Mester por tin “animal watchers” den bario pa informa Polis riba maltrato di bestia

ORANJESTAD    (AAN):   Por mira un fenomeno cu tin añanan andando unda hendenan ta tira nan cachonan of nan pushi riba caya. Nan ta laga nan bay. “Tabata tin un caso unda un persona a tira un cacho practicamente dilanti di mi, lag’e atras, anto trot su auto bay. Mi a bay su tras, mi a par’e y e mester a tuma su cacho bek pasobra sino mi ta bay deten’e”, Trudy Hassel di Plataforma Ley di Cacho a indica.

El a sigui bisa cu esaki ta un forma di maltrato di bestia. Ora cu bo tira un cacho riba caya, con bo ta kere cu e cacho ey ta bay sobrebibi? E hendenan aki mester bira mas conciente, Hassel a expresa.

Plataforma Ley di Cacho tabata trahando keto. Tin algun cos cu ta den proceso aworaki pa facilita e trabao di polis, pa por bay cuminza actua. “Kere mi cu Cuerpo Policial ta bay cuminza actua”, e polis a subraya.

Plataforma Ley di Cacho ta reuniendo pa bay traha riba un plan concreto con ta bay anda cu e casonan di cachonan riba caya y opvang. El a agrega cu e plataforma a wordo lanta no como un grupo di hende pa traha nan so. “Nos kier pa tur organizacion cu ta traha riba tereno di proteccion di derechonan di animal, nos tur hunto por uni pa asina nos por mustra un forma pa stop hopi abuso aki”, a bisa.

Tin fundacionnan cu ta haciendo nan best cu nan campañanan di sterilizacion, pero tin hopi mas cu mester wordo haci.

“Animal Watchers” den bario:

Hassel ta kere cu mescos cu den barionan ta lanta “neighborhood watchers” contra criminalidad, por lanta “community watchers” pa informa Cuerpo Policial ta cual ta e casnan den e bario na unda maltrato di bestia ta hopi obvio.

Ta spera cu un dia lo por yega na un tereno cu facilidadnan unda cu piki tur cacho na Aruba y hiba nan na e facilidad ey. No ta papiando akinan di un “kill cage”, pero tin speranza cu doñonan responsable y cu amor grandi pa bestia lo bin pa adopta nan, a agrega.

Mescos cu Aruba Animal Shelter ta haciendo pa añanan largo, pero na dado momento nan capacidad tambe ta limita. “Nos ta spera cu conhuntamente cu tur e organizacionnan aki, por bay yega na solucion”, Trudy Hassel a expresa.

E mensahe cu Aruba ta dunando na e turistanan cu ta bin Aruba ta hopi fout. E turistanan mes ta puntra con por ta posibel cu tin asina hopi cacho ta cana riba caya flaco, mal nutri y nan ta wak nan den mal estado.