Home Politica Famoso presentadora Maite Delgado tambe a protesta dilanti Consulado Venezolano

Famoso presentadora Maite Delgado tambe a protesta dilanti Consulado Venezolano

2551
0
SHARE
— Presentadora Maite Delgado.
- Advertisement -

ORANJESTAD (AAN): Cuerpo Policial tabata vigila parti di Paardenbaaistraat riba Dialuna mainta, ora cu Venezolanonan na Aruba a tene un accion di protesta pa libertad y husticia, net dilanti Consulado Venezolano.

— Maite Delgado den centro.

Mey-mey di esnan cu a protesta, bisti full na preto cu su cabey geel mara, por a mira e conocido presentadora y ex-reina di beyeza, Maite Delgado.  Cu un bril di solo riba su cara pa proteha su mes di e solo fuerte di mainta, el a splica na DIARIO cu nan accion di protesta ta uno di luto, pero alavez un forma di protesta, y un grito pa exihi libertad y husticia pa bida di e hobennan na Venezuela.

“Nos tin e derecho di pensa diferente,” e presentadora di 50 aña di edad a indica.  “Despues di 18 aña di un Gobierno cu tabata tin tur cos, cu tabata tin e apoyo di un pueblo y tur e placa, a keda bon cla cu e no a haci un bon trabao.  Kizas esaki debi na ineficiencia, of pasobra Gobierno mes no tabata kier, pero hecho ta cu Gobierno no a haci un bon trabao y punto”.

Maite Delgado a opina, cu Venezuela tin mester di biba mihor y cu e yiunan di tera ta reclamando esaki.  “Nos yiunan tin un curashi cu ta spantami, pasobra ta un pelea entre David y Goliat.  Nos yiunan ta sali cu escudonan di carton y sin camisa pa bringa contra tur e represion militar y contra tur e forza di un Gobierno miyonario.”

El a subraya cu e realidad ta, cu nan no ta bringando contra un pais, sino contra su Gobierno, “pasobra nos tur ta Venezolano”.

Esaki segun Delgado, kende a sigui bisa cu e grupo a presenta dilanti di Consulado Venezolano no pasobra nan tin algo contra e hendenan cu ta traha eynan.  “Cada un di nan lo tin nan consenshi y mi ta sigur cu nan ta tende e gritonan di silencio tur anochi”.  “Nos ta akinan awe cu un actitud pacifico y sin violencia”.

DIARIO a puntra Maite Delgado si e situacion ta asina malo, con por ta cu cada biaha e pueblo ta vota pa e Gobierno actual.  Señora Delgado a bisa cu e tabata desea di tin e contesta pa e pregunta ey.

“Sinembargo, e pregunta ta, di berdad e hendenan ta vota?  Pasobra loke  nos kier ta pa vota, pero e derecho ey nan ta nenga nos”.  “Nos kier vota cu un Conseho Nacional Electoral cu ta imparcial, nos tin esaki?”  “Nos kier defende nos leynan cu un tribunal supremo di husticia imparcial, nos tin esey?”.  “E unico cos legal cu nos tin ta e Asamblea Nacional cu a worde eligi pa mayoria di e votadornan na Venezuela den un votacion abrumador, pero nan a respeta nos?”

El a sigui bisa: “Nos a uza tur e mecanismonan cu e constitucion ta duna nos pa tene un referendum di revocacion cu por a worde resolvi atravez di un eleccion…nan a respeta nos?”  Esaki segun Delgado, kende a sigui bisa cu Gobierno a cera tur e camindanan electoral pa nan y pesey como ciudadano desarma ta nan deber di reclama.  “Nos arma ta nos palabra”, el a indica.  E ta gradici pueblo di Aruba cu nan a acepta nan.

- Advertisement -

DUNA COMENTARIO

Please enter your comment!
Please enter your name here