Home Hudicial Dos aña di prison exigi pa homber sospecha di a maltrata su...

Dos aña di prison exigi pa homber sospecha di a maltrata su baby di 7 siman severamente

567
0
SHARE
- Advertisement -

ORANJESTAD (AAN): E sospechoso di inicial J.T., kende tin 28 aña di edad, ta para riba cu e no a haci nada y ta inocente, ayera mainta a scucha Fiscal exigi 30 luna di prison di cual 6 luna ta condicional. Abogado mr. Zara ta haya cu no tin prueba cu ta mustra cu ta J.T. realmente a maltrata e baby. Hues a bisa cu e ta bay studia e caso y otro luna tin sentencia.

Fiscal a acusa J.T. cu entre 8 y 10 Maart 2016 el a maltrata severamente su baby di 7 siman caminda el a causa fractura ripchi, weso di pia y sla na cabez. Fiscal ta considera esaki maltrato severo.

    MALTRATO BABY:

Hues a bisa cu e dama B., mama di e baby, a haci denuncia. El a bisa cu e y J.T. no kier a sigui cu otro pero door di cu B. tabata na estado, nan a dicidi keda cu otro. E baby tabata yora hopi y ora J.T. yega cas, e tabata rabia cu e baby ta yora.
E baby a kibra weso di wega di funchi (sleutelbeen) door cu un otro mucha a cay riba dje.

Dia di e incidente, segun B. el a laga e baby riba cama y J.T. tabata den baño. Ora el a yega cas, J.T. a reclama cu el a laga e baby su so y cu e criatura a cay entre muraya y cama. B. a declara na Polis cu e baby tabata hincha y cora. Na opinion di B., J.T. a duna e baby respiracion artificial. Anochi e baby a cuminsa yora. J.T. bay cu e baby den baño y a bay baña y a papia duro cu e baby cu e no ta e baas den cas. Su siguiente dia B. a mira pia di baby blauw y a dicidi di bay dokter. Segun B., J.T. a puntra kico e lo bay bisa dokter. A palabra cu e mucha a cay.

E sospechoso a remarca na Hues cu loke e ta bisando no ta cuadra cu loke e tin den e procesverbaal cu e tin di B. Parce cu J.T. tin un di e declaracionnan y Hues tabata lesando un declaracion di un otro interogacion cu a sosode. Despues a resulta cu lo tabatin bruhamento pero basicamente ta e mesun contenido. J.T. a bisa cu e incidente di baby contra muraya y cama ta 8 Maart 2016 y B. ta papia di 9 Maart pero esey no ta asina.

Hues a bisa J.T. a declara na Polis cu tin dos incidente. Dia 8 Maart 2016, J.T. tabata den baño y a scucha e baby ta yora. El a kere cu B. lo atende e baby. Ora el a scucha cu e baby ta sigui yora el a sali for di baño y a haya e baby entre e cama y muraya. El a trata e mucha y a yama B. dos biaha pero no haya contesta.

Ora B. a yega el a reclama B. pakico el a bay laga e mucha sin bisa nada. El a hala atencion cu otro biaha e mester bisa.

J.T. a remarca cu B. ta bisa cu J.T. a hinca dede den boca di mucha y duna respiracion pero esey no ta berdad. J.T. a bisa cu dia 9 di Maart 2016, tur cos a bay bon y dia 10 di Maart 2016 tur cos a bay bon te atardi. El a sali cu un amigo W. y ora el a bin cas el a haya su baby ta yorando.

El a puntra B. kico a pasa cu e baby. B. a bisa cu e no sa. Ora J.T. a check e baby su pia tabata kibra. A dicidi di bay hospital. El a bisa B. cu si no bisa algo drechi, nan lo kita e baby for di dje. Asina a palabra cu e baby a cay. B. a bay cu e baby hospital. Su siguiente dia J.T. y B. a bay papia cu dokter y despues dia 16 di Maart el a worde deteni.

Hues a bisa cu e padastro di J.T. a bisa cu el a papia cu J.T. y J.T. a bis’e cu B. a bay laga e baby siendo e tabata den baño y a haya e baby contra e muraya y cama.

Hues ta mustra cu B. ta bisa cu un biaha e baby a cay y a kibra weso. Tambe el a bisa cu J.T. tabata dal e baby ora e yora na su cabez. Segun J.T. e dalmento no ta berdad. El a bisa cu semper el a worde educa pa papia cu mucha. El a splica con su tata a lant’e.

   RAPORT NFI:

Hues a mustra cu e dokter na hospital a check e baby y a constata cu e baby a worde maltrata. Tambe e dokter a bisa cu e ta constata cu e baby ta den trauma. A dicidi pa acerca Instituto Forense Hulanda (NFI) pa evalua tur cos y a haya raport di un experto. E experto no por bisa con e pia di e baby a kibra. Segun e experto di NFI, e sla na cara por ta door di a cay entre cama y muraya. E no ta exclui cu e mucha por a move y bay cay. E expert no ta kere cu ta un accidente cu e mucha a kibra su pia.

