Home General Mayornan di Zinnia Croes ta cuestiona cu ki seriedad rapport di accidente...

Mayornan di Zinnia Croes ta cuestiona cu ki seriedad rapport di accidente fatal a wordo traha

6002
1
SHARE
- Advertisement -

ORANJESTAD   (AAN): Diamars atardi e mayornan di Zinnia Croes a tene un rueda di prensa cerca nan abogado Sven Faarup, relaciona cu e caso unda cu riba 14 di Maart 2015 Zinnia lamentablemente a perde su bida den un accidente.

Mama di Zinnia, esta Michella Croes Matos a cuminza na bisa cu nan a cuminza un fundacion, pero Fundacion Zinnia no tin nada di haber cu e caso di nan yiu muher.

Señora Croes Matos a gradici su famia, nan amigonan y Aruba completo pa e sosten cu nan a ricibi durante e 2 aña y 1 luna, cu Zinnia a perde su bida den un accidente.

E conferencia tabata pa duna e ultimo desaroyonan den e caso, unda cu un muher polis cu lo tabata coriendo auto bao di influencia di alcohol, a pasa dal Zinnia den area di Pos Chikito, causando su morto.

Tata di Zinnia esta Gilbert Croes durante e conferencia di prensa a trece dilanti cu ta te 8 luna despues cu polis di trafico a hasi nan investigacion, papelnan a wordo manda pa Landsrecherche.

Esaki despues cu e mayornan di e victima a pone bastante presion.

Pa colmo, segun e tata, e papelnan tabata incompleto.

Aña pasa October OM a bisa e mayornan cu e muher polis lo no wordo persigui, ni pa core bao di influencia di alcohol.

Esaki, siendo cu segun Croes, e muher polis tabata bao di influencia di alcohol ora cu e accidente a tuma lugar.

“Despues di esey nunca mas nos a haya un carta di OM pa nos por sigui nos caminda, por ehempel atravez di un caso di apelacion”.

“E aña aki nos a sigui manda carta pa OM, pero ainda nos no a ricibi un carta di nan”.

Esaki segun e tata, kende a sigui bisa cu e procesverbalnan y e rapport principal cu a wordo traha di e accidente, no a wordo firma pa un specialista di trafico.

Segun Croes, ora cu a puntra e specialista di trafico ainda pa firma e rapport, el a nenga di hasi esaki, pasobra tabata tin foutnan den e rapport.

“Con e caso di mi yiu muher por ta colga riba un rapport cu tin fout aden y pesey nos ta cuestiona e seriedad cu cual e investigacion a wordo hasi”.

“Pa seguro nan ta pone mi yiu muher como causante di e accidente, pero na mes momento e rapport no ta firma pa un specialista di trafico”, segun tata di Zinnia, kende a sigui bisa cu tin mas error den e rapport, incluyendo e hecho cu dos polis ta declara diferente cos riba un lastra di brake.

El a sigui bisa cu OM a manda e caso pa ‘verkeersbureau’ na Hulanda y nan tambe a constata cu varios fout a wordo cometi.

Croes a bisa tambe cu nan deseo no ta cu e muher polis mester wordo cera, pero e ta cuestiona e hecho cu ni sikiera e ta bay presenta na corte dilanti di un huez, pa splica locual a sosode, siendo cu normalmente ora cu cualkier ciudadano haya nan mes den un tipo di accidente asina si esaki ta sosode.

Croes a menciona e caso di Indrah Stamper kende ta sufri di epilepsia y tabata envolvi den un accidente unda cu un comerciante a perde su bisa.

Den corte di prome instancia el a Sali liber di tur acusacion y OM a dicidi di bay den apelacion y eynan nan a haye responsabel pa e accidente, indicando cu el a actua na un manera iresponsabel, door di core auto, sabiendo cu e ta sufri di epilepsia.

Awor den e caso di Zinnia, OM mester a bisa tambe cu e muher polis ta responsabel pa e accidente, door di core auto sabiendo cu e tabata bao di influencia di alcohol.

“Pa colmo bo ta polis, pues bo mester sa mihor”, segun Croes.

 

 

- Advertisement -

1 COMMENT

  1. Justicia mester pa e mucha ki! Ta un crimen a wordo cometi. Miedo pa papia berdad na e isla ki pa e polisnan no bira contra bo, paso nan no ta wak bon i malo mas, nan ta wak nan mes so den e posishon cu nan ta i perde tur integridad ora ta bin na ‘brother’. Fayo, ja na cuminsamento di e caso pa traha rapport? Boso no tin balor di boso mesun curpa ora boso a wak e mucha benta eybow? Boso a core bai juda e muhe burache sin integridad di su mes pa admiti cu e la comete un crimen i toch ta jama su mes polis. Busca bo balor manera hende i hisa bo integridad mane polis. Si bo a rabia, bai drecha bo mes.

DUNA COMENTARIO

Please enter your comment!
Please enter your name here