Home General Diario ta lanza imagen nobo despues di mas cu 30 aña di...

Diario ta lanza imagen nobo despues di mas cu 30 aña di existencia

668
1
SHARE
- Advertisement -

Oranjestad (AAN): Ya caba tur hende ta papia di e imagen nobo di e corant mas lesa na Aruba cu por wordo admira riba nan website y plataforma social. E cambio aki a bin despues di un estudio cu professionalnan di e compania local, Presstiza Marketing & Advertising Agency, a conduci pa trece lectornan cu un imagen nobo pero cu e mesun caracter di esun anterior.

E siman aki, Diario a debuta un imagen nobo riba mercado cu ta inclui un logo nobo y strak, lay out moderno visibel den e corant como tambe riba e website marcando asina e prome cambio di mercadeo despues di mas cu 30 aña.  E cambio aki a bin despues di 1 aña ta trahando cu professionalnan di Presstiza Marketing & Advertising Agency cu a haci esaki posibel.

“Nos a dicidi di transforma Diario completamente pasobra e compania tin proyectonan grandi den futuro” asina Jossito Mansur, director di e departamento di  noticia a comenta. “Nos ta cambiando e manera di trece noticia pa uno mas moderno pa tene comunidad informa na cada momento di e dia. Di awor padilanti henter e comunidad lo wak Diario den otro wowo, mas focus pa trece informacion di calidad y confiabel na tur nos fiel lectornan.”

“E logo ta hopi simpel y facil pa reconoce ya cu esaki lo wordo imprimi tur dia pa tur esnan cu ta lesa corant pero tambe pa esnan cu ta buska noticia riba nan telefon, computer of tablet”asina Tamara Quevedo, director di Presstiza a splica. “Henter e identidad nobo di Diario a wordo crea den un systema cu ta apoya e strategianan cu Diario lo sigi opera awor padilanti.”

E website ta esun di mas moderno na Aruba cu dentro di poco lo trece mas noticia y contenido riba diferente area. “Nos mester a bin cu e cambio aki, pa sigi ta e compania activo y confiabel di semper awor cu mas reto dilanti, pa complace tur nos lectornan” Mansur a conclui. Diario lo bin cu campaña tur luna den forma di video y arte professional como parti di e imagen nobo pa mustra tur lector cu e iniciativa aki ta uno sigur y permanente.

E identidad nobo di Diario ta visibel riba nan website www.diario.aw tambe riba plataformanan social pa keda informa cu noticia confiabel di semper.

 

- Advertisement -

1 COMMENT

DUNA COMENTARIO

Please enter your comment!
Please enter your name here