Home Enseñanza Aymara Franken di IPA ta splica tocante viahe di pasantia na Puerto...

Aymara Franken di IPA ta splica tocante viahe di pasantia na Puerto Rico

22
0
SHARE
- Advertisement -

ORANJESTAD (AAN) – Den entrevista cu nos redaccion, e studiante di Instituto Pedagogico Arubano Aymara Franken, a duna Matutino DIARIO informacion, tocante e viahe di pasantia cu hunto cu su colega Vanessa de Cuba, a efectua na Puerto Rico.

Na Puerto Rico nan a pasa cinco siman y e meta di e pasantia aki tabata pa investiga e cultura di Puerto Rico y con nan ta haci pa conserva esaki, siendo cu ta cultura inmaterial.

Aymara a splica cu na Puerto Rico nan ta incorpora hopi e cultura inmaterial como material den nan educacion.

Desde chikito nan ta siña e muchanan poemanan di Puerto Rico, aprecia esaki y pa nan mes inspira y skirbi nan propio poema, por ehemplo di nan pais.

E dama a subraya cu ta hopi importante pa nos conserva nos cultura, pasobra hopi di nos muchanan no conoce nos cultura manera mester ta y hopi di nos mayornan mes, no sa e cultura concreto di Aruba y esaki ta importante pa nos conserva.

Nota di redaccion: ta importante aki pa elabora  sumamente en breve, tocante kico ta cultura inmaterial y kico ta cultura material.

Cultura inmaterial ta e patrimonio cu ta wordo transmiti di un generacion pa otro, y cu ta duna sentido na nos identidad y cu e comunidadnan ta percura pa continua y mantene, por ehemplo e folklore, literatura (poesia, historia, storianan, actuacion, etc), kiermen e parti cultural no tangible.

Cultura material ta locual nos antepasadonan a laga pa e generacionnan siguiente, manera obhetonan cu ta wordo haya den excavacion, artesania di prome y di awor, monumentonan historico, pinturanan, etc. Pero generalmente inmaterial y material ta wordo fusiona cu otro pasobra ta casi imperceptible un linea cu por separa un di otro, ya cu e cultura a desaroya na prome lugar for di un idea, un pensamento, cu na dado momento a bira un obra.

Interesante pa bisa tambe ta cu cultura y comunicacion ta mara na otro, cuminzando pa e sonidonan  cu tabata wordo emiti for di e epoca prehistorico te cu desaroyo di idioma papia y skirbi. Ya e jeroglificonan skirbi riba murayanan di cueba tabata caba e prome legado historico y por consiguiente cultural, hopi importante pa cada comunidad.

 

- Advertisement -

DUNA COMENTARIO

Please enter your comment!
Please enter your name here