Home Policial Grupo di asalto arma di La Estrella a menaza di mata un...

Grupo di asalto arma di La Estrella a menaza di mata un ‘sapo’ cu a papia

2526
0
SHARE
- Advertisement -

Lo bay manda un di e sospechosonan prison na Curacao

ORANJESTAD (AAN): Tin problema serio entre grupo cu a haci asalto arma na La Estrella den Certified Megamall. Esey por a constata Diabierna, ora cu miembronan di CEA a trece e grupo den sala di Corte.  E grupo ta rabia cu uno di nan a bay ‘basha abao’.  Awendia un persona asina ta wordo yama “snitch” of “sapo”.

Un di e sospechosonan, E.J.C.A., a worde treci ultimo y tabata sinta aleha di e grupo. Despues su abogado a bisa Hues cu E.J.C.A. a worde menaza y tres biaha caba el a purba mata curpa. Fiscal a confirma cu e situacion ta serio y cu KIA no por garantiza su seguridad.

PROBLEMA GRUPO ASALTO:

Diabierna mainta e Venezolanonan, E.J.G., H.J.B., O.T.C., E.J.C.A. y e Colombiano R.R.V. a presenta dilanti Hues. Manera DIARIO a publica den un otro articulo, e sospechoso E.J.G. no kier a bay Corte y a keda den su cel na KIA.

Despues cu Fiscal a propone pa pospone e caso pa 8 September 2017, puntonan interesante a bin dilanti di parti di abogado mr. Mohamed y mr. Heinze. Mr. Mohamed a logra convence Hues cu su cliente R.R.V. ta inocente y despues di e debate, Hues a declara R.R.V. liber.

Abogado mr. Heinze a pidi pa laga sera E.J.C.A. den un otro prison den region pasobra el a worde menaza pa e grupo y tambe cu tres biaha caba el a purba mata curpa.

No ta envolvi: Abogado mr. Mohamed a bisa Hues cu su cliente R.R.V. tabata na e cas dia 27 Januari 2017 ora cu AT (Arestatie Team) a haci entrada pa detene esnan envolvi den e asalto arma na Estrella. Segun e abogado, R.R.V. a bay cobra huur y no tin nada di haci cu e caso. No a hay’e cu arma pero si ta worde acusa di posecion di arma. Enberdad a haya un cantidad di arma poni riba un mesa pero esey no kiermen cu e tambe ta sospechoso.

E abogado a bisa Hues cu segun ley, pa ta sospechoso, mester a haya arma den cercania, e mester tabata conciente di arma. E abogado a mustra cu tin sentencia di Corte Supremo caminda ta declara sospechoso liber pasobra no por demostra cu e tabatin arma den su poder. E abogado a conclui cu no por prueba cu R.R.V. tabatin arma y tampoco complice di posecion di arma y pesey mester declar’e liber.

Preso menaza: Mr. Heinze bisa cu E.J.C.A. door di su declaracion haci na Polis, a hay’e den problema cu e otronan. El a worde menaza door di e otronan y a bay asina leu cu na KIA e ta separa.

Purba mata curpa: E abogado a sigui bisa cu tres biaha E.J.C.A. a purba mata curpa. El a worde manda Paaz pero e personal na Paaz no kier a tene eynan pasobra E.C.A. ta forma peliger pa nan. E abogado a pidi Hues pa trata su caso separa cu e otronan. Tambe el a pidi pa encarcel’e na un otro prison den reino Hulandes.

Fiscal reacciona: Fiscal a reacciona cu e ta haya cu R.R.V. tabata den posecion di arma. E ta haya cu no mester lag’e liber.

Sera preso na Curacao: Pa loke ta E.J.C.A., Fiscal a bisa cu e ta na altura di e situacion y a papia cu e director di KIA, kende a bisa cu no por garantiza 24 ora di seguridad di E.J.C.A.

Fiscal a splica cu ta buscando un lugar den prison na Curacao pa E.J.C.A. Fiscal a bisa Hues cu e no ta haya cu por sigui detene E.J.C.A. na Aruba. Mientrastanto lo mester keda cera den KIA te ora keda cla cu haya un lugar na Curacao.

Pa loke ta e peticion pa trata caso separa, Fiscal ta haya cu esey no ta pisa mas cu e proceso di Corte pa trata e caso hunto. Ta asina E.J.C.A. ta esun cu a admiti y a basha abou riba e otronan. Sinembargo Fiscal no ta kere cu mester trat’e separa pasobra e otronan durante interogacion tambe a admiti.

HUES: Pa loke ta E.J.C.A., Hues a bisa cu e ta compronde su situacion y cu lo busca un lugar na Curacao. Esey ta haci cu e interes pa trat’e e caso separa menos y su caso lo worde trata hunto cu e otronan.

SOSPECHOSO DECLARA LIBER:

Pa loke ta R.R.V., Hues ta haya cu si mira procesverbaal, ta crea impresion cu e tambe tabatin arma. E armanan tabata riba mesa. Hues a bisa cu e ta comparti opinion di abogado esta cu e hecho cu e armanan tabata riba un mesa, no kiermen cu R.R.V. ta envolvi. Hues a declara R.R.V. liber y a ordena pa lag’e den libertad.

 

- Advertisement -

DUNA COMENTARIO

Please enter your comment!
Please enter your name here