Home Politica AVP cu vision y prioridadnan robez, incapacidad y corupcion a stanca nos...

AVP cu vision y prioridadnan robez, incapacidad y corupcion a stanca nos economia

90
0
SHARE
- Advertisement -

Parlamentario Thijsen (MEP):  ademas di mata comercio local

ORANJESTAD    (AAN):    Parlamentario mr. Juan E. Thijsen a tuma nota di publicacionnan di Banco Central di Aruba confirmando cu nos economia no ta bayendo bon. Un caida di -0,5 pa 2015 y -0,2 pa 2016. Esaki segun Parlamentario mr. Juan E. Thijsen no ta nada straño mirando e mal trabao di Gabinetenan Mike Eman cu ya a conoce su di tres Ministro di Economia.

Mike Eman a purba cu Michelle Hooiboer Winklaar, despues cu Mike de Meza y actualmente Richard Arends.  Segun Parlamentario mr. Juan E. Thijsen Gabinetenan di Mike Eman cu vision robez, prioridadnan robez, incapacidad y corupcion a stanca nos economia y a mata comercio local.

Mike Eman como lider di nos pais a scoge pa pusha e economia di Aruba atravez di gobierno mes hincando placa den infrastructura di nos pais. Esaki a bai den careteranan, brug, plazanan y trotoir tur caminda.

Macro economicamente e inversion door di gobierno den infrastructura no tabata hopi. Rapportnan ta indica cu solamente un 1% di su budget a ser inverti den infrastructura.  E inversion cu bo ta mira a bin grandemente for di placa gobierno a compromete su mes (hospitaal, green corridor) pa paga bek como debe di 30 aña.

E empleo cu ta ser crea ta temporalmente y no ta trabaonan fiho. Un otro soño di Mike Eman pa haci Aruba liber di fossil entrante 2020 tambe a resulta un fracaso apesar di gasta hopi placa den organiza conferencianan y trece invitadonan caro bin papia. Nos por mira diferente proyectonan y buya di Mike Eman no a resulta.

Ainda na WEB tin e bus electrico para ta frustia.  Segun Parlamentario mr. Juan E. Thijsen Mike Eman no a sa di planea su vision. Berdad e desaroyo di energia alternativa lo ta bon pa Aruba, y su preparacion lo mester a cuminsa cu educacion, leynan etc. locual Mike Eman no a haci.

Ta te recien por a wak TNO haci algo pa cu energia solar den educacion na scolnan cual segun Parlamentario mr. Juan E. Thijsen ta algo positivo. Si bo wak bon loque Mike Eman a haci ta inverti pa mundo bira consciente di energia alternativa pero ya caba e mundo y hasta Aruba ta consciente.

Un otro soño di Mike Eman di haci Aruba un hub entre Europa y America tampoco a duna ningun empleo y no a amplia e comercio local. Parlamentario mr. Juan E. Thijsen ta kere cu pa Aruba ta mihor promove comercio local pa haci negoshi cu tanto Europa y America. Pero e trato di Gabinetenan Mike Eman tabata masha mal mes pa e comercio na unda obranan publico a causa hopi ciere di negoshi y perdidanan grandi cerca e comercio.

Ta bin acerca cu gobierno di AVP ta masha corompi y esaki ta stroba e comercio di bai dilanti. Profesor de Vries a skirbi den un rapport pa Universiteit:  “Het algemene functioneren van de overheid, haar relatie met het bedrijfsleven en de informatievoorziening door de overheid wordt steeds als net niet voldoende beoordeeld”.

Segun Parlamentario mr. Juan E. Thijsen ta resalta e mencion den e rapport di  “vriendjespolitiek, smeergeld en corruptie.” Cu esaki ta sucede nos por a mira den e dia aki.

Pesey mes segun Parlamentario mr. Juan E. Thijsen a yega e momento pa para e bagamunderia aki y pone un gobierno cu bon vision, bon prioridadnan, capacita, no corupto y cu e mentalidad pa yuda hiba nos comercio dilanti tanto localmente como yuda nan yega den exterior. Segun Parlamentario mr. Juan E. Thijsen su persona y partido MEP ta cla pa e cambio sin miedo. Aruba merece mihor.

 

 

 

- Advertisement -

DUNA COMENTARIO

Please enter your comment!
Please enter your name here