ORANJESTAD(AAN): Tabata Diabierna banda di 10:00 am, cu autoridad a haya yamada di algun hende, cu ta raporta cu riba e caminda patras di Faro di California tin un accident di Quadracer.
Polis como tambe Ambulans a mobiliza pa e area. A bin topa cu un turista femenino, kende ta levemente herida. El a splica cu e tabata riba un vehiculo ATV (“Quadracer”) coriendo cu su yiu, ora cu el a spanta na momento cu auto ta bin for di direccion contrario riba e caminda smal ey.
Esey a pone e dama hala un banda, perde control y sufri un accident. Tanto e dama y su yiu a keda levemente herida. Paramediconan a duna nan prome asistencia, y a bay cu nan pa Servicio di Emergencia na Dr. Horacio Oduber Hospital pa ricibi trato y examinacion mas avanza.
