Home Enseñanza Ley cu ta regula Arubalening a keda formaliza

Ley cu ta regula Arubalening a keda formaliza

29
0
SHARE
- Advertisement -

ORANJESTAD    (AAN): Minister Hooyboer-Winklaar di Enseñansa y Famia hunto cu su colega Minister di Finansas Angel Bermudez a anuncia e formalisacion di e ley cu ta regula financiamento di estudio pa studiantenan di Aruba, conoci como Arubalening.

Formalisacion di e “Landsbesluit voorwaarden studieleningen” ta  historico mirando cu  ta pa prome biaha den 31 aña di Status Aparte di Aruba cu tin un ley cu ta regula financiamento di estudio y cu ta inclui tur e condicionnan na un manera cla y transparente.

Den pasado semper  a  traha cu contractonan cu tabata wordo adapta cada aña.  E formalisacion di e ley tambe ta historico pa e hecho cu a logra adapta y inclui varios condicionnan y beneficio pa e  studiante.

Gobernador hunto cu e dos Ministernan a firma e ley cu lo drenta na vigor dia 1 di juni 2017. E ley ta conta pa tur studiante existente, tur ex-studiante cu un debe actual di Arubalening y tambe tur studiante nobo. E comision cu a traha riba e ley a consisti di representante di Ministerio di Finansas, Ministerio di Enseñansa, Directie Wetgeving, Directie Onderwijs y Directie Financien, cu a presidi e comision.

 

E adaptacionnan di mas importante ta como lo siguiente:

E aspecto di interes di financiamento di estudio ta e parti cu a conoce e cambio di mas drastico na beneficio di e studiante. A stipula e interes den Landsbesluit na 2% “enkelvoudig” y ta cuminsa core na momento cu e studiante cuminsa paga bek (aflossingsperiode). No ta acumula interes desde momento cu cera contract of durante di estudio. E porcentahe nobo ta conta di manera retroactivo pa tur studiante existente of ex-studiante cu un debe actual di estudio di Arubalening.

 

Riba potret por haya un bista di e cambionan den interes durante e ultimo añanan a base di e contractnan formalisa di Arubalening.

 

Periodo maximo pa paga bek

Durante e ultimo añanan e periodo maximo pa paga e debe di estudio bek tabata stipula na 15 aña. Awo esaki a bira un periodo maximo di 20 aña. E studiante mes por scoge pa paga den menos tempo dependiendo di su “draagkracht”. E studiante por scoge pa paga un suma mas halto pa pa luna y caba di paga e fiansa den menos tempo of e studiante por scoge pa paga menos pa luna durante un periodo mas largo.

 

Suma di Arubalening pa Merca y Canada

E suma maximo pa Merca y Canada a subi di Afl. 102.000,= pa Afl. 140.000,= total. Tur esaki ta parti di e maneho pa haci studiamento na Merca y Canada mas accesibel pa nos studiante.

 

Producto apart pa financiamento di Masteropleiding

Antes no tabata tin un producto di Arubalening apart pa Masteropleiding. Awo a crea un opcion apart pa financiamento di estudio pa un Masteropleiding te na un maximo di Afl. 42.000,=.

 

Inscribi na Aruba

Banda di condicionnan di nacionalidad e studiante mester demostra cu e tin un minimo di 5 aña inscribi na Censo como ciudadano biba na Aruba. Pa studiantenan Arubiano cu ya ta den exterior a haci’e posibel cu nan por aplica pa bin na remarca pa un fiansa pa haci un Masteropleiding den caso cu nan tin maximo 7 aña uitgeschreven di Aruba.

 

Edad

E edad maximo pa bin na remarca pa Arubalening semper tabata stipula na 30 aña. Awo a haci’e posibel pa personanan te cu 35 aña tambe por aplica y bin na remarca pa un Arubalening den caso cu esaki ta pa studia na un di nos institutonan local cu ta wordo reconoci pa ley. E adaptacion aki ta forma parti di e maneho pa hisa accesibilidad di enseñansa pa nos poblacion pa asina un grupo mas grandi di hende tin acceso na financiamento pa studia riba nivel di enseñansa superior.

 

Minister Michelle Hooyboer-Winklaar ta masha contento cu e proceso y e resultado final cu awor ta formalisa na beneficio di nos studiantenan. Segun e mandatario e punto di salida semper ta loke ta na interes di nos studiantenan y alabes teniendo na cuenta loke ta responsabel pa pais Aruba. E titular di enseñansa a gradici su colega Minister di Finansas y e comision y e departamentonan cu a traha den un team multi disciplinario pa realisa e ley importante aki y ta convenci cu esaki lo tin un impacto positivo pa nos studiantenan, profesionalnan hoben y consecuentemente riba desaroyo di nos pais.

 

FIN

- Advertisement -

DUNA COMENTARIO

Please enter your comment!
Please enter your name here