Home Deporte Presidente di FIFA lo yega Aruba pa un bishita oficial

Presidente di FIFA lo yega Aruba pa un bishita oficial

50
0
SHARE
- Advertisement -

ORANJESTAD (AAN): Diabierna anochi Gianni Infantino lo yega Aruba for di Suisa. E lo ta presenta na e di 32 congreso di CONCACAF cu ta tuma luga riba nos isla, pa prome biaha den historia. Mester menciona cu Infantino a yega di bishita Aruba den pasado, tempo e tabata campaña pa e puesto y Aruba a dune sosten. Siendo Presidente di FIFA, esaki ta su prome bishita oficial na nos isla, como un forma pa mustra su sosten pa e cambionan positivo cu futbol di Aruba ta pasando aden, danki na e esfuerzo di Arubaanse Voetbal Bond.

E yegada historico di e Presidente di FIFA lo conta cu presencia di Minister Presidente Mike Eman y di Minister Dr. Alex Schwengle di Deporte. E Presidente di CONCACAF ta na Aruba caba y tambe lo tey pa yama e ehecutivo mas halto di FIFA bon bini na Aruba y bon bini na e congreso anual di e confederacion Norte Americano, Centro Americano y di Caribe.

Giovanni Vincenzo “Gianni” Infantino di 47 aña di edad ta un administrador di futbol y ta e actual Presidente di Fédération Internationale de Football Association (FIFA), eligi dia 26 di februari 2016 den un sesion extraordinario durante congreso di e federacion di futbol. E ta e di 9 Presidente di FIFA.

E prome tabata Robert Guérin di Francia cu a cuminsa na Juni 1904, sigui pa Daniel Woolfall di Inglatera cu a cuminsa na Juni 1906, sigui pa Cornelis Wilhelm di Hulanda for di October 1918 cu a fungi como temporario, mescos cu Jules Rimet di Francia desde 1920 y cu desde Maart 1921 a bira e di 3 Presidente di FIFA, sigui na Juni 1954 pa Rodolphe Seeldrayers di Belgica como e di 4 Presidente, Arthur Drewry di Inglatera a asumi funcion na Juni 1956 como e di 5 Presidente, pero a fayece repentinamente na 1961, pa cual Ernst Thommen di Suiza a keda den funcion temporal. Na September 1961, Stanley Rous di Inglatera a bira e di 6 Presidente, sigui pa João Havelange di Brazil cu a asumi e puesto na Mei 1974 como e di 7 Presidente. Na Juni 1998, Sepp Blatter di Suiza a asumi e puesto como e di 8 Presidente y a suspende na October 2015 despues di 17 aña na poder. Di eynan Issa Hayatou di Cameroon a keda den funcion temporal te dia 26 di februari 2016 ora cu Gianni Infantino, di Suiza y Italia, a asumi e puesto.

E ta naci na Suiza, di un mayornan Italiano cu a imigra eynan. El a studia ley na University of Fribourg y ta domina e idiomanan Italiano, Frances, Aleman, Ingles, Spaño y Arabia.

Ta bon pa bisa cu prome di asumi e puesto den FIFA, e tabata e Secretario General di Union of European Football Associations (UEFA) desde aña 2009. Prome cu esey el a traha como Secretario General di e centro internacional di estudionan deportivo na University of Neuchâtel.

Su carera na UEFA a inicia na Augustus 2000, pero a apunte como director di e departamento di “Legal Affairs and Licensing Division” na januari 2004. Asina el a bira Secretario General suplente na 2007 y dos aña despues a nombre den e puesto den forma permanente. Durante su temporada den UEFA, el a percura pa introduci “Financial Fair Play” y a mehora e aporte comercial na asociacionnan nacional mas chikito. El a supervisa e expansion di UEFA Euro 2016 pa 24 ekipo y a hunga un rol crucial den concepcion di e UEFA Nations League y e UEFA Euro 2020 cu lo tuma luga den 13 diferente nacion Europeo.

Pa loke ta FIFA mes, Infantino tabata un miembro di e comision di reforma. Na October 2015 el a ricibi sosten di e UEFA Executive Committee pa bay pa e puesto di Presidente di FIFA, pa cual e mesun dia el a confirma su candidatura. El a priminti di expande e campeonato mundial di FIFA pa 40 ekipo. Na februari 2016 a eligie como Presidente di FIFA pa un periodo di 3 aña. Cu su eleccion, el a bira e prome Italiano pa ocupa e puesto di Presidente di FIFA.

Gianni Infantino ta casa cu Leena Al Ashqar di Lebanon. E pareha tin 4 yiu.

A funda FIFA dia 21 di Mei 1904 y ta e organisacion na cabes di e deporte di futbol, futsal y beach soccer. E ta responsabel pa organiza torneonan internacional, manera e Copa Mundial, cu a cuminsa desde aña 1930 y e Copa Mundial Femenino cu a start na 1991. Mester menciona cu ora a funda FIFA na 1904 tabata pa supervisa e competencianan internacional entre a asociacionnan nacional di Belgica, Dinamarca, Francia, Hulanda, Spaña, Suecia y Suiza. Su oficina principal ta na Zürich y awendia ta conta cu 221 miembro di asociacionnan nacional. Tur miembro di FIFA mester ta miembro tambe di un di e 6 confederacion nan regional, den cual a parti mundo. Nan ta Africa (CAF), Asia (AFC), Europa (UEFA), Norte-Centro America y Caribe (CONCACAF), Oceania (OFC) y Sur America (CONMEBOL).

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e referee nan y e torneonan di futbol organiza pa mayoria liga. Nan oficina ta situa den Compleho Deportivo Frans Figaroa na Noord.

 

- Advertisement -

DUNA COMENTARIO

Please enter your comment!
Please enter your name here