Home Hudicial Diabierna den corte caso di homber sospecha di a maltrata severamente baby...

Diabierna den corte caso di homber sospecha di a maltrata severamente baby di 7 siman

233
0
SHARE
- Advertisement -

ORANJESTAD    (AAN)  – Na Maart 2017 e caso a bolbe wordo posponi pa diabierna mainta. For di November 2016 e homber J.T.(28) ta scucha cu e caso ta wordo posponi. Na November 2016 tabata pendiente mas investigacion. Na Maart 2017 a bolbe pospone e caso pasobra e raport di experto no ta cla.

MALTRATA BABY SEVERO

E acusacion contra J.T. ta cu entre 8 y 10 Maart 2016, el a maltrata severamente su yiu homber baby di 7 siman. E maltrato ta cu e baby di 7 siman tabatin ripchi kibra, weso na pia kibra y sla na cabez.

Na November 2016, Hues a pospone e caso pasobra na opinion di Hues, e raport di dokter di mucha no ta duna suficiente informacion. Hues kier sa kico a causa e lesionnan severo na e baby. Hues a pospone e caso y riba insistencia di abogado mr. Zara, Hues a dicidi di laga e sospechoso liber pendiente di e caso. Fiscal no a gusta y a apela e sentencia. Den un siman di tempo e apelacion a wordo trata y Hof a dicidi cu mester detene J.T. y el a wordo hiba bek KIA.

Na Maart 2017, Fiscal a bisa cu e por a compronde cu ainda e raport di e experto no ta cla. Fiscal ta haya cu lo mester pospone e caso.

Na Maart 2017, abogado mr. Zara a bolbe pidi pa laga e sospechoso liber. El a mustra cu ya caba su cliente tin 12 luna sera den KIA. E abogado a mustra cu Hof den su evaluacion pa laga J.T. sera a bisa cu e castigo lo por ta 24 luna di cual 6 luna ta condicional. El a bisa Hues cu si calcula tur cos, su cliente lo por haya libertad. El a mustra cu ainda e investigacion no ta cla.

Fiscal a opone riba peticion di abogado. El a adverti cu e castigo cu e lo bay exigi, lo bay ta mas halto. Pesey el a pidi pa rechaza esaki. E ta haya cu e abogado no a argumenta motibonan. E ta cu ta trata aki di un caso hopi serio di maltrato severo di un baby di 7 siman.

E sospechoso mes a bisa Hues cu e tin 12 luna sera inhustamente ya cu e ta inocente. Segun J.T., e mama di e baby mes a bisa cu J.T. no tabata na cas. E no ta compronde pakico e ta keda encarcela.

Hues a bisa J.T. cu e ta encarcela riba sospecho di maltrato severo. Riba dia di e caso lo bay mira si e ta culpable of no.

Hues ta haya cu no tin base pa laga e sospechoso liber, aunke cu e ta haya cu e sospechoso tin asina tanto tempo sera pa e investigacion di e caso. Hues ta haya cu ta hopi fastioso cu un biaha mas mester a pospone e caso. Hues a bisa cu a pidi investigacion pasobra ta un caso hopi serio.

Awe mainta J.T. ta presenta den Corte y DIARIO lo informa lectornan kico tur a sosode.

 

- Advertisement -

DUNA COMENTARIO

Please enter your comment!
Please enter your name here