Home Suceso Trio ladron di 16, 17, y 27 aña terorizando Aruba a wordo...

Trio ladron di 16, 17, y 27 aña terorizando Aruba a wordo captura

2136
0
SHARE
- Advertisement -

ORANJESTAD(AAN): Pa algun tempo caba, nan ta ocupa cu un estilo unico di horta, dividi den 3 accion.
(1) Nan ta busca un Pickup of auto prome pa horta.  (2) Usando e vehiculo nan ta comete nan ladronicia of atraco.  (3) Despues ta laga e vehiculo abandona atras.
Y nan a cuminza ta haya exito.

Uno tras di otro, e grupo di cuatro bandidonan aki tabata comete ladronicia y atraco, y e hecho cu nan botin ta cuminza crece, ta pone cu nan ta sigui haya mas incentivo pa horta tur madruga!

Pero riba Diaranzon madruga,  number di 3 di e bandidonan aki a hunga!  Tur esaki danki na ciudadanonan cu wowo skerpi cu a mira nan, y yama Polis duna e tip di oro.

Polisnan a gara tres cu man den mansa na Ponton.   E di cuatro persona cu tabata warda den auto, a primi trot y bandona su compañeronan atras.  Pues tin chens cu mas detencion por cay.  Ademas, esnan cu ta cumpra articulo horta di nan, tambe por keda deteni pronto.

DIARIO Online aki ta trecebo e mihor relato compara cu tur otro website na Aruba, relaciona cu e suceso aki.

Di comienzo di April caba, e tipo di ladronicia aki a cuminza wordo nota.  Nan ta horta Pickup na Paradera pa bay horta na Primavera.  Nan a horta un V-auto, y pasa comete atraco riba Zhang’s Super Center na Shiribana.  Tres a baha di e auto comete e atraco, y di 4to persona a keda tras di stuur cu motor cendi.  Tin algun hende ta insisti cu esun tras di stuur cu dreadlocks, por ta un muher.

Riba Diamars cu a pasa, nan a purba horta Pickup atrobe na Paradera pero a faya.  Despues nan a horta un Nissan Pickup na San Barbola, y a bay cu e vehiculo comete kiebro na un compania di Verf na Cumana, y un Car Parts Dealer na Sero Patrishi.

Nan a fracasa na Hua Run Supermarket

Riba Diaranzon nan a dicidi na yega na Hua Run Supermarket na Ponton.   E biaha aki atrobe nan tabata cu auto ta hortando den e negoshi.   Un persona cu a mira nan ta bay pa drenta Hua Run Supermarket, a core yama Polis.  E yamada a drenta pa 2:28 am.  Inmediatamente un unidad di Polis di Playa a mobiliza pa e area, mientras cu unidad di Polis di Noord tambe a cuminza bin e direccion ey.

A bin descubri cu e ladronnan aki ta usa Walkie-Talkie portatil pa comunica cu otro.  E trio aki tin un modus operandi, cu ta den entre 30 seconde pa 1 minuut pa drenta negoshi, y percura pa nan bay prome cu 5 minuut.

E yamada di oro a drenta net ora cu nan tabata cortando un buraco den bentana pa nan drenta. E patruya di Polis tabata cerca, a yega pa 2:29 am, pues den menos di 1 minuut.  Nan a bin haya un persona scondi pafo, patras di potchi di mata.  E tabatin dos Caha di Placa den su man.   Mesora el a wordo gara pa Polis.  Un otro tambe cu net e ora ey tabata saliendo for di e buraco di bentana, a wordo gara cu facilidad, y poni cu man na boei.  Pa por a yega na e bentana, nan a forza y destrui parti abao di e rollluik.

Na dado momento un di nan a haci un movimento straño na unda cu polis pa su mesun seguridad a los un tiro di advertencia den halto, y esey di biaha a nuetraliza e situacion.

Pero parce tabatin uno mas paden, y e ora Polisnan pafo a neutraliza e situacion, nan a drenta e Supermarket pa bay buske, y a haye scondi den baño di e Supermarket.

Handschoen y mesun tipo di paña

Mescos cu e ultimo casonan di ladronicia y atraco, nan tabatin handschoen bisti y paña similar na e casonan anterior.  Mesun tipo di mascarada na cara.

Pafo di Hua Run, a haya un Sker di Corta Hero tambe.  Polis a haya refuerzo di demas patruyanan cu mesora a yega!

Dos di e hobennan ta di Aruba, y uno ta naci na Curaçao.  Nan edad ta 16, 17, y 27 aña.  Por lo menos uno di nan ta di Sabana Basora.  DIARIO no a haya sa ainda di cua bario e otronan ta bin.

Pueblo ta sclama pa Husticia

Un pabien na Cuerpo Policial.  Ohala personal di Ministerio Publico y Parket por mustra Fiscal e potretnan aki, y haya sa di e storia, ta cuanto tension e trio aki a causa durante April na Aruba.  Pa asina sikier exigi castigo di 8 aña bay ariba pa cada uno.

Polis a manda busca Recherche tambe cu a tuma e caso over.  E tres hobennan aki ta den problema grandi cu Husticia, y ohala cu nos sistema hudicial baha pisa riba nan.  Polis a indica cu uno di nan ta “conocido” di Husticia, pues e momento a yega pa Husticia baha pisa riba dje.

Claro, na Aruba ainda e sistema di rehabilitacion no ta funciona como debe ser.  Pues e momento a yega pa stop di laga nan sali mucho trempan for di KIA.

Polis a confisca e Walkie-Talkienan tambe, y DIARIO ta felicita Cuerpo Policial di Aruba cu e fabuloso prestacion aki.  Tres ladron peligroso awor tras di trali.  Ohala Husticia scucha pueblo, y laga nan keda hopi aña eyden.

- Advertisement -

DUNA COMENTARIO

Please enter your comment!
Please enter your name here