Home Estilo Con bo ta siña hende pa trata bo? Parti 2

Con bo ta siña hende pa trata bo? Parti 2

56
0
SHARE
- Advertisement -

Un articulo cu por yudabo crece den caracter….

drs. Marisol M. Krosendijk, sicologa

Pone limitenan saludabel

Parti 2

E ta cuminsa cubo

E proceso di pone limitenan personal ta cuminsa cu bo mes primeramente aceptando cu bo no solamente merece di tin limitenan pero cu nan ta elementonan critico di bo mes cuido. Na di dos lugar, bo mester acepta cu bo tin e derecho di fiha nan. Esaki por zona straño pabo, pero mi tawata conoce hende cu genuinamente no tawata realisa cu esaki tawata un opcion!

De hecho, bo no solamente tin e derecho, pero tambe e responsabilidad di determina con otro ta trata bo. Bo limitenan ta fungi como filternan permitiendo locual ta aceptabel den bo bida y kiko no.

Naturalmente lo tin ocasionnan  cu un hende genuinamente mester di bo ayuda y ta puntra cu respet, y despues di tur cos, tin un gran diferencia entre ta firme y inflexibel. Acepta cu e lo tuma tempo, cierto experimentacion y probablemente bo lo trompica un par di biaha, pero bo lo siña con pa hasi e distincion entre un peticion aceptabel y un cu ta ponebo den e riesgo di cay bek.

Identifica bo necesidadnan

E di dos stap ta pa bo identifica ora bo mester mas espacio, respet propio, energia of poder personal y esaki lo requeri dibo pa bo bira mas consciente di bo mes. Cuminsa pa identifica patronchinan di situahonnan cu ta ripiti of comportacionnan cu ta laga bo ta sinti amarga, sin energia, cu mal stoma, of depresivo.

Ora bo identifica situacionnan specifico, mi kier pa bo skirbi esakinan den un notebook, mihor ainda un diario personal. No worry cu bo abilidad di skirbi, e ehercicio aki ta pa yudabo clarifica locual ta pasando. E motibo pakiko esaki ta importante ta pasobra mas liher cu nos ta realisa algo (of un hende) ta bira un boton cayente pa nos, pero esaki no ta e problema en absoluto.

Por ehempel, bo por ta focus yen di energia negativo riba bo ruman muher su habito di laga su yuinan atras cerca bo pa bo wak pa nan sin cu e ta puntra of yama di antemano. E berdadero problema no ta bo ruman, sino e ta cu bo no ta sinti respeta y ta bou e creencia falso cu djiez pasobra e ta un pariente bo ta atrapa y no por bisa nada. Wel, aki e bon noticia….bo ta absolutamente permiti pa pone limitenan cu famia!

Defini bo limitenan

Si bo ta nobo na pone limitenan pa bo mes, mi ta recomenda bo pa cuminsa chikito. Maske bo tin un area cu ta hasi bo loko, ta mihor pa bo focus riba un comportacion of situacion cu no ta peligroso pa asina bo por bira confortabel cu e proceso di identifica y claramente comunica bo necesidadnan.

E fout cu yen di hende ta hasi ora nan cuminsa pone limitenan cu nan mester a pone hopi tempo pasa ta cu nan ta sali di un lugar di frustracion y resentimiento, y esaki sigur ta e receta pa fayo y conflicto innecesario. Crea limitenan fuerte y sostenibel tin ful di haber cu e actitud cu bo ta drenta cune, asina ta cu e ta mihor pa bo aserca e proceso aki cu compasion pa otro pero tambe pa bo mes.

Usa un notebook of diario, defini e limitenan cu bo kier hunto cu locual ta comportacion aceptabel y inaceptabel- den otro palabra, esaki ta unda bo ta dicidi unda pa trek e linja.

Comunica bo limitenan

Ora ta tempo pa implementa bo limite nobo laga bo experiencia y nivel di comfortabilidad guia bo. Enbes di hasi un declaracion formal inespera, un manera pa deal cu esaki ta di tuma bentaha di un scenario tipico di e comportacion inaceptabel.

