Home Cultura Hasta pa premionan Oscar e peliculanan di Miguel Littin a wordo nomina

Hasta pa premionan Oscar e peliculanan di Miguel Littin a wordo nomina

24
0
SHARE
- Advertisement -

ORANJESTAD (AAN)— Manera Matutino DIARIO a anuncia, recientemente, Fundacion Omar Torrijos na Panama, ta compartiendo cu nos medio, diferente informacion relaciona cu e actividadnan cu for di aworaki mes ta tumando lugar, den cuadro di e celebracion di e di 40 Aniversario di e Tratadonan Torrijos- Carter, cu lo ta oficialmente dia 7 di September venidero.

E prome evento cu a tuma lugar den e sede di e fundacion, tabata e charla cu e Cineasta Chileno, mundialmente conoci, Miguel Littin y e presentacion di film “Allende en su laberinto”, pelicula cu el a dirigi y cu a wordo debati riba e anochi di Diahuebs 11 di Mei. DIARIO a wordo invita pa e director di e fundacion Lic. Guillermo Villalobos pa mira e evento via streaming.

Pakico skirbi mas riba Miguel Littin? Nos redaccion a haya peticion di un docente di un scol avanza, pa trece mas informacion dilanti di e personahe aki, pasobra e ta hopi interesante pa nos studiantenan cu aki poco tempo lo bay studia afo pa bira un profesional, haya e tipo di conocementonan aki cu con cu bay bin ta pertenece na nos mes region.

Den contacto cu e fundacion, Matutino DIARIO a haya copia di un entrevista cu e corant La Estrella a realiza cu Littin siman pasa. Un entrevista sumamente interesante cu den otro articulo nos lo resumi.

Corant la Estrella a publica un synopsis cortico di un historia hopi amplio, previo na e entrevista den cual nos por lesa lo siguiente:

E Cineasta Littin a dirigi peliculanan famoso manera: El Chacal de Nahueltoro, Actas de Marusia, El recurso del Metodo (basa riba un obra di Alejo Carpentier), e Viuda de Montiel (cuenta di Gabriel Garcia Marquez), Alsino y el Condor, y mucho mas. Pero tambe e ta e protagonista di un reportahe realize pa Garcia Marquez tocante su persona cu el a titular: “Miguel Littin clandestino en Chile”, den cual e autor ta relata e estadia den forma clandestine di un di e cinco mil exiliadonan cu prohibicion absolute di drenta na nan pais, durante e dictadura di Augusto Pinochet. Asina, el a filma mas cu siete mil meter di pelicula cu a bira un documental: Acta general di Chile cu a mustra e realidad despues di diesdos aña di yugo militar.

Cu tres ekipo europeo cu a drenta hunto cune, cu diferente cobertura legal, cambiando fisicamente cu ni su suegra lo por a reconoce riba caya, sin e dispositivonan electronico cu nos ta conta cune awendia pa comunica cu otro, Littin a realiza un berdadero odisea y Garcia Marquez a compronde mesora, ora el a scucha su relato, cu patras di su pelicula tabata tin otro sin haci, cu tabata core e riesgo di keda inedito.

E resultado tabata e buki cual prome tirahe tabata di 250 mil ehemplar di cual a bende miyones.

E trabaonan cinematografico di Littin a haci hopi impacto door di e denuncianan social y politico cu nan ta contene y varios a wordo nomina na e premio Oscar (Actas di Marusia y Alsino y el Condor), y na e festival di Cannes y na e Festival di Cine di Berlin a wordo presenta: Actas di Marusia y El recurso del metodo.

Nos ta gradici Fundacion Omar Torrijos pa a tuma na cuenta nos corant DIARIO pa difundi informacion asina interesante y transcendental na nos conciudadanonan.

- Advertisement -

DUNA COMENTARIO

Please enter your comment!
Please enter your name here