ORANJESTAD (AAN): Tur esnan cu ta campando e dianan aki, ta ser suplica pa pidi servicio di Serlimar, pa asina pasa busca sushi tur dia.
Esey ta loke Lionel Croes di Serlimar a indica na DIARIO.
El a splica cu Serlimar ta trahando hopi di cerca cu Polisnan di Bario. Y pesey nan ta haci un suplica na tur persona cu a haya permiso pa campa, pa pidi bakinan di sushi di Serlimar.
Serlimar ta ofrece pa 2017, dos tipo di baki di sushi. Nan tin un servicio unico y cu prijs preferencial. Tin un baki di 1.100 liter y tambe baki di 240 liter. Serlimar mes ta pasa entrega e bakinan aki.
Bo tin di bay na Oficina di Serlimar, registra cu bo cedula y tambe bo vergunning di campamento. Aki bo ta firma un contract y bo ta haya bo baki.
Durante Semana Santa nan lo pasa duna servicio di recoge sushi.
DIARIO a compronde cu hasta pa esnan cu ta Campa na parti extremo patras di Prison di KIA, nan tambe tin un truck pa cubri e area aki. Ta importante pa bay registra pa asina por planifica y notifica e dia exacto cu nan lo pasa recoge sushi.
E team special di Serlimar lo cubri Semana Santa, y ta spera cu pueblo lo yama nan si acaso nan mira sushi benta cierto area.
