Home General Prison di KIA ta demasiado yen y a manda cantidad di preso...

Prison di KIA ta demasiado yen y a manda cantidad di preso cas

220
0
SHARE
- Advertisement -

Ministerio Publico a bati alarma na Minister di Husticia pa e situacion

ORANJESTAD (AAN): Si no ta un, ta e otro. Ta parce cu nos Instituto di Coreccion, KIA, ta den mal imagen ultimo tempo. No solamente e situacion inhumano cu constantemente abogadonan ta keda reclama den Corte sino awor ta asina cu KIA ta yen y a manda un cantidad di preso cas.

Siman pasa durante tratamento di un caso penal di atraco, abogado mr. Carlo a hala atencion di Hues di e situacion reinando na KIA y cu KIA ta parce un ghetto. Esaki a base di loke e abogado ta experencia di loke presonan ta cont’e.

KIA TA MUCHO YEN

Siman pasa e abogado tambe a bisa Hues cu e situacion ta asina alarmante den KIA cu recien, un cantidad di preso a worde manda cas.

Relaciona cu esaki, DIARIO a papia cu abogado mr. Carlo pa haya mas informacion riba e asunto aki.

Abogado mr. Carlo a confirma cu enberdad KIA luna pasa tabata asina yen cu a manda un cantidad di preso cas, pa asina crea espacio pa esnan sera na warda di Polis por bay KIA. El a splica, cu e presonan cu a worde manda cas, ta esnan cu nan tempo pa sali liber ta yegando.

Preso sera mas cu 20 dia na warda di Polis: Mr. Carlo a duna di conoce na DIARIO cu KIA tabata asina yen cu tabata laga presonan keda sera den celnan na warda di Polis pa simannan largo, cual no ta bon.

Situacion no humano: E abogado a splica cu normal segun ley, un preso no por keda mas cu 10 dia sera den un cel na warda di Polis. E mester worde traslada pa KIA. Den e situacion cu a surgi cu KIA tabata demasiado yen, tabatin preso cu a keda 28 dia sera den cel na warda di Polis, wardando pa haya lugar na KIA. Na warda di Polis e preso no ta haya momento pa tuma aire liber y esey ta haci e situacion inhumano.

Ministerio Publico a cay aden: E situacion tabata asina fastioso cu Ministerio Publico a dicidi di actua y a informa minister di Husticia di e situacion. Ministerio Publico a pidi e minister pa laga un cantidad di preso liber pa asina alivia di e situacion na tanto KIA como warda di Polis.

Minister a laga mas cu 10 preso liber: Por a compronde cu minister di Husticia a bay di acuerdo cu e peticion di Ministerio Publico cu ta encera, cu e presonan cu nan tempo di bay liber ta hopi cerca, a worde laga liber mas tempran. Mas cu 10 preso a haya nan libertad asina y ainda tin mas pa bay pasobra e situacion ta keda fastioso.

Hues Comisario a pone presion: Mr. Carlo a bisa cu Hues Comisario ta asina preocupa cu e situacion aki cu a pone presion riba Ministerio Publico. Den un caso di atraco, Hues Comisario a bisa Fiscal cu e ta prolonga e detencion di e sospechosonan pero Fiscal mester percura pa dentro di 7 dia, e sospechoso haya lugar na KIA.

Esaki ta e situacion reinando den KIA, cu gran parti di comunidad no sa y DIARIO ta informa.

 

- Advertisement -

DUNA COMENTARIO

Please enter your comment!
Please enter your name here