ORANJESTAD(AAN): E siman aki, DIARIO a acerca Hendrik Croes como vocero di aeropuerto, pasobra tin limpiesa andando. Esaki ta mara na cierto cosnan cu tin.
El a splica cu nos ta drentando den temporada di horcan, cu ta cuminsa dia 1 di Juni y ta finalisa dia 30 di November. Den cuadro di esaki aeropuerto tin Hurricane Working Group, cu ta reuni pa ta bon prepara, den caso cu Aruba ricibi un of mas horcan por azota nos den e temporada aki. Mirando esaki, ta den e fase di preparacion, unda cu ta haciendo e ditchnan limpi, den un forma un tiki mas intensivo.
Banda di esaki cu ta worde haci regularmente, ta mira tur ekipo cu ta worde uza, ta ekiponan di AAA, unda cu empleadonan ta percura a base regular, tene e area limpi, pa asina cu si en caso nos ricibi awa adicional cu ta cay den forma mas di lo normal, por maneha esaki tambe. Tur e ditchnan cu ta bin for di Camacuri, Dakota, tur ta topa na aeropuerto y ta importante pa e ditchnan ta worde teni liber di tur sushi cu por tin den e ditchnan, atrobe, pa mantene e nivel di siguridad halto, specialmente den e temporada aki.
Den e edificio mes di aeropuerto, parti di e plannan di e Hurricane Preparedness Plan, unda cu tin mas area tambe cu ta ricibi extra atencion durante e temporada aki, mirando cu den forma inespera por haya awasero cu ta cay den gran escala, unda cu aeropuerto di Aruba ta prepara pe tambe.
Limpiesa ta sosode a base regular, pero mirando awor aki cu ta bayendo den un temporada unda cu mester ta mas prepara, pasobra cu no ta anticipa esakinan cu suficiente tempo adelanta. Ta percura pa den e temporada aki ta extra prepara pa tur e areanan ta liber di cualkier cos cu por haci e situacion bira mas pio, si en caso algo mester sosode.
Activo durante aña
Durante aña, e departamento cu ta percura pa e area di airside, unda cu a base regular ta controla e area, pa ta na un nivel di siguridad safe pa tur hende, pa por mantene e nivel di siguridad cu tin na aeropuerto y a base regular, e limpiesanan ta worde haci. Atrobe tin atencion special ta worde poni awor aki, den e temporada aki, unda cu ta den preparacion pa cualkier horcan cu por bishita Aruba, pero tambe cualkier mal tempo cu den e temporada aki por presenta nan mes cu mas frecuencia, segun Croes.