Laga nos bai bek na e ruman muher. Dor cu ba deal cu su comportacion den pasado, probablemente e no ta bon idea pa djiez sera e porta den su cara e siguiente biaha cu e bin serca bo cu e muchanan. Locual bo por hasi ta encarga bo mes di e muchanan promer y despues puntra pa algun minuut di su tempo promer cu e bay. Despues splica cu pabo semper e ta un grato placer pa wak e y e muchanan (maske bo no ta enjoy esaki, hari y wanta esaki na e momento), pero bo berdaderamente mester e pa cuminsa puntra di antemano si bo lo ta disponibel pa wak e muchanan. Usa bo mes palabranan, ta amabel, pero no sinti cu bo mester splica bo mes of pidi disculpa. Tin hende lo purba hasi bo sinti culpabel pa asina nan por manipula bo den hasi algo cu bo no kier, pero si bo ta kere den bo mes y tin confiansa cu bo ta hasiendo lo corecto, e ora bo lo wak cu e problema ta di nan, no dibo.

Surpasa culpa y resistencia

Ta prepara, bo mester ta cla pa hasi cambionan difisil pa asina cambia bo forma di biba y culpa ta e obstaculo mas comun ora ta trata di cuida pa bo mes. Djiez keda corda bo mes pakiko bo a establece bo limitenan na promer lugar. E hendenan envolvi por ta defensivo y por hasi cu bo ta retrocede cual sigur lo hasi bo sentido di culpa mas grandi. Mayoria di hende lo custuma cu e limitenan despues di tempo, pero tin cu lo abandona bo a resultado di bo perspectiva nobo y bo demanda pa respet. Esey realmente ta ok pasobra bo no lo kier hendenan den bo bida cu ta compromete bo balornan, integridad y respet propio.

Kere y tin confianza den bo mes

Niun hende no sa mihor cubo locual bo mester, kier y ta balora. No laga ningun otro hende hasi decisionnan pabo. Limitenan saludabel ta hasie posibel pa bo respeta bo forzanan, abilidadnan, y individualidad mescos cu esunnan di otro. Pone limitenan transparente y decisivo pa asina otronan respeta nan, y despues ta dispuesto pa hasi locual ta necesario pa implementa nan.

Tin pasenshi

Acepta cu e cambio aki no lo pasa di mainta pa anochi. Laga los  di e emocionnan y creencianan cu a conduci bo na acepta limitenan debil ta requeri pasenshi y practica.

E bon noticia ta cu manera bo ta defini y implementa limitenan personal pa bo bida, bo lo sinti mas empodera y cu confiansa den bo mes pasobra bo ta comunicando bo balor propio na esnan rond dibo. Lo mas cu bo practica wanta na bo limitenan, mas amor, respet y apoyo bo lo haya den bo bida.

Recordatorio di dia:

Con bo ta trata bo mes ta con abo ta invitando otro pa trata bo. E manera cu hende ta trata bo ta bisa hopi di nan como ser humano. E no ta un resumen di ken abo ta pero mas un resumen di ken anan ta. Trata bo mes na e manera cu bo kier wordo trata dor di otronan. Respeta bo mes, of ningun otro hende lo respeta bo. Bo tin cu siña otronan con pa tratabo cu bo comportacion: locual bo ta permiti, locual bo ta stop, y locual bo ta duna forza. Si bo no ta honra, impone y respeta bo mesun limitenan, ningun hende lo hasi esaki. Nos ta siña hende con pa trata nos na e manera cu nos ta trata nos mes y con hopi nos ta laga nan hasi ki nan kier cu nos. Stop di permiti hendenan den bo bida cu no tin respet pabo, cu ta cruel, cu ta exigente of cualkier cos asina. Tuma responsabilidad pa bo mes, pa bo tempo y pa con bo kier wordo trata. Stima bo mes suficiente pa pone limitenan. Nos tur ta humano, nos niun no ta perfecto, pero nos ta crece tur dia si nos tin boluntad pa esaki.

- Advertisement -

DUNA COMENTARIO

Please enter your comment!
Please enter your name here