Home Economia Aruba Tourism Authority ta anticipa un Soul Beach Music Festival exitoso e...

Aruba Tourism Authority ta anticipa un Soul Beach Music Festival exitoso e siman aki

192
0
SHARE
- Advertisement -

Impacto economico directo ta di $5 miyon, indirecto ta $13 miyon

ORANJESTAD (AAN): E siman aki, CEO di Aruba Tourism Authority, Ronella Tjin Asjoe-Croes a duna di conoce cu e relacion cu organizadoran di e famoso Soul Beach Music Festival ta uno fuerte, uno cu ta beneficia tanto e organizador, pero sigur tambe Aruba su economia y producto turistico.

A.T.A. ta keda midi e efecto di e festival y ta keda stimula  organizadornan pa fomenta crecemento. Segun Tjin Asjoe-Croes, Soul Beach Music Festival ta un di e eventonan durante aña cu ta haci di e oferta di Aruba, uno mas varia.

Productor ehecutivo y fundador di e Soul Beach Music Festival, Mark Adkins a duna di conoce cu nan tambe ta mira con, den transcurso di 15 aña, e bishitantenan di e festival a bira un comunidad riba nan mes cu ta sigui den contacto ora nan bay back Estados Unidos. Online tin ‘Aruba Meet Ups’ como tambe ‘Soul Beach Aruba Meet Ups’ cu ta un comunidad virtual di hendenan cu ta sinti un relacion cu otro y nos isla y ta reuni cu otro aki na Aruba. Nan ta gruponan di 20 pa 50 persona tur rond di Estados Unidos.’ Pa Adkins esey ta un muestra cu e bishitantenan ta sinti nan mes na cas na Aruba y ta gradici e comunidad Arubiano cu a haci un trabao excelente como embahadornan di e isla. Adkins tambe a indica cu e crecemento den bishitante na e festival aki ta resultado di diferente factornan manera un isla unico cu un pueblo maraviyoso, bon organizacion y line up, excelente cooperacion cu stakeholdernan local, pero tambe e genero musical a transcende bareranan cultural na Estados Unidos mes, aumentando asina e mercado.

Durante ultimo cinco aña Aruba Tourism Authority ta traha cu University of Central Florida pa midi e impacto economico cu Soul Beach Music Festival tin pa Aruba. Resultadonan ta indica cu pa aña, e actividad aki tin un impacto directo di $5 miyon Dollar, y segun analisis, e impacto indirecto ta $13 miyon Dollar mientras cu e inversion di parti di A.T.A. ta di $850 mil Dollar. Pues un retorno di inversion bastante halto pa cu e festival aki.

Cifranan ta mustra cu e bishitante promedio di Soul Beach Music Festival ta keda na Aruba pa cinco anochi. E festival ta trece hopi persona for di mercadonan importante pa Aruba manera New York y Atlanta. Principalmente atractivo pa A.T.A. ta, cu tin un crecimiento den e mercado cu ta bin for di Costa Oeste di Merca manera California, cu ta un mercado nobo y prometedor pa nos isla. Un di e metanan ahusta pa cu e edicion di Soul Beach Music Festival 2017, ta cu e cantidad di participante mester yega 4.500 persona, cual ta 1000 hende mas cu aña pasa.

“Nos ta sigui midi e resultadonan y nos ta sigui stimula e organizacion pa asina saca mas probecho pa Aruba como destinacion y aumenta entrada unda cu por. Tur cos ta posibel ora ta basa riba un relacion fuerte y den e caso aki, e ta presente,” CEO di A.T.A. a declara.

E organizadornan ta gradici Gobierno di Aruba y en particular Aruba Tourism Authority pa e confianza y sosten, como tambe AHATA, JetBlue, hotelnan di Aruba, Setar, Aruba Ports Authority, De Palm Tours, Tropical Bottling y Economy Car Rental. E di 17 edicion di e Aruba Soul Beach Music Festival ta tumando luga e siman aki, cu fiestanan na diferente beach di Aruba durante dia y concierto y fiestanan anochi.

 

- Advertisement -

DUNA COMENTARIO

Please enter your comment!
Please enter your name here