ORANJESTAD (AAN): Diasabra atardi via un boletin urgente, Sindicato STA ta ripiti cu keto bay nan tin representacion di mayoria di empleadonan na Alhambra Casino. Pues cualkier informacion cu gerencia kier duna, no ta basa riba realidad.
STA a tuma nota cu gerencia di dicho compania a solicita un referendum via oficina di Mediador di Gobierno pretendiendo cu awor aki Sindicato STA no tin e mayoria mas di e empleadonan como miembro den e compania aki. E Sindicato mesora a reacciona, mustrando cu nan ta considera esey un falta grandi di respet pa cu STA, y principalmente un falta di respet superior pa cu e empleadonan di Alhambra Casino.
“Tur hende sa con un campaña sushi a wordo hiba di parti di gerencia di Alhambra y un par di nan compinchinan pa intimida trahador pa bandona e Sindicato, pa asina nan por ‘wheel and deal’ y cana pasa trapa tur hende manera nan kier, segun Diego de Cuba di STA a informa DIARIO.
Apesar di esaki STA a keda mantene e mayoria y awor ta suplica tur empleado cu ainda no ta afilia na nan, pa haci esaki mesora segun nan consenshi.
Negociacionnan pa cu e CAO ta andando y ta na mitar di caminda caba. Loke ta un estorbo ta cu e Señora Susan no ta biba na Aruba y esey ta pone cu cada vez tin tardanza y cada vez ta tira e culpa riba e sindicato.
Segun STA, tur hende por observa e intimidacionnan di e Mericano cu ta maneha e Casino.
“Pa nos logra e meta, nos mester ta uni,” de Cuba a indica. E ta referi aki na tur Departamento di e Casino na Alhambra. Cu Sindicato mes ta dificil, corda sin Sindicato. Gerencia no kier presencia di un Sindicato cu ta bringele. Pesey awor STA ta pidi empleadonan pa uni forza awor mas cu nunca, pa evita cu tin di bin un otro referendum.
