuda comunidad. E ta un situacion dificil. Analisando e reglanan ki ora por usa violencia of arma, Fiscal ta puntra su mes si realmente mester a usa e arma.
   Fiscal no ta haya cu e agente S. mester a usa e arma. Tampoco e no ta kere cu e persona lo tabata forma un peliger pa comunidad. Ta un caso di maltrato cu menaza di morto. Fiscal ta kere cu lo por a detene P. un otro momento.
Beneficio di duda: Fiscal a bisa cu e ta duna S. e beneficio di duda si e tabata sa cu P. a menaza cu lo tira y lo tabata sospecha cu e lo tin un arma. Pregunta ta si bou di e circumstancia aki por bay tira. Fiscal ta kere cu lo mester a tira un tiro di advertencia.
Agente ta robez: Fiscal ta haya cu por a detene e sospechoso un otro momento. No tabata un caso asina serio pa hustifica tira. E ta haya cu e evaluacion di S. pa tira tabata robez.
Castigo: Fiscal a bisa Hues cu pa e castigo, e ta tene cuenta cu no tin practica di tiro y practica di uso di violencia regularmente den Cuerpo di Polis. Esey ta na beneficio di S. Ta un caso hopi delicado. Tene cuenta cu segun S. el a kere cu P. tabatin un arma. Fiscal ta haya cu mester exigi castigo di trabou pa comunidad pero condicional. E ta haya cu Cuerpo Policial ta faya den formacion debido di Polis. El a exigi 100 ora di trabou pa comunidad condicional cu tempo di prueba di 2 aña.
ABOGADO
Lugar problematico: Mr. Lejuez a bisa cu ta un hecho cu a tira P. den lomba. Pregunta ta si S. a actua corecto segun regla. E ta haya cu si. Pa Polis ta conoci Hotel Roy’s tin problema di droga y violencia. Hasta Arestatie Team(AT) a drenta den e lugar aki pa motibo di sospecho di arma. Na Januari 2017, AT a haci accion na e hotel y a haya un arma.
Menaza di tira mata: E abogado a mustra cu tin testigo a bisa cu P. a menaza di ta tira mata. Hasta a mira P. haci movecion sospechoso. Ora Polis a yega el a bay y despues a yama dos biaha y menaza cu lo tira mata. E homber a bisa Polis con P. a menace di lo tir’e mata.
   Un otro testigo a bisa cu P. a menaza cu lo tira mata. El a bay y bisa cu e ta bay busca arma bin bek. Ora el a bolbe el a invita e persona bin afor pasobra e tin algo p’e. E tabatin man tras lomba manera cu e tabatin un arma.
Agente a actua corecto: E abogado ta haya cu tur esaki a pone cu e agente S. tabata bou di e impresion cu P. tin un arma di candela. Abogado ta haya cu ora S. a persigui P. e por a sali for di e punto di bista cu P. lo tabatin un arma di candela y ta forma un peliger pa comunidad.
Mirando e cantidad di casonan di atraco arma y tiramento cu arma ilegal, ta haci cu e caso aki ta un caso serio. E ta haya cu e accion di S. tabata hustifica. E tabata persigui e sospechoso y a grita: stop sino mi ta tira. Door cu P. a sigui core, el a dicidi di tira pa evita cu P. lo no bay usa un arma. E abogado a bisa Hues cu e hecho cu P. no tabatin arma, no ta haci e accion diferente.
E superior di S. tambe tabata core tras di P. y a bisa para sino mi ta tira. E ora ey S. por compronde cu e por tira. El a mustra cu segun reglamento di uso di violencia di Polis, por tira si ta sospecha cu e sospechoso lo tin un arma of cuchiu cu e por usa.
Agente sa tira: E abogado a bisa Hues cu S. sa tira. E tabata militar y tin un diploma di tiro y sa anda cu arma. Fiscal a bisa cu Polis no ta haya suficiente practica di tiro. E abogado por compronde esey pero S. sa tira y no tabatin peliger cu e lo herida otro hende. Segun regla, e Polis por avisa cu lo tira verbal y despues tira. Tanto e superior como S. a avisa P. pa para sino lo tira.
Na opinion di e abogado, S. a cumpli cu diferente reglanan stipula den reglamento di Polis pa cu uso di arma reglamentario. El a mustra Hues cu dos luna despues di e incidente, S. a haya su arma y te dia di awe e ta cana cu su arma. E ta trahando y actual e ta wordo guia pa agentenan di Recherche cu hopi experencia. E ta haya cu e acccion di S. tabata hustifica y pidi pa declar’e liber.
Hues a sera tratamento di e caso y a bisa cu dia 11 Mei 2017 lo tin sentencia 8.15 di mainta.
- Advertisement -

DUNA COMENTARIO

Please enter your comment!
Please enter your name here