Home Politica Jacky van Putten di POR ta haya cu Joe Laveist Sportpark ta...

Jacky van Putten di POR ta haya cu Joe Laveist Sportpark ta un perla scondi

19
0
SHARE
????????????????????????????????????
- Advertisement -

ORANJESTAD (AAN): Ken no ta corda e decanan di 70 y 80 tempo cu baseball AA tabata un di e deportenan mas practica aki na Aruba . Ken no ta corda Lago Sport Park rand, rand cu no tabatin lugar ni pa para auto.

Ken por lubida “Lolita” na entrada di tur wega bendiendo su pindanan, chupa bebe, bals etc…. Wega di baseball entre e grandinan di Coca-Cola, Pepsi, Marlboro, Heineken, Arovino Casino y Aruba Video Center cu umpirenan bon conoci manera sr. Cornett y  sr.Freedom. Tambe weganan internacional y weganan di Antiyas contra Corsou  e.o. team di Wild Cats y Royal Scorpion.

Fanaticonan di baseball  di tur parti di Aruba ta bin San Nicolas pa ta presente na e play off aki di AA.

Tres aña pasa e gobierno actual a tuma e decision pa inverti  miyones di Florin den renobacion di nos stadion di baseball (Lago Sport Park) na San Nicolas. E renobacion a encera tur aspecto di e stadion. Un diseño nobo y moderno a worde implementa na unda e tribune, e veld e facilidad completo a haya un transformacion unico. Su entrada su murayanan tur a worde renoba.

Dia 18 juni 2017 e a worde inaugura, a gasta mas o menos 200. 000 Florin na promocion pa asina haci e inauguracion aki exitoso. A pone drones bula den dia y anochi pa asina saca e perla aki di tur skina pa asina pueblo por wak unda e placa a bay. Pa hacie ainda mas atractivo a invita peloteronan famoso di actualidad y pasado y a hunga un wega pa deleita e publico. Cu poco palabra un tremendo Centro Deportivo di baseball pa e pueblo di San Nicolas.

Despues di e inauguracion aki  tabatin un medio campeonato hubenil na 2016 y 2017 algun wega veteran 40 plus y e inicio di Campeonato Little League 2017. Cu mi tin comprendi no tabatin ningun otro evento deportivo, di baseball mas eyden  banda di e esnan menciona.

Mi ta puntra anto kico a pasa cu nan no ta hungando den e perla di ballpark traha cu (miyones) di placa di pueblo . Pakico no tin ningun wega di baseball of cualkier otro deporte den un super compleho asina. Papiando cu beisbolistanan, nan ta puntrami di con no ta uza e facilidad aki sabiendo cu nos a inverti tantismo placa pa upgrade y hacie bunita pa e pueblo di San Nicolas en especial.

Con nos por inverti den un luga asina y nunca uze? Mi no sa ken ta responsabel pero berdad ta cu no tin claridad riba e facilidad aki y lo ta bon pa esnan responsabel aclarea kico ta e rason, cu no ta uzando Joe Laveist Sport Park sabiendo cu tanto miyon a worde inverti. Ta FFD tin e cos aki tranca of ABBA, of ta maneho di gobierno no ta permiti esaki?

Ora tanto placa worde uza di pagadonan di belasting pa trece un proyecto asina costoso, mi ta di opinion cu mester responsabilisa esnan cu a bay di acuerdo cu esaki. Mester bin splicacion di con e facilidad aki no ta worde uza, pakico desde inauguracion casi no a uze mas.  Lo ta bon pa splica esaki pa tur hende sa y asina nos beisbolistanan por tin un aclaracion.

Mirando cuanto necesidad tin den e pueblo di San Nicolas pa facilidadnan y guia deportivo e pregunta ta e ora , e tabata responsabel pa hinca tanto placa den un facilidad deportivo pa despues ni uze? E facilidadnan deportivo cu tin awe, e Community Pool por ehempel ta den un estado deplorabel cu no a conoce mantenemento den e ultimo añanan! Ken ta responsabel pa un maneho di deporte asina, unda no ta pone e necesidad di e deportista di San Nicolas na prome lugar? San Nicolas a produci y ainda ta produci  deportistanan cu casi ningun facilidad adecua pa nos deportistanan.

Como atleta cu a nace y crece na San Nicolas mi ta haya esaki hopi di lamenta. Un maneho sin pia of cabes pa nos deportistanan di pariba. Plataforma nobo , POR ta di opinion cu nos mester primeramente concentra riba e necesidadnan di e pueblo deportivo di San Nicolas. Ya nos a sondia e necesidadnan y e maneho cu mester bay implementa den deporte pa asina nos hubentud tanto escolar y e federacionnan por tin acceso na e facilidadnan y cu lo bay tin suficiente guia profesional cu la percura cu cada hoben worde brinda e mesun oportunidad di practica deporte na un costo minimo hasta sin costo. E orguyo pa deportista di pariba di brug mester regresa hunto cu e crecemento economico pa medio di nos Cultural Heritage City y Joe Laveist Sport Park mester bira e centro nobo pa baseball aki na Aruba , manera e tabata antes ora nos tabata disfruta di campeonatonan enter Pepsi Cola, Arovino Casino, Coca-Cola, Marlboro, Heineken y Aruba Video Center!

- Advertisement -

DUNA COMENTARIO

Please enter your comment!
Please enter your name here