Home Enseñanza Aruba Scholarship Foundation cu beca pa aña di estudio 2017 – 2018

Aruba Scholarship Foundation cu beca pa aña di estudio 2017 – 2018

108
0
SHARE
- Advertisement -

ORANJESTAD(AAN)– Aruba Scholarship Foundation (ASF) ta otorga beca atrobe na tur studiante cu ke sigui un estudio den exterior na un instituto di enseñansa superior.

E aña aki ta e di 29 aña cu ASF ta yuda financia estudio di e studiantenan. Via e WEB-site www.arubascholarships.com e interesadonan por conecta cu facebook pagina di Aruba Scholarship Foundation y e por haya informacion tocante ASF en general y e rekisitonan necesario pa un candidato bin na remarca pa un beca.

Pa mas detaye por acerca e miembronan Etley Lasten, (lastenet@gmail.com), Brian Marchena (bgmarchena@gmail.com) of Hector Kolfin (hectorkolfin@gmail.com) pa informacion adicional.

Ta importante pa e studiante download e formulario for di ASF su facebook pagina y entrega esaki completamente y corectamente yena na: Print Media Aruba/4Sale Magazine, Seroe Blanco 20.

Tambe tur studiante cu actualmente tin un beca di ASF, mester aplica di nobo pa e aña 2017-2018.

Mester entrega e formulario y e anexonan di mas tarda 20 di mei 2017 na Print Media Aruba/4Sale Magazine, Seroe Blanco 20, manera menciona na pagina 1 di e formulario. Corda tene cuenta cu e documentonan rekeri y busca nan na tempo. No por aplica ni via email ni via fax.

Aruba Scholarship Foundation tin varios criterio, ora ta evalua e candidatonan. Un di e criterionan cu ta pisa hopi cerca e fundacion ta e necesidad berdadero di ayudo financiero. P’esey e studiante mester por demostra esaki tambe ora e yena e formulario. Aruba Scholarship Foundation ta tuma varios factor di e parti financiero na consideracion.

Por ehempel, cuanto e estudio lo costa, e forsa financiero real di e famia, cuanto yiu tin den famia, disponibilidad di fondo di otro fuente (hopi importante) entre otro, prestamo di estudio di gobierno y otro factor cu por ta gastonan extraordinario di e famia. ASF sigur ta tuma den consideracion loke e candidato mes a haci pa yuda su situacion financiero.

Tambe e instituto y estudio logicamente mester ta acredita pa e pais di studio y pa gobierno di Aruba.

Si e studiante tin algun duda tocante e estudio cu e ke sigui of tocante e instituto cu el a scoge, semper e por acerca Departamento di Enseñansa pa guia profesional of consulta internet. Tur studiante cu haya beca mester compromete su mes pa bin traha na Aruba pa mes tanto aña cu el a studia cu beca di ASF.

Tambe ta importante cu e studiante mester tin un bon prestacion na scol secundario na Aruba.

Banda di esey ta tene cuenta cu otro factor manera ambiente socio-economico di e studiante cu por a afecta su habilidad pa haya punto halto, participacion den actividad caritativo, civico, cultural of deportivo. Aruba Scholarship Foundation ta un institucion completamente independiente y no ta afilia na ningun otro organisacion.

Su sosten financiero ta bin di contribucion di nos comunidad: cas comercial, profesionalnan y otro personanan cu ta comparti e vision di un Aruba miho prepara pa futuro.

Directiva di ASF ta traha completamente Pro Deo. Directiva di Aruba Scholarship Foundationta consisti di e miembronan: Frits Goedgedrag, Etley Lasten, Lindsey de Cuba-Wever, Thais Nierop-Kappel, Brian Marchena, Hector Kolfin, Javier Wolter, Lydia Emerencia y Rik Timmer. .

- Advertisement -

DUNA COMENTARIO

Please enter your comment!
Please enter your name here