Home Social Ayera a celebra Dia internacional di Famia cu S.S. di Misa na...

Ayera a celebra Dia internacional di Famia cu S.S. di Misa na Pos Chiquito

25
0
SHARE
- Advertisement -

ORANJESTAD(AAN)–  Ayera a celebra Dia Internacional di Famia 2017 cu un santo sacrificio dimisa na capiya Santa Famia na Pos chiquito. Esaki hunto tambe cu Fundacion Pro Famia
Feliz.

E tema di Nacionnan Uni pa 2017 ta :”Families, education and well being– Famia, educacion y bienestar. Dia Internacional di Famia ta ofrece nos “tur” un oportunidad pa pone mas atencion riba e rol di Famia den desaroyo, tuma nota di necesidadnan di Famia, comparti ideanan pa mehora bida familiar! Henter comunidad mester ta mas conciente cu – “Famia ta e curason di nos Sociedad” – nos ta nace den uno, unda mayoria di e añanan di mas importante di nos desaroyo, nos a pasa creciendo cu nos “Famia”!

Pero bida di cada famia ta diferente y nos mester reconoce y realisa esey. Aki na Aruba nos tin Famia di hopi nacionalidad, cu diferente structura, creencia cultural, nivel nan socio-economico, religion, lenga materno, etc.!! Observando tur aña Dia Internacional di Famia, ta refleha e importancia pa “bida di Famia”!

Un oportunidad pa demostra apoyo na Famia. Tur Gobierno, Organisacion, Fundacion, Instituto Educacional y tambe tur Individuo, ta ser encurasha pa organisa actividadnan pa Famia riba e dia aki. Cantidad grandi di pais ta haci esaki tur aña!!  Mester crea mas programa unda enfoke riba Famia y Muchanan ta prioridad.

Enfocando riba programa y servicio nan comprensivo cu ta pa henter famia bibando hunto bou di e mesun dak. Na momento cu un Famia ta sinti nan mes sigur, ta sano y financieramente stabil, ta biba na pas cu otro y asina ta feliz, mayoria biaha un famia asina ta alcansa tur meta nan a pone pa nan mes y pa nan yiunan.

Un Famia cu ta stabil y tin siguridad, yiunan mayoria biaha ta lanta sano y cla pa enfrenta un bida di educacion cu hopi bunita principio. Norma y balornan halto, amor pa nan famia y nan prohimo. Na momento cu esnan cu ta encarga pa cuido di un mucha, dus mayornan, welonan, yiunan mas grandi, voogd nan, etc., pone hopi mas atencion na e puntonan ariba menciona, nos sociedad lo cuminsa crece bek na e “norma y balornan cu nos ta bisa a bai perdi aki na Aruba”!

Nos tur aki na na Aruba, sin excepcion di clase, por haci un diferencia pa den tur hogar aki na Aruba tin e educacion debido, tin e bienestar di nan famia (pareha) y nan yiunan, na pecho, na prome lugar. Ora Tur instancia ariba menciona cuminsa traha hunto den e direccion aki, nos lo “logre”!! Nos tur, y no e gobierno só, mester cuminsa yuda pa aki na Aruba tur Famia, sin excepcion, tin un hogar, cuminda “nutritivo”, acceso na cuido medico, educacion, siguridad y stabilidad.

Un hogar unda mayornan tin tempo pa nan yiunan, ta laga nan mira y sinti kiko ta amor pa otro, ta duna ehempel nan di norma y balor. Tin hopi mayor cu ta pensa cu nan ta duna nan yiu tur cos, pero esun di mas importante cu ta amor, no ta presente den e hogar, den e famia. Ta hopi Tata ta duna nan yiu hopi amor, hopi atencion, pero ta faya den e cos di mas importante cu un Tata por duna nan: Esey ta di laga nan mira y sinti cu e ta stima y respeta nan Mama. Esaki  ta conta pa e Mama tambe.

Hopi biaha mayornan ta pone demasiado atencion na e cosnan cu placa por cumpra, sin realisa cu nan ta perdiendo e cosnan cu placa no por cumpra, manera principio y balornan di Bida. Si atrobe nos kier pa nos mira y sinti e norma- y balornan di bida aki den nos hogarnan na Aruba, nos mester bolbe bek na e Principio. E Principio ey ta Dios. Nos como mayor mester duna nos yiunan e bon ehempelnan cu nan tin mester pa yuda nos sociedad di futuro bira uno miho. Na momento cu nos como Mayor duna nos yiunan un “Educacion” completo creciendo bou di nos encargo y pone “Bienestar” nos relacion y di nos yiunan na prome lugar, nos lo yuda sigur pa cu esey!

Fundacion Pro Famia Feliz (FPFF) ta un organizacion cu tin como su meta pa yuda mayornan hasi di e Famia un base solido, unda cada miembro di e famia por biba na paz cu su mes y cu e otronan y lo sa di duna otro amor, respet y comprencion. Pa medio di programanan pa Pareha, Novionan, Yiunan y tambe pa Famia completo y usando manualnan, Fundacion Pro Famia Feliz kier yuda engrandese bida familiar aki na Aruba.

E programanan ta basa riba un methodo cu ta wordo usa Internacionalmente den tur 5 Continente y ta enfoca hopi con pa yuda enriquese e bida Spiritual di cada persona, e Pareha y e Famia completo den cas, unda Cristo Hesus lo ta central den e Hogar ey. Si nos como mayor ta stima nos yiunan di berdad, ta nos mester encurasha nan pa tin Cristo Hesus central den nan Famia na momento cu nan forma nan Famia.

Nan Hogar mester ta forma riba principionan Cristian. Nos mester yuda nan pa nan bira consciente cu nan hogar ta un iglesia domestico berdadero, unda cada miembro di e famia ta invita pa bira un testigo bibo di e Bon Noticia di bida den nos Iglesia y tambe den nos Sociedad. Ta e deseo ferviente di Iglesia Catolico pa ta presente y pa compaña parehanan for di momento cu nan cuminsa prepara nan matrimonio y keda hunto cu nan den tur fase di nan bida.

Fundacion Pro Famia Feliz ta desea henter nos dushi pueblo di Aruba un feliz y bendiciona dia di Famia 2017.

- Advertisement -

DUNA COMENTARIO

Please enter your comment!
Please enter your name here