Home Economia Banco Central di Aruba tocante “Maneho monetario (Maart 2017)”

Banco Central di Aruba tocante “Maneho monetario (Maart 2017)”

9
0
SHARE
- Advertisement -

Durante e reunion di dia 9 di Maart 2017 e Comite di Maneho Monetario (CMM)[1] di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki.

Reservanan internacional

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di Januari 2017. Ambos a registra aumentonan di, respectivamente, Afl. 59,8 miyon (+3,2porciento) y Afl. 16,7 miyon (+1,0porciento), compara cu December 2016. Consecuentemente, e reservanan internacional y e reservanan oficial a crece, respectivamente, te na Afl. 1.952,2 miyon y Afl. 1.689,9 miyon na fin di Januari 2017.

Desaroyonan den credito

E crecemento di credito total di e banconan comercial a mengua cu 0,2porciento na final di Januari 2017 compara cu December 2016. Credito na empresa, fiansa pa construccion di cas y credito na consumidor a baha cu, respectivamente, 0,1 porciento, 0,1 porciento y 0,8 porciento na Januari 2017 compara cu December 2016.

Inflacion

Na Januari 2017a registra deflacion den e prijsnan compara cu e aña anterior (−0,4 porciento)como tambe den e promedio anual di inflacion (−0,9porciento). E prome ta principalmente causa pa un reduccion den e tarifa di coriente (Januari 2017), cual a wordo parcialmente mitiga pa un subida den e componente di transporte di e Indice di Prijs di Consumo (CPI). E bahada den e promedio di inflacion ta debi na e promedio di prijsnan di gasoline mas abou y un reduccion den e tarifa di coriente (Januari 2016). E promedio di inflacion ora exclui e componentenan di cuminda y energia a yega na 0,4 porciento, primordialmente reflehando un aumento den e componente di vivienda di e CPI.

Turismo

Na Januari 2017, indicadornan di turismo a sigui mustra señalnan di debilidad, como cu a nota caidanan den e cantidad di bishitantenan (−14,2 porciento), anochinan permaneci na Aruba (−6,6 porciento) y turistanan crucero (−11,7 porciento).Sinembargo a nota un subida den e ingresonan turistico registra na banconan comercial (+4,9 porciento), compara cu e mesun luna na 2016.

Placa den circulacion

Na Januari 2017 e cantidad di placa den circulacion a subi cu Afl. 38,8 miyon te na Afl. 4.205,3 miyon, compara cu e luna anterior. E aumento aki ta debi na compranan neto di divisa cual a resulta di ingreso turistico cu a surpasa pagonan neto pa bienes y servicionan.

 

Mercado financiero

Na Januari 2017 a nota un aumento den e promedio di interes riba prestamonan nobo (+1,0 punto di porcentahe te na 7,9 porciento), mientras cuun bahada a wordo registra den e promedio di interes riba depositonan nobo (−0,7 punto di porcentahe te na 1,3 porciento), compara cu e luna anterior. Consecuentemente, e margen di e tasa di interes riba prestamonan nobo a aumenta cu 1,8 punto di porcentahe te na 6,6 porciento.

Advance rate

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,35 punto di porcentahe na Januari 2017. Consecuentemente, no tabata tin razon pa cambia e “advance rate” di BCA.

[1] E CMM a ser institui na Mei 2010 pa periodicamente evalua y determina e maneho monetario di BCA. Adicionalmente, CMM ta aspira pa mehora e transparencia di maneho monetario.

- Advertisement -

DUNA COMENTARIO

Please enter your comment!
Please enter your name here