Home Enseñanza Celebracion di e di 14 aña di oficialisacion di Papiamento tabata festivo,...

Celebracion di e di 14 aña di oficialisacion di Papiamento tabata festivo, educativo y ameno

13
0
SHARE
- Advertisement -

ORANJESTAD(AAN): Fundacion Lanta Papiamento (FLP) a celebra e di 14 aña di oficialisacion di Papiamento y su di 8 aña di existencia cu un anochi balansa. “Pabien Fundacion Lanta Papiamento y sigui cu e bunita trabao”, tabata expresion di algun hende cu tabata presente dialuna na Biblioteca Nacional Aruba.

Michelaine Abreu a habri e anochi, cantando nos Himno di Aruba, estilo a capella.

Señora Etlien Croes, presidente di Fundacion Lanta Papiamento a duna un palabra di bon bini na tur esnan presente. Señora Croes a elabora den su speech cu oficialisacion di un idioma so no ta nifica nada, si e pueblo no ta balor’e. Señora Croes a pidi esnan presente pa hiba e mensahe rond, cu nos mester ta mas consciente di e balor cu un idioma tin pa su pueblo. E balor di identificacion, e balor educativo y e balor cultural.

Dayenne Gibbs, cu ta un alumno di school Multilinlingual Colegio San Hose, a alegra e anochi, declamando dos bunita poesia skirbi pa su wela Mercedes Petrochi.

Ramon Todd Dandaré Mag. Ling., un di e pilarnan den e lucha pa reconocemento di Papiamento, a presenta un charla di kita sombre skirbi pa Joyce Pereira, kende pa motibonan inespera y fuera di su control, no por tabata presente. Ramon a elabora, reemplasando Joyce, riba e articulonan di e ley di oficialisacion di Papiamento, su puntonan positivo y su puntonan negativo y discriminatorio. Pronto FLP lo publica e ley di oficialisacion traduci na Papiamento.

Drs. Merlynne Williams ta docente y investigado di idioma na IPA y ta miembro di directiva di FLP. Desde 2010 Señora Williams ta haci investigacion den cuadro di Proyecto school Multilingual. Merlynne a presenta resultado di un investigacion comparativo entre e programa multilingual (idioma di instruccion ta Papiamento) y e programa tradicional (idioma di instruccion ta Hulandes), cu a pone e publico reacciona cu hopi positivismo. Resultado ta mustra cu na final di klas 4, e alumnonan den e schoolnan multilingual ta score significativamente miho riba habilidadnan critico di siña compara cu e alumnonan den e schoolnan cu programa tradicional.

Maureen Molina-Luidens ta un Master den Educacion cu specialidad Papiamento, trahando na Departamento di Enseñansa. Maureen a presenta e Manual di Gramatica di Papiamento. Hopi hende ta ansioso pa cumpra e buki valioso aki.

Cesar Kelly ta un docente di EPB Hato y Cesar a splica: e uzo di e forma plural -NAN, p.e. e autoNAN. El a presenta diferente frase incorecto y frase sin sentido cu ta sali tanto den corant, como riba Facebook. Sr. Kelly a splica e regla di plural hopi cla pa medio di Powerpoint. E publico a reacciona agradecido pa e presentacion educativo aki. Tabatin hopi interaccion.

Mientras cu FLP tabata parti bolo y biña pa celebra y recorda e logro aki, señora Ludwina Geerman a declama un bunita poesia. Pa completa e anochi bunita aki, FLP a rifa 5 premio atractivo.

Na final e publico a participa den un quiz traha pa un docente di Papiamento, Juffrouw Candy Dirks. Juffrouw Candy lo coregi e quiznan na cas, pa asina por saca dos ganado. FLP lo avisa e ganadonan via nan telefon/e-mail y publica nan nomber via e medionan di comunicacion.

E publico tabata hopi entusiasma cu pregunta y comentario. Fundacion Lanta Papiamento ta gradici tur hende cu a haci e anochi aki agradabel y inolvidabel. Sin laga afo e miembronan di prensa y tur hende cu a propaga e actividad aki riba nan pagina di Facebook.

- Advertisement -

DUNA COMENTARIO

Please enter your comment!
Please enter your name here