Home Deporte Aruba Softball Bond a dedica campeonato na dos baluarte Bertha Wolf Croes...

Aruba Softball Bond a dedica campeonato na dos baluarte Bertha Wolf Croes y Eugenio “Tan” Helder

50
0
SHARE
- Advertisement -

ORANJESTAD (AAN): Campeonato HEINEKEN di Aruba Softball Bond a inicia diabierna ultimo riba veld di Flatstone. Un veld carga cu fanaticonan y atletanan tabata testigo di e bunita y colorido apertura. Pa 7:15pm MC a yama dilanti tur representantenan y a saluda tur presente. E dos baluarte nan na kendenan a dedica e campeonato tanto Sra. Bertha Wolf Croes y Famia y tambe Eugenio “Tan” Helder y famia a wordo yama dilanti pa tuma nan asiento riba tereno. Lamentablemente Minister di Deporte of representante no a duna acto di presencia y pa di 8 aña consecutivo ta briya cu nan ausencia na apertura di campeonato oficial di Aruba Softball Bond. Tampoco parlamentario Sr. Norman Roos presidente di COA a honra ASB cu su presencia. ASB manera un bon tata lo keda manda invitacion tur aña.

Mesora a continua cu desfile di tur e equiponan unda despues a bay over pidiendo atención pa e himno di Aruba. Presidente di ASB Sr Endy Croes a wordo yama dilanti pa hiba su discurso. Endy a gradici e baluarte nan pa nan tempo dedica na deporte y splica riba e desaroyo internacional y clasificatorionan importante na caminda. Endy a continua bisando cu deporte ta forma un comunidad, ta forma caracter y crea disciplina y ta siña nos gana y perde pero mas aun tau ni un nacion. Endy a hasi un suplica na tur atleta pa hunga bala duro contra otro den tereno pero saliendo pafor di tereno despues di wega braza otro y corda cu Aruba ta chiquito y nos tur mester ta amigo di otro. Despues a bay over na homenagia nos baluarte nan. A continua pa lesa e CREDO di Softball unda dos hoben uno masculino y uno femenino a hasi esaki. Pa promer biaha den historia ASB a introduci huramentacion di umpires y scorers publicamente cual sigur ta un acto masha bunita y conoci na otro paisnan rond mundo.

Durante eleccion pa escoge madrina di aña kende lo representa ASB durante henter aña 2017 Srta. Aishenu Aikelane Sprok a conquista e titulo y ta bira madrina oficial di ASB pa aña 2017. Despues a bay over na lansa e promer bala unda baluarte Sra. Bertha Wolf Croes a subi monticulo despues di hopi aña y baluarte Sr.Eugenio “Tan” Helder a fungi como bateador hunto cu Gil Wester como catcher y Zuleyka Willems como umpire y asina a lansa e promer bala pa asina oficialmente decreta inicio di  campeonato 2017.  Na final a tira lo unda Spuiters vs Pizza Hut Monsters den categoria AA masculino lo bira e promer clash di campeonato. Pabien Aruba Softball Bond, Pabien Atletanan, Pabien Aruba. Exito na tur equiponan.

- Advertisement -

DUNA COMENTARIO

Please enter your comment!
Please enter your name here