Ta asina cu J.T. tin tres yiu cu tres diferente muher. E relacion cu B. a caba. Hues a puntre kico lo bay haci ora e sali di KIA. El a bisa cu ora e sali e ta bay traha y keda cerca su tata. J.T. a bisa cu e tin mas cu 14 luna sera.

Hues a bisa cu segun e raport di psycologo, e no ta mira cu J.T. tin problema mental. Si e psycologo a señala cu J.T. tin tendencia di ta cabez duro y paranoide, actua pa su mes. E ta haya cu ta importante pa J.T. haya tratamento pa controla su mes.

    EXIGENCIA DI FISCAL:

Fiscal ta haya cu tin prueba legal. El a mustra riba declaracion di mama di e baby, B., riba 12 Maart 2016 ora cu el a haci denuncia. Fiscal a sigui bisa cu tin declaracion di dokter di mucha cu ta indica cu e baby a worde maltrata. J.T. mes a declara 16 Maart 2016 y testigo W. a bisa cu e no a bay cerca J.T. Ora cu el a worde confronta cu declaracion di J.T., el a corda cu si el a bay cu J.T. na un supermercado. E otro testigo H. a bisa cu el a mira J.T. banda di e supermercado. El a bisa cu e conoce W. pero no a mire ultimo tempo. Na opinion di Fiscal, esey ta indica cu e motibo di J.T. cu e no tabata na cas, no ta cuadra.

El a mustra cu J.T. a bisa cu e tabata den baño ora B. a sali bay laga e mucha riba cama. E baby a cay entre muraya y cama. Fiscal a bisa Hues cu e no ta kere declaracion di J.T. E raport di NFI ta mustra claramente cu e mucha a sufri maltrato.

Fiscal ta haya cu tin prueba convicente cu J.T. a maltrata e baby. Tin diferente declaracion entre otro e mama di e baby B., y tin asistencia di Polis pa maltrato di e baby y un otro mucha door di J.T. Su ex amiga tambe a mustra cu tabatin problema cu J.T. Tin indicacion cu J.T. ta agresivo.

Castigo exigi: Fiscal ta haya cu J.T. ta culpable di e promer acusacion esta maltrato severo di su baby di 7 siman. E caso ta serio y loke ta haci e caso mas serio ainda ta cu un baby di 7 siman a worde maltrata severamente. Dokter di mucha a constata cu e baby tin trauma psycologico. E caso aki a conmove comunidad hopi.

Fiscal a bisa cu e ta tene cuenta cu circumstancianan personal di J.T. y cu ta promer biaha cu ta cay sera pa algo asina. Tambe Fiscal a tene cuenta cu e raportnan di Reclasering y psycologo. Fiscal a mustra cu segun hurisprudencia ta entre 24 y 30 luna di prison tin pa e maltrato aki.

Fiscal a exigi 30 luna di prison di cual 6 luna ta condicional cu un tempo di prueba di 3 aña. Esaki pasobra psycologo ta mustra cu tin risico cu J.T. lo keda actua agresivo. Fiscal a pone condicion cu J.T. lo cay bou Reclasering durante e 3 añanan di prueba y e mester sigui cursonan pa controla su agresividad.

    DEFENSA DI ABOGADO:

Abogado mr. Zara a bisa Hues cu e ta haya cu mester declara J.T. liber di maltrato severo. No por saca afor cu ta J.T. a kibra e baby su pia. El a mustra hurisprudencia cu ta splica ki ora ta papia di maltrato severo y ki ora no. Loke ta keda ta maltrato di e baby. E abogado a bisa cu no tin prueba directo cu ta J.T. a maltrata su baby.

Muher ta gaña: Na opinion di abogado, J.T. a keda para riba cu e incidente a sosode 8 Maart 2016 y no riba 10 Maart 2016 manera cu e dama B. ta bisa. Esey ta indica cu B. ta gaña. J.T. a sali cu su amigo W. riba 10 di Maart 2016. Abogado a mustra cu B. a bisa un persona cu dia 10 Maart 2016el a yama J.T. E abogado a remarca pakico B. ta bay yama J.T. si e tabata na cas! Esey ta mustra cu J.T. no tabata na cas ora cu e incidente a sosode.

E ta haya cu mester tene cuenta cu B. den su denuncia a gaña. E raport di NFI tambe ta mustra cu e marca blauw na cara di e baby lo tabata dos dia despues di a dal su curpa. Esey ta mustra cu e incidente no a sosode dia 10 sino 8 Maart 2016. No tin prueba cu J.T. a maltrata su baby. Por papia di maltrato incondicional, ora cu a bay atende e baby manera B. a bisa esta cu a pone e baby bou awa di douche ora e yora. A duna respiracion artificial. Tur esaki J.T ta desmenti. E abogado a conclui cu J.T. ta inocente.

J.T. a remarca cu e ta haya inhusto cu e ta sera pa algo cu e no a haci. El a mustra cu e raport di NFI mes ta papia cu e marcanan cora y blauw ta dos dia despues pues cu dia 8 e cos a sosode y dia 10 a bay hospital.

Hues a sera tratamento di e caso y a bisa cu e ta bay studia e caso y dia 2 Juni 2017 pa 8.15 di mainta lo tin sentencia.

 

- Advertisement -

DUNA COMENTARIO

Please enter your comment!
Please enter your name here