Comerciantenan a tene accion di protesta na Playa

    277
    0
    SHARE
    - Advertisement -

    Ya caba 53 negoshi a cera caba na Playa y Comerciantenan ta pidi auxilio

    ORANJESTAD (AAN): Pa prome biaha despues di hopi decada, comerciantenan den Caya Grandi a dicidi na uni pa asina expresa nan disgusto cu e direccion cu Caya Betico Croes y vecindario ta bayendo.

    Desde cu a cuminza construi e caminda pa tram, y cambia downtown, y nunca mas a laga auto pasa den dje, por a mira caida den cumprador den e distrito comercial.

    Es mas, tin hopi hende cu desde cu e caya nobo a keda finaliza, cu ainda awor na Mei 2017, no a bay cana ni pasa mas eyden.

    Diamars mainta comerciantenan den Centro di Oranjestad a tene un accion di protesta, pa expresa nan mal contento.  Nan kier pa algo wordo haci, prome cu Caya Principal muri, y cu mas tienda cera.

    Caya Grandi ta un lugar cu tin hopi high-end Boutiques, tienda di marcanan renombra, y tambe esnan cu ta bende producto na prijs economico.

    Den un entrevista cu comerciante Tatiana Eman-Mallarino, el a declara cu mayoria di e comerciantenan ta exigiendo Gobierno pa kita klem y habri caya back pa trafico.
    Nan tin mas cu 2 aña ta sinta cu Gobierno, ta manda carta pa mira con pa soluciona e problema di Caya Betico Croes.  Contesta no ta wordo ricibi, pasobra e ta algo complica, cu ta haci e situacion aun mas dificil.

    Aworaki, tur comerciante apenas tin nan cabez na superficie, y algun ta halando ultimo rosea.  Peseo nan ta pidi pa kita klem cu ta un sistema agresivo y represivo cu nunca a worde educa p’e y cu ta un di esunnan mas caro na mundo.  Bo auto haya un klem, bo tin di paga 75 Florin.  Si bo compare cu e suma di 25 Florin di multa na Curacao, e ora bo ta haya cu esun di Aruparking ta un abuso.

    Tambe, nan kier pa habri caya back.  Por siña un tiki antes con Gobierno di MEP a yega di cera Promenade na San Nicolas net den tempo di su gloria.  Den apenas algun siman, benta a cay drasticamente y ora cu Diputado a core manda orden pa DOW habri Promenade bek y pone un caminda di asfalt.. ya ta mucho laat.  Te awe ainda na 2017, nunca mas Promenade na San Nicolas a lanta cabez bek riba awa.

     

    HABRI CAYA BEK

    Na Aruba tambe, Caya Grandi tabata un ‘showcase’ cu tur hende gusta pasa den dia of anochi cu auto.  E ta un cultura na Aruba pa keiro den caya. Tabata tin hendenan grandi, hendenan cu no tin cierto habilidadnan, cu por a baha un rato, nan ta cumpra algo, ta dal un rond y piki nan back.
    Tambe, no tin windowshopping. No tin e posibilidad pa wak kico tin den e showcasenan pa e siguiente dia pasa. Y tiki tiki e tiendanan ta muriendo. No ta mas momento pa sinta, pa tin reunion, pa warda riba evaluacion, pa manda mas carta.
    E momento a yega pa tur hende wak, henter e comunidad di Aruba. Cu e comerciantenan ta haciendo un suplica pasobra si sigui asina, tur lo tin cu bay cera su portanan.
    Segun e comerciantenan, ya caba 53 negoshi a cera caba y ainda tin hopi mas cu un djis nan ta bay sigui cera. Esaki ta un problema cu no ta solamente economico, pero tambe di embergadura social. Hopi famia ta kedando sin nan entrada y hopi mas lo keda tambe sin nan pan.

     

    TRES NEGOSHI MAS CERANDO:
    Kiermen, esaki ta algo cu ta bay ta un domino effect. E ta afectando awor aki, pero sigur e lo afecta henter e comunidad na Aruba.
    Pa luna di Mei, tin tres negoshi mas ta cerando e luna aki y tin informacion cu tin negoshi cu ta wardando tambe Juni pa nan cera.

    Awor aki no tin mas paso pa tuma. Mayoria di e tiendanan ta cera y esey ta un muestra di loke ta bay pasa si e gobierno aki no ta scucha e exigencianan. Tur ta bay cera e portanan. E caha di Gobierno tambe ta worde afecta cu esaki. Kiermen, no ta compronde kico ta e motibo pa no cumpli cu e peticion. Mirando cu prome cu caya a worde traha, Gobierno a contrata un grupo di experto y expertonan mes a recomenda pa no cera caya. Toch nan a bay contra conseho di expertonan. E comerciante y pueblo en general ta pidi pa kita klem, medida represivo y habri caya back pa trafico.

    Algun ora despues, den Sala di parlamento mes, Premier Eman a priminti cu lo bay elimina klem.

     

    - Advertisement -

    DUNA COMENTARIO

    Please enter your comment!
    Please enter your name here